اسلام آباد: سائیکل کلچر کے فروغ کے لیے اسلام آباد میں طویل ترین سائیکلنگ ٹریک بنے گا۔
چیئرمین کیپیٹل ڈویلپمنٹ اتھارٹی (سی ڈی اے) کی ہدایت پر شہریوں کو صحت مندانہ ماحول فراہم کرنے کے لیے اسلام آباد میں سائیکل کلچر کو فروغ دیا جائے گا، مختلف سیکٹرز اور علاقوں میں شاہراہوں کے ساتھ بائی سائیکل لینز تعمیر کرنے کا فیصلہ کیا گیا ہے۔
سی ڈی اے کے بائی سائیکل لائنز پراجیکٹ (بی ایل پی) کے تحت اسلام آباد کے مختلف علاقوں اور سیکٹرز میں 374 کلومیٹر طویل سائیکلنگ ٹریک 18 ماہ کی مدت میں 2.4 ارب روپے کی لاگت سے تعمیر کرنے کا منصوبہ بنایا گیا ہے، یہ سائیکلنگ ٹریک خیابان اقبال، سیکٹر G-6، G-7، G-8، گرین ڈبل لین، جناح ایونیو، ریڈ ڈبل لائن سمیت پرپل لائن میٹرو بس منصوبے سے منسلک شاہراہوں پر تعمیر کیا جائے گا۔
میٹرو بس سے نکلنے والے مسافر سائیکلنگ ٹریک استعمال کر سکیں گے، اسی طرح اس منصوبے کے تحت اسلام آباد کے ہر سیکٹر کو سائیکلنگ ٹریک کے ذریعے منسلک کیا جائے گا۔ بائی سائیکل لائنز پراجیکٹ کے تحت 150 پارکنگ اسٹینڈ بھی تعمیر کیے جائیں گے، تاکہ شہری سستے کرائے پر بائیکس جیسی سہولیات سے بھی مفید ہو سکیں۔
واضح رہے ہر اسٹینڈ پر 40 سے زائد الیکٹرانک بائیکس کھڑی کرنے کی گنجائش ہوگی، اور اس منصوبے کے تحت پیٹرول سے چلنے والی بائیکس کو مرحلہ وار ختم کر دیا جائے گا۔ بائی سائیکل لائنز پراجیکٹ کی افتتاحی تقریب آئندہ دنوں میں ہوگی جس کے مہمان خصوصی وزیر اعظم پاکستان میاں محمد شہباز شریف ہوں گے۔
مذکورہ منصوبے کے تحت لینز میں روشنی کے مناسب انتظامات، سیکیورٹی کے انتظامات سمیت دیگر ضروری انتظامات بھی کیے جائیں گے، سی ڈی اے انتظامیہ کا کہنا ہے کہ اسلام آباد شہر میں ماحولیاتی آلودگی کو ختم کرنا اور شہریوں کو صحت مندانہ ماحول فراہم کرنا ادارے کی اوّلین ترجیحات میں شامل ہے۔
