پارکوں اور تفریح گاہوں میں سیر کا اپنا لطف ہے،تاہم اگر آپ سو سالہ ماضی کی سیر کرنا چاہتے ہیں تو وفاقی دارالحکومت اسلام آباد میں گولڑہ شریف ریلوے جنکشنن سے بہترکوئی اور جگہ نہیں ہے۔
یوں تو اسٹیشن کا رخ کہیں جانے کی غرض سے ہی کیا جاتا ہے، لیکن گولڑہ ریلوے اسٹیشن پاکستان کا وہ واحد اسٹیشن ہے جہاں کھٹری ٹرینوں میں سوار ہوتے ہی انسان خود کو سو سال ماضی میں محسوس کرتا ہے،جی ہاں گولڑہ کا اسٹیشن ریلوے اسٹیشن ہونے کے ساتھ ساتھ ایک ایسا میوزیم بھی ہے جس نے ریلوے کی سو سالہ تاریخ کو محفوظ کر رکھا ہے۔
سو سال قبل استعمال ہونے والے ٹیلی فون، بندوقیں، آلات جراحی، میڈیکل ڈرپ اورآخری وائسرائے لارڈ ماﺅنٹ بیٹن کے زیر استعمال برتن،بھی اس میوزیم کی زینت ہیں۔ پینسٹھ کی جنگ میں بھارتی پنجاب کے کھیم کرن اسٹیشن سے لایا جانے والا نیل بال ٹوکن انسٹرومنٹ بھی قابل توجہ ہے۔
گولڑہ اسٹیشن کا میوزیم یہاں آنے والوں کو گزشتہ دنوں کے دلچسپ قصے سناتاہے،تو پلیٹ فارم پر موجود 150 سال سے بھی زائد بوڑھے برگد کے درخت اس ریلوے اسٹیشن کے تاریخی ہونے کی گواہی دینے کے ساتھ سحر انگیزی کا سبب ہیں۔
