خیبر ایجنسی: وادی تیراہ کےعلاقےنری بابا میں بارودی سرنگ کے دھماکے میں امن لشکر کے چھ رضاکارجاں بحق ہوگئے۔
سرکاری ذرائع کے مطابق یہ دھماکا توحید الاسلام امن کمیٹی کے ایک مظاہرے کے دوران نرے بابا کے قریب ہوا۔
ذرائع کے مطابق دھماکے میں تین امن رضاکار ہلاک جبکہ دو زخمی ہوگئے۔ دھماکے کے بارے میں کہا جارہا ہے کہ یہ ریموٹ کنٹرول کے ذریعے کیا گیا۔
واقعہ کے بعد سیکورٹی فورسز نے علاقے کو گھیرے میں لے لیا۔
شمالی وزیرستان: تازہ فضائی کارروائی میں تیئس مزید دہشت گرد ہلاک ہوگئے ہیں، ہلاک ہونے والے دہشت گردوں کی کل تعداد چھہیتر ہوگئی ہے۔
آئی ایس پی آر کے مطابق تازہ فضائی کارروائی بھی شمالی وزیرستان کی تحصیل دتہ خیل میں ہوئی، جس میں مزید تیئس دہشت گرد مارے گئے، مرنے والوں میں غیرملکی بھی شامل ہیں۔
اس سے قبل ایک اور فضائی کارروائی میں غیرملکیوں سمیت تریپن دہشت گرد ہلاک ہوئے تھے، حملے میں دہشتگردوں کے زیرِ استعمال چھ خفیہ پناہ گاہیں، اسلحہ کا ذخیرہ اور بارود سے بھری سات گاڑیاں بھی تباہ کردی گئیں تھیں۔
آئی ایس پی آر کے مطابق منگل کو آپریشن میں ہلاک ہونے والے دہشت گردوں کی مجموعی تعداد چھہیتر ہوگئی ہے۔
دوسری جانب مہمند ایجنسی میں ترقیاتی کاموں کا جائزہ لینے کے دوران جوانوں سے خطاب میں آرمی چیف کا کہنا تھا کہ تعمیرِ نو اور بحالی کے اقدامات سے حالات بہتر ہوں گے، نوجوانوں کیلئے تعلیم اور اقتصادی مواقع فراہم کرنے سے دور رس نتائج برآمد ہوں گے، ان کا کہنا تھا کہ علاقے میں حالات جلد معمول پر آجائیں گے۔
واضح رہے کہ آرمی پبلک اسکول پر حملے کے بعد شمالی وزیرستان سمیت ملک کے بیشتر علاقوں میں شدت پسندوں کے خلاف کارروائیاں جاری ہیں، آرمی پبلک اسکول حملے میں 133 بچے سمیت 148 افراد شہید ہوگئے تھے۔
یاد رہے کہ پاک آرمی نے شمالی وزیرستان ایجنسی میں گزشتہ سال 15 جون سے فوجی آپریشن ضرب عضب شروع کیا تھا، جس میں حکام کے مطابق بارہ سو سے زیادہ شدت پسند مارے جاچکے ہیں۔
لندن :ڈی جی آئی ایس پی آر میجر جنرل عاصم سلیم باجوہ نے کہا ہے کہ سانحہ پشاورپاکستان کےلیےاندوہناک حادثہ تھا، بھارت میں ایسے بہت کام ہورہےہیں جوہمارےعلم میں ہیں۔
جنرل راحیل شریف کے دورہ برطانیہ کے موقع پرلندن میں بریفنگ دیتے ہوئے ڈی جی آئی ایس پی آر میجرجنرل عاصم سلیم باجوہ نے کہا ہے کہ دہشت گردوں کیخلاف بلاتفریق کارروائی جاری ہے جس کے دوران اہم کامیابیاں بھی حاصل ہوئیں۔
عاصم سلیم باجوہ کا کہنا تھا کہ بھارتی جارحیت کےباعث مغربی سرحد پرمسائل ہورہے ہیں،پاکستان نےاب تک صبرسےکام لیا ہے لیکن بھارت ہمارےصبرکےجواب میں بےبنیادالزامات لگارہاہے۔
عاصم سلیم باجوہ کا کہنا تھا کہ دونوں ملکوں کےتعلقات بہتربنانےکیلئےوزیراعظم نے نریندر مودی سےملاقات میں ڈائرکٹر جنرل کی سطح پر مذاکرات کی تجویز دی تھی ،جس کے بعدمذاکرات میں پیشرفت ہوئی لیکن بھارتی جارحیت اپنی جگہ برقرار ہے۔
عاصم سلیم باجوہ نے کہا کہ امن وامان قائم کرنےکیلئےفریقین کوکام کرناہوگا، بھارت میں ایسی بہت کام ہورہےہیں جوہمارےعلم میں ہیں۔
عاصم سلیم باجوہ بھارت اورپاکستان کےدرمیان کشمیرکامسئلہ اہم ہے، ان کا کہنا تھا کہ سانحہ پشاور،عالمی برادری کی ہمدردی کےشکرگزارہیں، دہشت گردوں سےمذاکرات بھی ہوئےلیکن کوئی فائدہ ہونے بجائے انہوں نےحملے کئے،دہشتگردوں نےجنوبی وزیرستان میں خفیہ ٹھکانےبنارکھےتھے،دہشتگرد فورسزپرحملہ کرکےافغانستان فرارہوتےتھے، دہشت گردوں کی کمرتوڑدی،فنڈنگ روکنالازمی ہے۔
لندن:آرمی چیف کی وزیراعظم ڈیوڈکیمرون سےملاقات ہوئی جس میں دہشتگردی کیخلاف تعاون اور انٹیلیجنس معلومات پرتبادلہ خیال کیا گیا ۔
آئی ایس پی آر کے مطابق آرمی چیف جنرل راحیل شریف کی لندن میں وزیراعظم ڈیوڈکیمرون دیگرحکام سے ملاقات ہوئی جس میں دہشتگردی کےخلاف دونوں ملکوں کے تعاون اورانٹیلی جنس معلومات کے تبادلے پربات چیت ہوئی ۔
آئی ایس پی آر کے مطابق دونوں ملکوں میں کلعدم تنظیموں کے خلاف کاروائی اور دہشتگردوں کی بیرون ملک فنڈنگ روکنے پر بھی تبادلہ خیال کیا گیا ۔
آرمی چیف اور برطانوی قومی سلامتی کے مشیر سرکیم ڈیروج کے درمیان ملاقات کے دوران پاک برطانیہ دو طرفہ تعلقات اور دہشت گردی کے خلاف جنگ کے حوالے سے تبادلہ خیال کیا گیا جبکہ آرمی چیف نے شمالی وزیرستان میں جاری آپریشن ضرب عضب سے آگاہ کیا۔
ذرائع کے مطابق ملاقاتوں کے دوران خطے کی سلامتی سمیت افغانستان کی صورتحال پر بات چیت کی گئی جبکہ برطانیہ نے دہشت گردی کے خلاف جنگ میں پاکستانی مسلح افواج کے کردار کی تعریف کی۔
پشاور: غیرملکی سفارت کاروں کے نو رکنی وفد نے سی ایم ایچ پشاور کا دورہ کیا اورآرمی پبلک اسکول سانحہ میں زخمی بچوں کی عیادت کی۔
آئی ایس پی آرکے مطابق وفد میں آسٹریلیا، فرانس، جرمنی، سعودی عرب، ہالینڈ، جنوبی کوریا، ترکی، متحدہ عرب امارات اور برطانیہ کے سفیر شامل تھے۔
وفد کے اراکین نے پاکستانی قوم کی ان قربانیوں کو خراج تحسین کیا جو وہ دہشت گردی کے خاتمے کے لیے دے رہی ہے۔
آئی ایس پی آر کی جانب سے جاری کردہ اعلامیے میں کہا گیا ہے کہ وفد کے دورے کا مقصد آرمی پبلک اسکول کے بچوں اوران کے بہادرخاندانوں سے اظہار یکجہتی کرنا اورزخمی بچوں کی مزاج پرسی کرنا تھا۔
پشاور: سیکورٹی فورسز نے انٹیلی جنس اطلاع پر پشاور کے علاقے متنی میں کارروائی کی،دہشت گردوں کے خلاف کارروائی میں آرمی پبلک اسکول پشاور کا مبینہ ماسٹر مائنڈ عمر منصور نارے بھی مارا جا چکا ہے۔ تاہم اس کی ہلاکت کی باضابطہ تصدیق نہیں کی گئی ہے۔
دہشت گردوں سے جھڑپ میں زخمی ہونے والے اہلکار نے دورانِ علاج جام شہادت نوش کر لیا۔ متنی میں سیکورٹی فورسز نے مقابلے میں پانچ دہشت گرد ہلاک کیے تھے۔ جن میں آرمی پبلک اسکول پرحملے کے منصوبہ ساز عمر کا بھائی مصطفی عرف منان بھی شامل تھا۔
مقابلے میں دو جوان زخمی ہوئے تھے۔ جن میں سے ایک آج شہید ہو گیا۔ آئی ایس پی آر نے کارروائی میں پانچ دہشت گردوں کی ہلاکت کی تصدیق بھی کی۔
عسکری ذرائع کے مطابق دہشت گردوں کے خلاف کارروائی میں آرمی پبلک اسکول پشاور کا مبینہ ماسٹر مائنڈ عمر منصور نارے بھی مارا جا چکا ہے تاہم آئی ایس پی آر کی جانب سے اس کی ہلاکت کی باضابطہ تصدیق نہیں کی گئی ہے۔
عمر نارے عرف خلیفہ عمر دو ہزار سات میں طالبان میں شامل ہوا تھا۔ وہ ٹی ٹی پی پشاور درہ آدم خیل کا امیر تھا۔ اور آرمی پبلک اسکول پر حملہ کرنیوالے دہشت گردوں کو موبائل فون پر ہدایات دے رہا تھا۔
سیکورٹی فورسز نے پشاور حملے کے سہولت کار سیار ولد گل نواز کو بھی ہلاک کر دیا ہے۔
راولپنڈی : وادی تیراہ میں فورسز کی زمینی کارروائی کے دوران بتیس دہشتگرد مارے گئے، آئی ایس پی آر کے مطابق دہشتگرد پاک افغان سرحد کی طرف فرار ہورہے تھے۔
سانحہ پشاور کے بعد پاک فوج کی دہشتگردوں کیخلاف کارروائیوں میں تیزی آگئی ہے، آئی ایس پی آر کے مطابق دہشتگردوں کے خلاف کارروائی اس وقت عمل میں لائی گئی، جب وہ پاک افغان سرحد کی طرف فرار ہورہے تھے۔
آئی ایس پی آر کے مطابق دہشت گردوں کو ورمنگئی اور سپرکوٹ کےمقام پر روکنے کی کوشش کی گئی، جس پر دہشتگردوں سے فائرنگ کا تبادلہ ہوگیا ، فائرنگ کے تبادلے میں تین سیکیورٹی اہلکار زخمی ہوئے ، پاک فوج کی تابڑ توڑ کارروائی میں بتیس دہشتگرد مارے گئے۔
راولپنڈی :وزیرِاعظم نواز شریف نے جنرل ہیڈ کوارٹرز راولپنڈی کا دورہ کیا، جہاں انہیں ملک کی داخلی سیکیورٹی کی صورتحال پر بریفنگ دی گئی، آئی ایس پی آر کے مطابق دہشتگردی کیخلاف فضاء تیار کرنے پر تبادلہ خیال کیا گیا۔
وزیرِاعظم نواز شریف جی ایچ کیو پہنچے تو پاک فوج کے سربراہ جنرل راحیل شریف نے ان کا استقبال کیا، وزیرِ داخلہ چوہدری نثار علی خان بھی ان کے ہمراہ تھے ،اس موقع پر سیاسی اور عسکری قیادت کے درمیان قومی سلامتی کے امور پر مشاورت کی گئی۔
ذرائع کے مطابق وزیرِاعظم نواز شریف کو شمالی وزیرستان اور خیبر ایجنسی میں دہشت گردوں کےخلاف جاری آپریشن ضربِ عضب اور آپریشن خیبر ون پربریفنگ دی گئی۔
جس پر وزیرِاعظم نے اطمینان کا اظہار کیا، وزیرِاعظم نے ہدایت کی کہ دہشت گردوں کا خاتمہ جلد یقینی بنایا جائے۔
راولپنڈی: سانحۂ پشاور میں معصوم شہیدوں نے قوم کو جہاں سوگوارکردیا ہے،وہیں قوم اورقومی سلامتی کے اداروں کا غصہ بھی دہشت گردوں کے خلاف شدید ترہوگیا ہے۔
سانحۂ پشاور کے بعد پاک فوج نے آپریشن ضرب عضب کو دہشت گردوں کے خلاف موت کا استعارہ بنا دیا ڈی جی آئی ایس پی آر نے آرمی چیف کو بریفنگ میں بتایا کہ سانحۂ پشاور کے بعد دہشت گردوں کے خلاف بیس فضائی کارروائیاں کی گئیں جس میں ستاون دہشت گردوں کو ہلاک کردیا گیا۔
آئی ایس پی آر کا کہنا ہے کہ دہشت گردوں کے خلاف کارروائیاں جاری ہیں ۔
پشاور: ڈی جی آئی ایس پی میجر جنرل عاصم سلیم باجوہ نے سانحۂ پشاور پرصحافیوں کو بریفنگ دیتے ہوئے کہا کہ جس سفاکانہ طریقے سے بچوں کو قتل کیا اس کی مثال نہیں ملتی، اس وقت پوری قوم کو ایک جان ہوکر دہشت گردی کے خلاف لڑنا ہوگا۔
ان کا کہنا تھا کہ آج کا دن قومی المیے کا دن ہے کہ ورسک روڈ پر واقع آرمی پبلک اسکول پر ہونے والے حملے میں 132بچے اور 9 اسٹاف ممبر شہید ہوئے۔
انہوں نے کہا کہ یہ دہشت گرد نہ تو مسلمان ہیں نا ہی انسان ہیں انہوں جس سفاکانہ طریقے سے بچوں کو قتل کیا اس کی مثال نہیں ملتی۔
انہوں نے آرمی پبلک اسکول کے نقشے کی مدد سے بریفنگ دیتے ہوئے بتایا کہ دہشت گرد عقبی سمت سے داخل ہوئے اور آڈیٹوریم پہنچ کرفائرنگ کی ۔
اس کے بعد آڈیٹوریم کے دونوں اطراف سے نکل کر بھاگنے کی کوشش کی لیکن کوئیک ریسپانس فورس نے انہیں واپس اندر دھکیل دیا اور وہ ایڈمینسٹریشن بلاک کی طرف بھاگے۔
شام میں ایس ایس جی نے آپریشن کیا جس میں سب کے سب دہشت گرد مارے گئے۔
پہلا دہشت گرد آڈیٹوریم کے دروازے پرمارا گیا جب کہ باقی چھ کو ایڈمینسٹریشن بلاک میں گھیرکرمارا گیا۔
ساتوں حملہ آوروں نے خودکش جیکٹ پہنی ہوئی تھی اوران کے پاس دھماکہ خیز مواد بھی تھا۔
آرمی چیف راحیل شریف کی ہدایت پر ایس ایس جی کے جوانوں کو متحرک کیا گیا اور اس آپریشن میں ایس ایس جی کے سات جوان بھی اس واقع میں زخمی ہوئے۔
انہوں نے بتایا کہ حملہ آوراس قدردرندہ صفت تھے کہ مسجد کے اندربھی انہوں نےبچوں کو قتل کیا۔
عاصم باجوہ کا کہنا تھا کہ دہشت گردوں کے مکمل نیٹ ورک کے بارے میں معلومات حاصل ہوچکیں ہیں جنہیں آپریشنل وجوہات کی بناء پرفی الحال شیئر نہیں کیا جارہا آئندہ دو سے تین دن میں میڈیا کے ساتھ شیئر کیا جائے گا۔
انہوںنے ایک سوال کے جواب میں کہا کہ یہ وقت ہے کہ قوم خود بھی دہشت گردی کے خلاف جنگ میں اپنا کردار ادا کرے اور جہاں بھی کوئی مشکوک سرگرمی دیکھے آرمی کو اطلاع دے۔
انہوںنے یہ بھی بتایا کہ حملہ آور اپنے ساتھ راشن اور بھاری تعداد میں اسلحہ بھی لے کر آئے تھے جو کہ اس امرکی نشاندہی کرتا ہے کہ ان کے ارادے انتہائی خطرناک تھے۔
انہوں نے یہ بھی بتایا کہ حملہ آورعربی میں گفتگو کررہے تھے اوران کی قومیت کی شناخت تاحال باقی ہے۔
انہوں نے کہا کہ یہ حملہ آپریشن ضرب ِ عضب کا ردعمل ہے اور دہشتگردوں اور ان کے آخری ہمدرد تک یہ آپریشن جاری رہےگا۔