غزہ: حماس اور اسرائیل کے درمیان جنگ بندی معاہدہ اس بار مشکل میں پڑتا دکھائی دے رہا ہے، فریقین بھی ایک دوسرے پر الزامات عائد کر رہے ہیں اور ثالثوں کی جانب سے بھی مایوس کن تبصرے سامنے آ رہے ہیں۔
تفصیلات کے مطابق غزہ میں جنگ بندی کے لیے خطے کے ممالک سرگرمی دکھا رہے ہیں تاہم ایسے میں یہ سوال نازک صورت اختیار کر گیا ہے کہ کیا اس بار حماس اسرائیل جنگ بندی معاہدہ ہو پائے گا؟
حماس کا کہنا ہے اسرائیلی وزیر اعظم جنگ بندی سے متعلق معاہدے پر کھیل رہے ہیں، اور وہ نہیں چاہتے کہ کوئی معاہدہ ہو، گروپ نے جنگ بندی معاہدے کے حصول میں پیش رفت کی کمی کا ذمہ دار اسرائیل کو ٹھہرایا ہے۔
دوسری طرف اسرائیلی وزیر اعظم بنجمن نیتن یاہو نے حماس کی جانب سے جنگ بندی اور قیدیوں کی رہائی کے مطالبات کو ایک ’فریب‘ قرار دے دیا ہے، ادھر قطری وزیر اعظم شیخ محمد بن عبدالرحمان الثانی نے بھی کہا ہے کہ غزہ میں جنگ بندی کی جانب پیش رفت سست پڑ رہی ہے۔ انھوں نے ہفتے کے روز کہا ’’گزشتہ چند دنوں کا پیٹرن واقعی بہت امید افزا نہیں ہے۔‘‘
خان یونس اور رفح میں بمباری میں 60 فلسطینی شہید ہو گئے
سلامتی کونسل میں الجیریا کی درخواست پر غزہ میں جنگ بندی کے لیے ووٹنگ منگل کو ہوگی، امریکا نے ایک بار پھر جنگ بندی سے متعلق قرارداد کو ویٹو کرنے کی تیاری کر لی ہے۔
