Tag: Israel

لبنان اور اسرائیل کے درمیان کشیدگی میں شدت آ گئی، اسرائیلی فوج نے لبنان پر طاقت ور بموں سے حملے شروع کر دیے ہیں۔

الجزیرہ کے مطابق اسرائیلی فوج نے لبنان پر حملے تیز کر دیے ہیں، اسرائیل کے طاقت ور بم حملوں کے نتیجے میں لبنان میں خوف ناک دھماکے ہوئے ہیں، حملوں میں مشرقی اور جنوبی لبنان کے قصبوں کو نشانہ بنایا گیا۔

اسرائیلی فضائیہ نے جنوبی لبنان کی بیکا وادی پر شدید بم باری کی، جب کہ ثور اور نبطیہ کے علاقوں میں بھی زور دار دھماکے ہوئے ہیں، اسرائیل کی جانب سے حزب اللّٰہ کے اہداف پر حملوں کا دعویٰ کیا گیا ہے، جب کہ بم باری کے بعد اسرائیلی فوج کے ترجمان نے لبنانی عوام کو حزب اللّٰہ کی پوسٹوں سے دور رہنے کا مشورہ دے دیا ہے۔

لبنان کی سرکاری نیشنل نیوز ایجنسی (این این اے) نے اطلاع دی ہے کہ مشرقی اور جنوبی لبنان کو نشانہ بنانے والے اسرائیلی فضائی حملوں کی نئی لہر میں کم از کم ایک شہری ہلاک جب کہ ایک چرواہا اور اس کے خاندان کے دو افراد زخمی ہو گئے۔ دشمن کے جنگی طیاروں نے آدھے گھنٹے میں 80 سے زیادہ فضائی حملے کیے، جس میں جنوبی لبنان کے ضلع نبطیہ اور طائر کو نشانہ بنایا گیا۔

ہم نہیں سمجھتے کہ لبنان کے ساتھ کشیدگی بڑھانا اسرائیل کے بہترین مفاد میں ہے، جان کربی

اسرائیلی فوج کے ترجمان ڈینیئل ہگاری نے صحافیوں سے گفتگو میں کہا کہ لبنانی شہریوں سے ہم کہتے ہیں کہ وہ حزب اللہ کے زیر استعمال عمارتوں اور علاقوں سے نکل جائیں، یہ ان کی حفاظت کے لیے ہے۔

خبر رساں ادارے روئٹرز نے رپورٹ کیا ہے کہ جب صحافیوں نے لبنان میں ممکنہ زمینی دراندازی کے بارے میں سوال کیا تو اسرائیلی فوجی ترجمان نے کہا کہ ’’ہم شمالی اسرائیل سے بے دخل کیے گئے مکینوں کی بہ حفاظت اپنے گھروں کو واپسی کو یقینی بنانے کے لیے جو کچھ بھی ہو سکا وہ کریں گے۔‘‘

بیروت: جنگی جنون میں مبتلا اسرائیل نے لبنان پر وحشیانہ حملے شروع کر دیے ہیں، آج صبح اسرائیلی فورسز نے جنوبی لبنان میں 110 مقامات پر حملے کیے۔

غیر ملکی میڈیا رپورٹس کے مطابق اسرائیل نے غزہ کے بعد لبنان میں بھی دہشت گردی شروع کر دی، گزشتہ رات صہیونی فورسز نے جنوبی لبنان میں ایک سو دس مقامات پر 400 حملے کیے، جس میں متعدد مکانات تباہ ہوئے۔

حزب اللہ نے جوابی کارروائی میں شمالی اسرائیل پر میزائل داغے اور فوجی تنصیبات کو نشانہ بنایا، جس میں 3 افراد زخمی ہوئے، حملوں کی وجہ سے شمالی اسرائیل میں عوامی اجتماعات پر پابندی اور اسکول بند کر دیے گئے۔

دوسری طرف لبنانی وزارت صحت نے کہا ہے کہ جنوبی لبنان میں جمعہ کو اسرائیلی حملوں میں اموات کی تعداد 45 ہو گئی ہے۔

اقوام متحدہ کے سیکریٹری جنرل انتونیو گوتریس نے کہا، لبنان کو ایک اور غزہ بننے نہیں دیا جا سکتا، لبنان اسرائیل جنگ ہر صورت روکنا ہوگی۔ انھوں نے بے بسی کا اظہار کرتے ہوئے کہا کہ سلامتی کونسل کے پاس کچھ اختیارات ہیں مگر ویٹو پاور کی وجہ سے وہ مفلوج ہے۔

لبنان میں پیجر دھماکوں کے ایک ہولناک سلسلے کے بعد امریکا نے کہا تھا کہ اس میں ان کا کوئی ہاتھ نہیں ہے، تاہم اب یہ اہم انکشاف سامنے آیا ہے کہ اسرائیل نے اس دہشت گردانہ حملے سے قبل امریکا کو اس کے بارے میں ایک اشارہ دے دیا تھا۔

روئٹرز کے مطابق ایک امریکی اہل کار نے نام ظاہر نہ کرنے کی شرط پر بتایا کہ اسرائیل نے منگل کو واشنگٹن کو بتایا تھا کہ وہ لبنان میں ’کچھ‘ کرنے جا رہا ہے۔ لیکن اسرائیل نے تفصیلات فراہم نہیں کیں، اس کے بعد لبنان میں پیجرز دھماکوں والی کارروائی خود واشنگٹن کے لیے حیران کن تھی۔

مسلح گروپ حزب اللہ کے ارکان رابطوں کے لیے واکی ٹاکی کا استعمال کرتے ہیں، گزشتہ روز بدھ کو بیروت کے مضافاتی علاقوں اور وادی بیکا میں جگہ جگہ یہ واکی ٹاکی خوف ناک دھماکوں کی صورت میں پھٹنے لگے اور تقریباً 20 افراد ہلاک ہو گئے، اور 450 سے زائد زخمی ہوئے۔

ایک روز قبل یعنی منگل کو بالکل اسی طرح پیجرز میں دھماکے ہوئے، جس سے 12 افراد ہلاک ہوئے، جن میں دو بچے بھی شامل تھے، جب کہ تقریباً 3000 زخمی ہوئے۔

روئٹرز کے مطابق اسرائیلی حکام نے ان دھماکوں پر کوئی تبصرہ نہیں کیا ہے تاہم سیکیورٹی ذرائع کا کہنا ہے کہ اسرائیل کی جاسوسی ایجنسی موساد اس کے لیے ذمہ دار ہے۔ ایک طرف غزہ میں اسرائیلی جارحیت کا بدترین سلسلہ 11 ماہ سے جاری ہے اور اب لبنان میں ان کارروائیوں سے ایک مکمل علاقائی جنگ کا خطرہ بہت زیادہ بڑھ گیا ہے۔

واکی ٹاکی دھماکے، جاں بحق حزب اللہ ارکان کی تعداد 20 ہو گئی

اسرائیلی وزیر دفاع یوو گیلنٹ نے فضائیہ کے ایئرپورٹ پر بیان میں کہا تھا کہ ’’ہم جنگ میں ایک نیا مرحلہ شروع کر رہے ہیں اور اس کے لیے ہمت، اور عزم کی ضرورت ہے۔‘‘ اردن کے وزیر خارجہ ایمن صفادی نے اسرائیل پر الزام عائد کیا کہ وہ مشرق وسطیٰ کو کئی محاذوں پر خطرناک کشیدگی کے ذریعے علاقائی جنگ کی طرف دھکیل رہا ہے۔

امریکا نے ان دھماکوں میں کسی بھی قسم کے ملوث ہونے سے انکار کیا ہے، تاہم ایک امریکی اہلکار نے نام ظاہر نہ کرنے کی شرط پر بتایا کہ اسرائیل نے منگل کو واشنگٹن کو بتا دیا تھا کہ وہ لبنان میں کچھ کرنے جا رہا ہے، تاہم اسرائیل نے تفصیلات فراہم نہیں کیں، یہ کارروائی خود واشنگٹن کے لیے حیران کن تھی۔

بیروت کے رپورٹرز کے مطابق دھماکوں کے بعد حزب اللہ کے ارکان نے ان واکی ٹاکیز سے بیٹریاں نکال کر دھاتی بیرل میں پھینکے جو نہیں پھٹے تھے، حزب اللہ نے موبائل فونز کی اسرائیلی نگرانی سے بچنے کے لیے ان پیجرز اور دیگر کم ٹیکنالوجی والے مواصلاتی آلات کا انتخاب کیا تھا لیکن اس تک بھی اسرائیل نے رسائی کی۔