غزہ: حماس کے جانبازوں نے اسرائیل کو تگنی کا ناچ نچا دیا ہے، مسلسل حملوں میں اسرائیل کے اندر سو فوجیوں سمیت 1000 اسرائیلی ہلاک ہو گئے۔
غیر ملکی میڈیا رپورٹس کے مطابق حماس کی جانب سے آپریشن طوفان الاقصیٰ کے تیسرے روز مزید ساڑھے 4 ہزار راکٹ داغے گئے، اور حملوں میں سو فوجیوں سمیت ایک ہزار اسرائیلی مارے جا چکے ہیں، جب کہ ڈھائی ہزار سے زائد زخمی ہیں۔
فلسطین کی مزاحمتی تنظیم نے 130 اسرائیلیوں کو قیدی بنا لیا ہے، اور اسرائیل کے 8 مقامات پر اسرائیلی فوجیوں اور حماس کے جانبازوں میں جھڑپیں جاری ہیں، دوسری طرف غزہ پر اسرائیلی فضائی بمباری میں بھی 4 اسرائیلی یرغمالی مارے گئے ہیں۔
حماس کے حملوں کی وجہ سے تل ابیب میں افرا تفری مچی ہوئی ہے، پروازیں بند ہو گئیں، فلسطین پر قبضہ کرنے والے اسرائیل سے بھاگ رہے ہیں۔
بزدل اسرائیل نے تمام حدیں پار کر دیں، 704 فلسطینی شہید
ادھر بزدل اسرائیل نے تمام حدیں پار کر دیں، غزہ میں مساجد کے بعد ایمبولینسوں اور شہری آبادی کو بھی نشانہ بنانا شروع کر دیا گیا ہے، غزہ اور مغربی کنارے میں اسرائیلی حملوں سے شہید فلسطینیوں کی تعداد 704 ہو گئی ہے، جن میں 140 بچے اور 100 سے زائد خواتین شامل ہیں، جب کہ زخمی فلسطینیوں کی تعداد 3800 سے تجاوز کر گئی۔
صہیونی فوج نے مریضوں کو لے جانے والی ایمبولینسوں پر بھی میزائل مار دیا، اور شہری علاقوں میں گھروں پر بمباری کی، جس سے رہائشی عمارتیں ملبے کا ڈھیربن گئیں، اور غزہ کے اسپتال زخمیوں سے بھر گئے ہیں، آج چوتھے روز بھی اسرائیل کی غزہ پر وحشیانہ بمباری جاری ہے، اسرائیل نے غزہ کا مکمل محاصرہ کر لیا ہے، پانی، بجلی اور گیس بند کر دی گئی ہے، تین دن سے بلیک آؤٹ ہے اور لوگوں نے رات تاریکی میں گزاری۔
اسرائیل نے سرحد پر فوجی پیش قدمی کرتے ہوئے ٹینک تعینات کر دیے ہیں، محاصرے سے بڑی خونریزی کا خدشہ بڑھ گیا ہے، غزہ میں اسرائیلی بمباری میں ایک خاندان کے 19 افراد شہید ہوئے، اقوام متحدہ کا کہنا ہے کہ غزہ محاصرے سے انسانی المیہ جنم لے گا، ترک صدر رجب طیب اردوان نے مطالبہ کیا ہے کہ اسرائیل غزہ پر بمباری بند کرے، ادھر جنگ بندی کے لیے قطر، سعودی عرب اور ترکیہ کی کوششیں جاری ہیں۔
غیر ملکی میڈیا رپورٹس کے مطابق غزہ میں اسرائیلی بمباری سے کئی سڑکیں اور گھر تباہ ہوئے، 7 مساجد اور 72 رہائشی عمارتیں مکمل تباہ ہو گئیں، جب کہ 5 ہزار سے زائد رہائشی عمارتوں کو نقصان پہنچا، تباہ عمارتوں کے ملبے تلے درجنوں افراد کے دبے ہونے کا خدشہ ہے، اسرائیل کی فلسطین کے نجی ٹیلی کمیونی کیشن کمپنی کے ہیڈکوارٹرز پر بمباری سے لینڈ لائن ٹیلی فون، انٹرنیٹ اور موبائل فون سروس متاثر ہو گئی ہے۔
اقوامِ متحدہ کے سیکریٹری جنرل انتونیو گوتریس نے غزہ محاصرے پر تشویش کا اظہار کرتے ہوئے کہا کہ غزہ میں بجلی ایندھن، کھانا بند ہونے سے صورت حال مزید بگڑ جائے گی، بے یارو مددگار فلسطینیوں کی امداد نہیں رکنی چاہیے، عالمی برادری بھی فوری انسانی امداد کے لیے آگے آئے۔
