عمان : اردن میں اسرائیلی سفارت خانے کے قریب فائرنگ سے 3 پولیس اہلکار زخمی جبکہ حملہ آور ہلاک ہوگیا۔
غیر ملکی خبر رساں ادارے کی رپورٹ کے مطابق اردن کے سرکاری میڈیا کا کہنا ہے کہ اردن کے دارالحکومت کے قریب واقع اسرائیلی سفارت خانے پر اتوار کو صبح سویرے فائرنگ کا واقعہ پیش آیا ہے۔
فائرنگ کے نتیجے میں ایک شخص گولی لگنے سے ہلاک اور سکیورٹی سروسز کے تین اہلکار زخمی ہوگئے جنہیں فوری طور پر اسپتال منتقل کردیا گیا۔
عینی شاہدین کے مطابق فائرنگ کی آواز سننے کے بعد اردنی پولیس نے سخت حفاظتی اقدامات کرتے ہوئے اسرائیلی سفارتخانے کے اطراف علاقے کو گھیرے میں لے لیا۔
رپورٹ کے مطابق عمان کے علاقے ربیعہ میں اسرائیلی سفارتخانے کے قریب ایک مسلح شخص نے گشت پر مامور پولیس اہلکاروں پر فائرنگ کی تھی، جوابی فائرنگ سے حملہ آور بھی مارا گیا۔”
واضح رہے کہ اردن کی ایک کروڑ 20 لاکھ نفوس کی آبادی میں سے اکثریت کا تعلق فلسطین ہے جو خود یا پھر ان کے والدین 1948 میں فلسطین سے بھاگ کر اردن آ گئے تھے اور یا انہیں نکال دیا گیا تھا۔ ان میں اکثر کے دریائے اردن کی اسرائیلی طرف پر رہنے والوں کے ساتھ خاندانی تعلقات ہیں۔
رپورٹ کے مطابق یہ علاقہ اکثر اسرائیل کے خلاف مظاہروں کا مرکز رہا ہے، اردن میں غزہ جنگ کے تناظر میں اسرائیل کے خلاف مظاہروں کی شدت زیادہ دیکھی گئی ہے، اور یہ مظاہرے پورے خطے میں سب سے بڑے اور پرامن شمار کیے جاتے ہیں۔
