حیدرآباد: انسداد دہشتگردی عدالت حیدرآباد نےقومی اداروں کیخلاف تقاریر کے مقدمات میں الطاف حسین کے ناقابل ضمانت وارنٹ گرفتاری جاری کر دیئے۔
کراچی اور کوئٹہ کے بعد حیدرآباد کی انسداد دہشتگردی عدالت نے بھی الطاف حسین کے وارنٹ گرفتاری جاری کر دیئے، قومی اداروں کیخلاف اشتعال انگیز تقاریر کے دو مقدمات میں الطاف حسین کے ناقابل ضمانت وارنٹ جاری کیے گئے۔
الطاف حسین کیخلاف مقدمات مٹیاری اور ٹنڈوالہیار تھانے میں درج ہیں، جوڈیشل مجسٹریٹ گھوٹکی نے بھی الطاف کے وارنٹ جاری کر دیے۔ قومی اداروں کیخلاف تقاریر پر الطاف حسین کو ملک بھر میں سو سے زائد مقدمات کا سامنا ہے۔
گزشتہ جمعے کو کوئٹہ کی انسدادِدہشت گردی کی عدالت نے الطاف حسین کے وارنٹ گرفتاری جاری کیے تھے، قومی اداروں کیخلاف تقاریر کرنے پر الطاف حسین کے خلاف مقدمہ تھانہ پشین میں درج کرایا گیا تھا، کوئٹہ کی انسداد دہشتگردی عدالت نے ملزم الطاف حسین کوگرفتارکرکے پچیس اگست کو پیش کرنے کا حکم دے رکھا ہے۔
اس سے قبل ہنگو کے سول جج نے الطاف حسین کو گرفتار کر کے عدالت پیش کرنے کا حکم دیا تھا، کراچی کی انسداد دہشت گردی عدالت نے الطاف حسین کی گرفتاری کے وارنٹ جاری کیے، وارنٹ کرنل طاہر دھمکی کیس میں جاری کئے گئے، الطاف حسین کیخلاف کراچی کے سول لائنز تھانےمیں مقدمہ درج کرایا گیا تھا۔