استنبول : ترکیہ کے شہر استبول میں آسمان پر ایک حیران کن اور پُراسرار روشنی نے لوگوں کو شدید خوف میں مبتلا کردیا، وہاں موجود لوگ مختلف چہ مگوئیاں کرتے رہے۔
غیر ملکی خبر رساں ادارے کی رپورٹ کے مطابق استبول کے شہریوں نے رات کو آسمان پر اس پراسرار روشنی کو دیکھ کر دعویٰ کیا کہ انہیں دم دار ستارے جیسی کوئی روشن چیز آسمان پر سفر کرتی نظر آئی ہے۔
تاہم اس حوالے سے اب تک کوئی حتمی بات سامنے نہیں آسکی ہے۔ مذکورہ ویڈیو سوشل میڈیا پر وائرل ہوگئی اور مختلف قیاس آرائیاں گردش کرنے لگیں۔
کسی نے کہا کہ یہ ایک میزائل تھا جب کہ کچھ کا خیال تھا کہ یہ سٹیلائٹ ہے۔ اکثر لوگوں نے خدشہ ظاہر کیا کہ یہ کسی خلائی مشن کا ملبہ تھا جب کہ کسی نے اسے ٹوٹا ہوا ستارہ قرار دیا۔
ترکیہ کی خلائی ایجنسی نے سوشل میڈیا پر عوام کو پُرسکون رہنے کی ہدایت کرتے ہوئے بتایا کہ یہ ممکنہ طور پر ایک شہابیے جیسی کوئی چیز تھی لیکن اس کی فی الوقت تصدیق نہیں کی جاسکتی۔ اس حوالے سے ابھی تحقیقات جاری ہیں۔
واضح رہے کہ چند روز قبل بھی ایک ایسی ہی ایک ویڈیو سوشل میڈیا پر کینیڈا سے تعلق رکھنے والے جوڑے کی جانب سے شیئر کی گئی تھی جس میں انہوں نے دعویٰ کیا تھا کہ انہوں نے مقامی دریا کے اوپر دو چمکتے ہوئے ایلینز کے پراسرار جہاز دیکھے ہیں۔
اس وائرل ویڈیو کو دیکھ کر سوشل میڈیا صارفین بھی خوفزدہ دکھائی دیئے تو کچھ نے کہا کہ یہ ڈرون ہوسکتے ہیں جبکہ یہ بھی کہا جارہا ہے کہ یہ سورج کی روشنی ہوسکتی ہے۔
