روم : اٹلی میں ایک مسلح شخص نے کیفے پر بیٹھی 3 خواتین کو فائرنگ کرکے قتل کردیا، ہلاک ہونے والوں میں اٹلی کی نئی وزیراعظم کی دوست بھی شامل ہے۔ فائرنگ سے چار افراد بھی زخمی ہوئے۔
غیر ملکی خبر رساں ادارے کی رپورٹ کے مطابق اطالوی پولیس کا کہنا ہے کہ فائرنگ ایک اپارٹمنٹ کے تنازعہ پر کی گئی ہے، فائرنگ کرنے والے ملزم کو گرفتار کرلیا گیا ہے۔
اطالوی وزیراعظم جارجیا میلونی نے ایک فیس بک پوسٹ میں انکشاف کیا کہ ہلاک شدگان میں ایک ان کی دوست نکولیٹا گولیسانو بھی تھی۔ دیگر مقتول خواتین کے نام ایلیسابیٹا سائلینزی اور سبینا سپرانڈیو ہیں۔
پولیس کے مطابق ستاون سالہ ملزم کلاڈیو کیمپی نے روم کے شمالی ضلع میں اپنی بلڈنگ کے مکینوں کے ساتھ ملاقات کے دوران طیش میں آکر فائرنگ کردی۔ یہ واردات اس نے چوری کی پستول سے کی۔
گزشتہ ماہ نومبر میں ملزم کیمپی نے عمارت کے دیگر مکینوں کو مطلع کرتے ہوئے الزام لگایا تھا کہ مذکورہ خواتین اسے اپنے گھر سے محروم کرنے کی کوشش کر رہی ہیں۔
ہلاک ہونے والی خواتین میں ایک 10 سالہ بچے کی 50 سالہ ماں نکولیٹا گولیسانو بھی شامل تھیں جو عمارت کی کمیٹی میں بطور خزانچی فرائض انجام دیتی تھیں۔
اطالوی وزیر اعظم میلونی نے انکشاف کیا کہ گولیسانو ان کی قریبی دوست تھیں، میلونی نے کہا وہ ایک وفادار ماں اور ہم راز دوست تھیں۔ انہوں نے کہا کہ قاتل پکڑا گیا ہے۔ امید ہے کہ انصاف جلد اپنا راستہ اختیار کرے گا۔
