روم: اٹلی میں گزشتہ روز لینڈنگ کے دوران ایک طیارے کے پچھلے چاروں ٹائر پھٹ گئے، جس سے طیارے میں سوار مسافر شدید خوف میں مبتلا ہو گئے۔
غیر ملکی میڈیا رپورٹس کے مطابق اٹلی میں لینڈنگ کے دوران جہاز کے چاروں ٹائر پھٹ گئے، تاہم عملہ اور مسافر محفوظ رہے، اور رن وے کو نقصان پہنچا، حادثے کے بعد میلان ایئر پورٹ بند کر دیا گیا، اور تمام پروازیں منسوخ کر دی گئیں۔
پرواز میں عملے سمیت 161 مسافر سوار تھے، جن میں برطانوی مسافر بھی شامل تھے، ریان ایئر کے ٹائر پھٹنے کے بعد طیارے میں خوف اور افراتفری مچ گئی تھی۔
یہ واقعہ یکم اکتوبر کو صبح آٹھ بجے کے قریب پیش آیا، طیارے نے بارسلونا کے ایئرپورٹ سے اڑان بھری تھی اور میلان کے قریب برگامو کے ایئرپورٹ پر اتری تھی، تاہم اس دوران پچھلے انڈر کیرج کے چاروں ٹائر اچانک پھٹ گئے۔
سامنے آنے والی تصاویر میں دکھایا گیا ہے کہ مسافر طیارے کے ٹائر غائب ہیں اور دھاتی پہیوں نے رن وے کو نقصان پہنچایا ہے۔
