Tag: Jail

کیپٹن (ر) صفدر کی گرفتاری، نیب کا رکاوٹ ڈالنے والوں کی عدم گرفتاری پر اظہار برہمی

اسلام آباد: کیپٹن ریٹائرڈ صفدر کی گرفتاری کے دوران رکاوٹ ڈالنے والوں کی عدم گرفتار پر نیب نے شدید برہمی کا اظہار کیا ہے۔

تفصیلات کے مطابق گذشتہ روز ایوان فیلڈ ریفرنس میں سزا پانے والے سابق وزیر اعظم نواز شریف کے داماد کیپٹن (ر) صفدر کو گرفتار کر کے اڈیالہ جیل منتقل کیا گیا تھا تاہم ان کی گرفتاری میں نیب کو رکاوٹوں کا سامنا کرنا پڑا تھا۔

نیب کی جانب سے جاری کردہ اعلامیے کے مطابق چیئرمین نیب نے رکاوٹ ڈالنے والوں کی عدم گرفتاری پر اظہار برہمی کرتے ہوئے ڈی جی نیب راولپنڈی کو فوری انکوائری کا حکم دیا ہے۔

نیب نے مجرم کیپٹن (ر) صفدر کو پناہ دینے والوں کا پتا لگالیا

اعلامیے میں کہا گیا ہے کہ راولپنڈی پولیس کا رویہ انتہائی غیر سنجیدہ ہے، نیب راولپنڈی مقدمے کے بعد کی صورت حال مانیٹر کررہی ہے۔

اعلامیے کے مطابق تمام صورت حال سے چیئرمین نیب کو آگاہ رکھا جارہا ہے، جبکہ گرفتاریاں نہ ہوئیں تو احتساب عدالت کے نوٹس میں لایا جائے گا۔

کیپٹن ریٹائرڈ صفدر کے لیے جیل میں بھی شاہانہ لوازمات

چیئرمین نیب کی جانب سے مجرم کیپٹن صفدر کو تحفظ دینے والوں کے خلاف نوٹس کے بعد نیب نے مجرم کیپٹن (ر)صفدر کو پناہ دینے والوں کا پتہ بھی لگالیا ہے۔

نیب ذرائع کا کہنا تھا کہ شکیل اعوان، چوہدری تنویر، ملک ابرار و دیگر نے کیپٹن(ر)صفدر کو پناہ دی جبکہ لیگی رہنماؤں نے مجرم کی گرفتاری میں بھی رکاوٹ ڈالی، گرفتاری میں رکاوٹ ڈالنے والے تمام افراد کے خلاف کارروائی ہوگی۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

جولائی 10, 2018
کیپٹن ریٹائرڈ صفدر کے لیے جیل میں بھی شاہانہ لوازمات

اسلام آباد : ایوان فیلڈ ریفرنس میں سزا پانے والے نواز شریف کے داماد کیپٹن (ر) صفدر کو شاہی جیل منتقل کردیا گیا ، جہاں ان کو ریفریجریٹر کی سہولت سمیت دیگر ایگزیکٹو سہولیات بھی میسر ہوں گی۔

تفصیلات کے مطابق قوم کا پیسہ لوٹنے والے کو جیل میں بھی شاہانہ لوازمات سے نواز دیا گیا ، ذرائع کا کہناہے کہ مجرم صفدر کو جیل کی بی کیٹگری الاٹ کردی گئی، جیل میں اے اور بی کیٹگری ایگزیکٹو کلاس کہلاتی ہے۔

قیدی محمد صفدر جیل کوٹھری میں نہیں بلکہ ایئرکنڈیشنڈ کمرے میں رہیں گے، جہاں انہیں ریفریجریٹر کی سہولت سمیت دیگر ایگزیکٹو سہولیات بھی میسر ہوں گی جبکہ ان سے ملاقات کرنے میں بھی آسانی ہوگی

خیال رہے کہ جمعہ کو مجرم نوازشریف اور ان کی مجرمہ بیٹی مریم نواز اگر پاکستان واپس آنے پر گرفتار ہوتے ہیں تو قوم کا اربوں روپے لوٹنے والوں کو بھی شاہی جیل میں رکھا جائے گا۔

آج صبح قومی احتساب بیورو (نیب) کی ٹیم نے مسلم لیگ ن کی رہنما مریم نواز کے شوہر کیپٹن (ر) صفدر کو احتساب عدالت میں پہنچایا جہاں انہیں جج محمد بشیر کے روبرو پیش کیا گیا۔

مزید پڑھیں : احتساب عدالت نے کیپٹن (ر) صفدر کو اڈیالہ جیل بھیج دیا

پیشی کے بعد احتساب عدالت نے انہیں اڈیالہ جیل بھیجنے کا حکم جاری کردیا جس کے بعد کیپٹن صفدر کو بکتر بند گاڑی میں اڈیالہ جیل منتقل کردیا گیا تھا۔

یاد رہے کہ نیب نے ان کی گرفتاری کے لیے ایبٹ آباد میں واقع ان کے گھر پر چھاپہ مارا تاہم وہ نیب کی ٹیم کو چکمہ دے کر راولپنڈی پہنچے اور ن لیگ کی ریلی کی قیادت کرنے لگے اور 3 گھنٹے تک راولپنڈی کی سڑٖکوں پر جلوس نکالتے رہے اور تقاریر کرتے رہے، اس دوران پولیس نے انہیں گرفتار کرنے کی کوشش کی لیکن ن لیگ کے کارکنوں نے مزاحمت کر کے پولیس کو گرفتار کرنے سے روک دیا۔

بعد ازاں نیب کی ٹیم نے حتمی کارروائی کرتے ہوئے انہیں گرفتار کرلیا تھا۔

خیال رہے کہ 6 جولائی کو احتساب عدالت نے سابق وزیر اعظم نواز شریف، ان کے صاحبزادوں حسن اور حسین نواز، ان کی صاحبزادی مریم نواز اور داماد کیپٹن (ر) صفدر کے خلاف ایون فیلڈ ریفرنس کا فیصلہ سناتے ہوئے نواز شریف کو 10 سال، مریم نواز کو 7 سال اور کیپٹن صفدر کو 1 سال قید کی سزا سنائی تھی۔

نواز شریف پر 80 لاکھ پاؤنڈز جبکہ مریم نواز پر 20 لاکھ پاؤنڈز کا جرمانہ بھی عائد کیا گیا تھا۔

عدالتی فیصلے میں مریم نواز اور کیپٹن صفدر کو 10 سال تک کسی بھی عوامی عہدے کے لیے بھی نااہل قرار دے دیا گیا ہے۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

جولائی 9, 2018
12 سو سے زائد کم عمر خواتین جیلوں میں قید

اسلام آباد: سپریم کورٹ میں خواتین کی جیلوں میں ابتر صورتحال سے متعلق کیس میں عدالت کو بتایا گیا کہ 19 سو 55 خواتین جیلوں میں قید ہیں جس میں کم عمر قیدیوں کی تعداد 12 سو 25 ہے۔

تفصیلات کے مطابق سپریم کورٹ میں خواتین کی جیلوں میں ابتر صورتحال سے متعلق کیس کی سماعت ہوئی۔

سماعت میں نمائندہ محتسب نے عدالت کو بتایا کہ پاکستان میں 98 جیلیں ہیں۔ جیلوں میں 56 ہزار سے زائد قیدیوں کی گنجائش ہے جبکہ 78 ہزار 1 سو 60 قیدی جیلوں میں موجود ہیں۔

نمائندہ محتسب کے مطابق سزا یافتہ قیدیوں کی تعداد 25 ہزار 1 سو 95 ہے، 48 ہزار 7 سو 80 قیدیوں کے مقدمات انڈر ٹرائل ہیں۔

نمائندے نے بتایا کہ 19 سو 55 خواتین جیلوں میں قید ہیں، کم عمر قیدیوں کی تعداد 12 سو 25 ہے۔

چیف جسٹس نے کہا کہ جیلوں میں جرائم پیشہ افراد کے ساتھ خواتین کا رہنا نا مناسب ہے، ’میں نے جیل میں دیکھا بچیاں بھی رہ رہی ہیں، منشیات لینے والی خواتین بھی بچوں کے ساتھ رہ رہی ہیں‘۔

انہوں نے کہا کہ اسلام آباد میں جیل بنانے کے لیے کوئی اقدامات نہیں کیے گئے۔ اسلام آباد جیل بنانے کے لیے ابھی تک دیوار ہی کھڑی ہے۔

چیف جسٹس نے جیل اصلاحات سے متعلق رپورٹ پر صوبائی حکومتوں سے 4 دن میں جواب طلب کرتے ہوئے کیس کی مزید سماعت 11 جولائی تک ملتوی کردی۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

جولائی 3, 2018
دبنگ سلمان خان کوایک رات اور جیل میں گزارنا پڑے گی

جودھ پور: بھارتی اداکارسلمان خان کی ضمانت کی درخواست پر فیصلہ محفوظ کرلیا گیا ، جس کے بعد سلمان خان کو ایک رات اور جیل میں گزارنا پڑے گی۔

تفصیلات کے مطابق بالی ووڈ ٹائیگر ہرن کے شکار پر سلاخوں کے پیچھے چلے گئے، جودھ پور کی سیشن عدالت میں سلمان خان کی درخواست ضمانت پر سماعت ہوئی، عدالت نے ضمانت کی درخواست پر فیصلہ محفوظ کرلیا اور سماعت کل تک ملتوی کردی۔

سلمان خان کی درخواست ضمانت پر فیصلہ کل سنایا جائے گا جبکہ وکیل سلمان خان کا کہنا تھا کہ سلمان خان کےخلاف گواہ قابل بھروسہ نہیں ہیں۔

گذشتہ روز جودھ پور کی عدالت نے 20 سال بعد نایاب ہرن کیس میں سلمان خان کو مجرم قرار دے کر پانچ سال قید اوردس ہزارروپے جرمانہ کی سزا سنائی تھی، جس کے بعد انھیں کمرہ عدالت سے گرفتار کر لیا گیا تھا جبکہ عدالت نے دیگر نامزد ملزمان سیف علی خان،سونالی باندرے،تبواورنیلم کوبری کردیا تھا۔

مزید پڑھیں : نایاب کالے ہرن کا شکار کیس، سلمان خان کو 5 سال قید کی سزا

بالی ووڈ دبنگ خان نے رات جودھ پور کی جیل میں گزاری، جہاں ان کا قیدی نمبر ایک سو چھ تھا، جیل میں سلمان خان کےساتھی خطرناک مجرم ہیں۔

جیل میں وکیل نے سلمان خان سے ملاقات بھی کی جبکہ سلمان سے ملنے دونوں بھائی جودھ پورپہنچ گئے ہیں۔

دبنگ خان کی سزا پر مداح غم وغصے سے بھڑک اٹھے اور سوشل میڈیاپرشورمچ گیا جبکہ ساتھی اداکاروں نے فیصلے پر افسوس کا اظہارکیا اور کہا سلمان خان کی سماجی خدمات دیکھتےہوئےسزا کم ہونی چاہیے۔

خیال رہے 1998 میں سلمان خان سلمان خان کے خلاف نایاب کالےہرن کےشکاراوراسلحہ ایکٹ کے تحت مقدمات درج کئے گئے تھے جبکہ دیگر افراد اداکار سیف علی خان،اداکارہ تبو اور سونالی باندرے پربطورشریک ملزم مقدمات تھے۔

واضح رہے کہ سلمان خان پر الزام تھا کہ انیس سو اٹھانوے کی فلم ‘ہم ساتھ ساتھ ہیں’ کی شوٹنگ کے دوران جودھ پور میں نایاب کالے ہرن کا شکار کیا تھا ، شکار کے لئے استعمال ہونے والا اسلحہ بھی غیر قانونی تھا۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

اپریل 6, 2018
پاکستان نے کلبھوشن کی اہلیہ اور والدہ کو 25 دسمبر کو ملاقات کی اجازت دیدی

اسلام آباد : پاکستان نے بھارتی جاسوس کلبھوشن کی اہلیہ اور والدہ کو 25 دسمبر کو ملاقات کی اجازت دیدی، ملاقات میں ایک بھارتی سفارتکاربھی موجود ہوگا۔

تفصیلات کے مطابق اسلام آباد میں ترجمان دفتر خارجہ ڈاکٹر فیصل نے ہفتہ وار بریفنگ دیتے ہوئے بتایا کہ پاکستان نے کلبھوشن کی اہلیہ اور والدہ کو 25 دسمبر کو ملاقات کی اجازت دیدی ، ملاقات میں ایک بھارتی سفارتکاربھی موجودہوگا، ملاقات سے متعلق بھارت کو آگاہ کردیا گیا ہے۔

ترجمان دفترخارجہ کا کہنا ہے کہ پاکستان نے افغانستان میں مقیم پاکستانیوں کو محتاط رہنےکی ہدایت کی ہے ، پاکستانی افغانستان میں اغواکے خدشے کے پیش نظر احتیاط کریں، افغانستان میں مقیم پاکستانی سفارتخانے میں رجسٹریشن کرائیں۔

ڈاکٹر فیصل نے امریکی صدر کے فیصلے کے حوالے سے کہا کہ امریکا کے بیت المقدس سفارتخانہ منتقل کرنے پرتشویش ہے۔

مقبوضہ کشمیر میں جاری بھارتی جارحیت سے متعلق ترجمان کا کہنا تھا کہ مقبوضہ کشمیر میں رہائشی کمپاؤنڈ کی تباہی کی مذمت کرتےہیں، عالمی برادری کشمیریوں پربھارتی مظالم بند کرائے۔

ایل او سی پر بھارتی اشتعال انگیزی کے حوالے سے ترجمان دفتر خارجہ نے کہا کہ بھارت نے2017میں ایل اوسی کی 1300بارخلاف ورزی کی، 2017میں بھارتی خلاف ورزیوں میں 52 شہادتیں ہوچکی ہیں۔

مزید پڑھیں : انسانی ہمدردی:‌ کلبھوشن کی اہلیہ کو ملاقات کی پیش کش

پرنس کریم آغا خان کی پاکستان آمد پر دفترخارجہ کے ترجمان نے کہا کہ پرنس کریم آغا خان پاکستان کے دورے پر ہیں، پرنس کریم آغا خان وزیر اعظم،صدر سےملاقات کریں گے۔

ڈاکٹر فیصل کا کہنا تھا کہ پاکستان ایک مرتبہ پھر او پی سی ڈبلیو کا رکن منتخب ہوگیاہے، پاکستان کا یونیڈوکی پالیسی کونسل کارکن منتخب ہوناایک اعزاز ہے۔

دفترخارجہ کے ترجمان نے کہا کہ پاکستان سعودی عرب پرتیسرے میزائل حملے کی مذمت کرتاہے، یمنی قوتیں سعودی عرب پر حملے سے باز رہیں۔

ترجمان کا کہنا تھا کہ ڈرون حملوں پرہماری پالیسی میں کوئی تبدیلی نہیں ہوئی،جیمزمیٹس نے پاکستان کی مسلح افواج کی پیشہ ورانہ مہارت کوسراہا۔

ڈاکٹر فیصل نے مزید کہا کہ سی پیک ابھی تک پاکستان اور چین کاباہمی منصوبہ ہے، کسی تیسرے ملک کی شمولیت کا فیصلہ پاکستان اور چین ملکر کرینگے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

دسمبر 8, 2017
رکن قومی اسمبلی جمشید دستی کو 14دن کے جوڈیشل ریمانڈ پر جیل بھیج دیاگیا

اسلام آباد : رکن قومی اسمبلی جمشید دستی کوچودہ دن کے جوڈیشل ریمانڈ پرجیل بھیج دیاگیا ، نہر زبردستی کھولنے پر مقدمہ درج کیا گیا تھا۔

تفصیلات کے مطابق رکن قومی اسمبلی جمشید دستی کو گرفتار کرکے جیل بھیج دیا گیا، آٹھائیس مئی کو کسانوں کے احتجاج کے موقع پر جمشید دستی نے ڈنگہ نہر کو زبردستی کھول دیا تھا، جس پر وزیر آبپاشی پنجاب نے ان کے خلاف مقدمہ درج کرنے کا حکم دیا تھا۔

مظفرگڑھ پولیس نے رات گئے جمشید دستی کو گرفتار کرکے مجسٹریٹ کے سامنے پیش کیا، جس کے بعد جمشید دستی کو چودہ روزہ جوڈیشل ریمانڈ پر جیل بھیج دیا گیا۔

مزید پڑھیں : رکن قومی اسمبلی جمشید دستی گرفتار

دوسری جانب آئل ٹینکرزایسوسی ایشن نے جمشید دستی کی گرفتاری پر ملک بھر میں سپلائی بند کرنے کی دھمکی دے دی ہے، ایسوسی ایشن کے صدر فیض اللہ آفریدی نے کہا ہے کہ 24 گھنٹے میں جمشید دستی کو رہا نہ کیا گیا تو ملک بھر میں احتجاج کریں گے اور گرفتاری کے خلاف ملک بھر میں تیل کی سپلائی بند کردیں گے۔

یاد رہے کہ جمشید دستی مظفر گڑھ کے حلقہ این اے 178 سے گزشتہ دو انتخابات سے کامیاب ہوتے آرہے ہیں ، انہوں نے 2010 میں بی اے کی جعلی ڈگری کا الزام لگنے پر نیشنل اسمبلی سے استعفیٰ دے دیا تھا۔

بعد ازاں عدالتی احکامات کے بعد جمشید دستی نے دوبارہ ضمنی انتخابات میں حصہ لیا اور کامیاب ہوکر اسمبلی تک پہنچے، جمشید دستی نے 2012 میں پیپلزپارٹی سے علیحدگی کا اعلان کردیا تھا۔

اپریل 2013 میں جمشید دستی پر جعلی ڈگری کا الزام ثابت ہونے کے بعد الیکشن کمیشن کی جانب سے تین سال کی پابندی اور پانچ ہزار روپے جرمانے کی سزا سنائی گئی تھی تاہم انہوں نے سپریم کورٹ میں فیصلے کے خلاف پٹیشن بھی دائر کی تھی۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں ۔

جون 9, 2017
متحدہ لندن رہنما حسن ظفر عارف رہا

کراچی: ایم کیو ایم لندن کے رہنما اور سینئر پروفیسر ڈاکٹر حسن ظفر عارف کو سینٹرل جیل سے رہا کردیا گیا۔

تفصیلات کے مطابق 22 اگست کے بعد بانی ایم کیو ایم کی حمایت میں کھڑے ہونے والے پروفیسر کو گزشتہ برس اکتوبر کی 22 تاریخ کو کراچی پریس کلب کے باہر سے کنور خالد یونس کے ہمراہ گرفتار کیا گیا تھا۔

بعد ازاں پریس کلب میں موجود تیسرے رہنما امجد اللہ کو بھی حراست میں لے کر تفتیش کے لیے نامعلوم مقام منتقل کیا گیا تھا اور قانون نافذ کرنے والے اداروں نے تینوں کو ایم پی او کے تحت سینٹرل جیل منتقل کردیا تھا۔

پڑھیں: ’’ متحدہ لندن کے رہنما حسن ظفر اور کنور خالد پریس کلب سے زیر حراست ‘‘

کنور خالد یونس کو طبیعت ناسازی کے باعث پہلے رہا کردیا گیا تھا جبکہ دوسرے رہنما امجد اللہ امجد کو گزشتہ ہفتے رہا کیا گیا اور انہوں نے رہائی کے فوری بعد سیاست سے کنارہ کشی اختیار کرنے کا اعلان بھی کیا۔

پروفیسر حسن ظفر عارف اور امجد اللہ امجد پر اشتعال انگیز اور ملک مخالف تقاریر میں سہولت کاری کا الزام تھا اور اُن کا مقدمہ انسداد دہشت گردی کی عدالت میں زیر سماعت تھا۔

قبل ازیں متحدہ لندن کے رہنما کو عدالتی احکامات پر رہائی دی گئی تھی تاہم سینٹرل جیل کے باہر سے قانون نافذ کرنے والے اداروں نے دوبارہ گرفتار کر کے پولیس کی تحویل میں دے دیا تھا۔

یہ بھی پڑھیں: ایم کیو ایم وہی ہے جس کے ساتھ قائد تحریک ہیں،ڈاکٹر حسن ظفر

گزشتہ ہفتے عدالت سے ضمانت ملنے کے بعد پروفیسر حسن ظفر عارف کی رہائی کے احکامات جاری کردیے گئے تھے مگر کچھ قانونی پہلو کے باعث رہائی ممکن نہیں ہو پائی تھی تاہم آج قانونی نکات کو پورا کر کے پروفیسر حسن ظفر عارف کو رہا کردیا گیا۔

دوسری جانب اطلاعات ہیں کہ حیدرآباد سے گرفتار ہونے والے ایم کیو ایم لندن کے رہنما مومن خان مومن کو بھی رہا کردیا گیا ہے۔

خیال رہے کہ 22 اگست کی متنازع تقریر کے بعد ڈاکٹر فاروق ستار کی جانب سے اظہار لا تعلقی اور اپنی راہیں جدا کرنے کے بعد ایم کیو ایم لندن کی جانب سے بنائی گئی نئی رابطہ کمیٹی میں ڈاکٹر حسن عارف ظفر اور کنور خالد یونس کو اہم ذمہ داری دی گئی تھی اور ایم کیو ایم لندن کی پہلی پریس کانفرنس بھی ڈاکٹر حسن ظفر کی سربراہی میں کی گئی تھی۔

اپریل 18, 2017
ہماری جدوجہد پاکستان کے لیے ہے، روف صدیقی

کراچی: ایم کیو ایم پاکستان کے حال ہی میں جیل سے رہائی پانے والے رہنماء اور رکن صوبائی اسمبلی رؤف صدیقی نے کہا ہے کہ 22 اگست کو جو ہوا وہ نہیں ہونا تھا، ہماری سیاست پاکستان کی بقاء کے لیے ہے۔

ان خیالات کا اظہار انہوں نے اے آر وائی نیوز کے پروگرام الیونتھ آر میں میزبان وسیم بادامی کے ساتھ خصوصی گفتگو میں کیا۔ رؤف صدیقی کا کہنا تھا کہ میں بے گناہ تھا اُس کے باوجود جیل میں 117 دن قید کے گزارے۔

ایم کیو ایم پاکستان کے رکن اسمبلی نے کہا کہ جیل میں موجود دیگر رہنماء بھی پاکستان مخالف نعروں کی حمایت میں نہیں ہیں، حب الوطنی کے معاملے پر کوئی سمجھوتا نہیں ہوسکتا، آج سے 100 سال بعد بھی اگر یہی رویہ رہا تو میں ایسے شخص کے ساتھ نہیں چل سکتا۔

رؤف صدیقی نے کہا کہ ’’میں اور وسیم اختر ایک ہی سیل میں موجود تھے، وہ میئر کراچی کی حیثیت سے اسیری کے باوجود کام کررہے ہیں‘‘۔ انہوں نے کہا کہ جیل میں دیگر قیدیوں کے ساتھ ہونے والے سلوک کی آواز ہر فورم پر اٹھاؤں گا۔

پڑھیں: رؤف صدیقی ضمانت پر رہا،پی آئی بی میں پُرتپاک استقبال

بانی ایم کیو ایم کے را سے تعلقات کے حوالے سے پوچھے گئے سوال کے جواب میں روف صدیقی نے کہا کہ ’’گزشتہ ایک سال قبل میں بانی تحریک کے ساتھ تھا کہ اسکاٹ لینڈ یارڈ سے متعلق خبریں ٹی وی پر آنی شروع ہوئیں تو میں نے اُن سے اس حوالے سے دریافت کیا۔

متحدہ پاکستان کے رہنماء نے کہا کہ بانی ایم کیو ایم نے انکشاف کیا کہ اسکاٹ لینڈ یارڈ نے جس شخص کو بھی گرفتار کیا اُس نے سارا ملبہ مجھ پر ہی ڈال دیا۔

جیل میں گزارے گئے دنوں اور دیگر رہنماؤں کے حوالے سے پوچھے گئے سوال کے جواب میں رؤف صدیقی نے کہا کہ ’’ہر جگہ کی علیحدہ بات ہوتی ہے جیل میں قید کا ایک دن صدی کے برابر ہوتا ہے تاہم میں نے اللہ کی رضا کے لیے جھوٹے مقدمات بنانے والے و دیگر افراد کو معاف کردیا ہے‘‘۔

نومبر 3, 2016
افغانستان میں جیل پر طالبان کا حملہ، دس پولیس اہلکار جاں بحق

کابل : افغان طالبان نے جیل پر خود کش حملہ کر کے اپنے تین سو پچاس قیدی چھڑوالئے، جبکہ حملے میں دس اہلکار بھی مارے گئے۔

افغانستان سے موصول ہونے والی ابتدائی خبروں کے مطابق غزنی میں طالبان نے جیل پر خودکش حملہ کیا ہے، جس کے نتیجے میں جیل پولیس کے دس اہلکار جاں بحق ہو گئے ہیں ۔

ابتدائی اطلاعات میں کہا جارہا ہے کہ طالبان جیل میں قید اپنے ساڑھے تین سو سے زائد ساتھیوں کو چھڑا کر لے گئے ہیں۔

ذرائع کے مطابق صوبہ غزنی کے ڈپٹی صوبائی گورنر محمد علی احمدی نے بتایاکہ حملہ آور وں نے نہایت منظم انداز میں حملہ کیااوراُنہوں نے ملٹری کی یونیفارم پہن رکھی تھیں جبکہ ایک خودکش حملہ آور نے اپنے آپ کو جیل کے دروازے پر اڑالیا۔

جیل پر حملے کے دوران سیکیورٹی فورسز کی جوابی کارروائی کے دوران تین حملہ آور مارے گئے جبکہ سات پولیس اہلکار زخمی بھی ہیں ۔ جیل پر حملے کی ذمہ داری افغان طالبان کے ترجمان ذبیح اللہ مجاہد نے قبول کرلی۔

ستمبر 14, 2015
ایان کو ایک رات مزید جیل میں گزارنا ہوگی

لاہور: سپر ماڈل ایان علی منی لانڈرنگ کیس میں ضمانت کے باوجود ایک رات مزید جیل میں گزارنا پڑے گی۔

بینکنگ کورٹ کے عملے کو ایان کی رہائی کا حکم نامہ موصول نہ ہوسکا اور اوقات کار ختم ہونےپر عملہ اپنے گھر چلا گیا۔

لاہورہائی کورٹ کے دو رکنی بنچ نے ایان علی کی رہائی کے آرڈر جاری کردئیے۔

ایان علی کو 13 مارچ 2015 کو بینیظیر بھٹو انٹرنیشنل ایئرپورٹ کے لاوٗنج سے گرفتار کیا گیا تھااوران کے پاس سے پانچ لاکھ امریکی ڈالر برآمد ہوئے تھے۔

اس کے جواب میں سردار لطیف کھوسہ کا کہنا تھا کہ ایان نے بورڈنگ پاس نہیں لیا تھا اس لئے ان کے خلاف جرم ثابت نہیں ہوتا۔

جولائی 15, 2015