گوجرانوالہ : عوامی مسلم لیگ کے سربراہ شیخ رشید احمد نے کہا ہے کہ نواز شریف کو چودہ شہادتیں کبھی معاف نہیں کریں گی، عوامی مسلم لیگ کی تحریک نجات کامیاب ہوئی تو سب تحریکیں کامیاب ہوں گی۔
یہ بات انہوں نے گوجرانوالہ میں جلسہ عام سے خطاب کرتے ہوئے کہی، شیخ رشید احمد نے کہا کہ 2016ء حکومت کے جانے کا سال ہے۔ سانحہ ماڈل ٹاؤن کے ملزمان بیرون ملک بھاگنا شروع ہو گئے ہیں، حکومت نے سانحہ میں ملوث پولیس اہلکاروں کو بھگا دیا ہے۔
انہوں نے بتایا کہ موجودہ حکومت کے پانچ وزیر بہت جلد ملک سے جانے والے ہیں جن میں خواجہ آصف، عابد شیر علی اور خواجہ سعد رفیق بھی شامل ہیں، انہوں نے مطالبہ کیا کہ ان وزراء کے نام ای سی ایل میں ڈالے جائیں۔
عوامی مسلم لیگ کے سربراہ کا کہنا تھا کہ لڑائی کے وقت جو بھگوڑا بن جائے وہ جمہوریت کا غدار ہے۔ شیخ رشید نے کہا کہ وہ عمران خان کے ساتھ کھڑے ہیں، اگر ان پر برا وقت آیا توعمران خان انہیں شانہ بشانہ کھڑا پائیں گے۔
اگست اورستمبر فیصلہ کن مہینے ہیں اب وقت بتائے گا کہ کون سے شریف کی مدت ختم ہورہی ہے۔ عوامی مسلم لیگ کے سربراہ کہا کہ دہشت گردوں کا خاتمہ صرف رینجرز کرسکتی ہے لیکن بعض لوگ رینجرز کو رضاکار سمجھ کر بیان بازی کرتے ہیں حالانکہ رینجرز پاک فوج کا ہی حصہ ہے۔
اس سے قبل گوجرانوالہ میں عوامی تحریک کی ریلی میں شرکت کے موقع پر خواتین نے شیخ رشید کے ساتھ تصویریں بنوائیں۔
شیخ رشید کا کہنا تھا کہ جنگلہ حائل نہ ہوتا تو زیادہ اچھی تصویریں آتیں۔ کوئی کچھ بھی کہے خواتین میں بہت مقبول ہوں۔ یاد رہے کہ چند دن پہلے شیخ رشید کی ائیرہوسٹز کے ساتھ سیلفیاں بھی سوشل میڈیا پر بہت مقبول ہوئی تھیں۔
