کراچی : چیئرمین رویت ہلال کمیٹی مفتی منیب الرحمان نے کہا ہے کہ جمادی الاول سنہ 1442 ہجری کا چاند نظر نہیں آیا، یکم جمادی الاول جمعرات 17دسمبر کو ہوگی۔
جمادی الاول کا چاند دیکھنے کے لیے مرکزی رویت ہلال کمیٹی کا اجلاس کراچی میں ہوا جس کی صدارت مفتی منیب الرحمان نے کی۔ اجلاس میں زونل اور ضلعی رویت ہلال کمیٹیوں کے اراکین نے اپنے اپنے مقامات سے اجلاس میں شرکت کی۔
اجلاس کے بعد میڈیا سے گفتگو کرتے ہوئے مفتی منیب الرحمن نے بتایا کہ ملک کے کسی علاقے سے جمادی الاول کا چاند دیکھنے کی شہادت نہیں ملی ہے۔
انہوں نے کہا کہ موسم کی موجودہ صورتحال کے تحت اکثر مقامات پر مطلع ابر آلود تھا یا غبار آلود تھا جس کے باعث پاکستان بھر میں کسی بھی مقام سے رویت کی شہادت موصول نہیں ہوئی۔
ماہ جمادی الاول کی فضیلت
ماہ جمادی الاولیٰ اسلامی سال کا پانچواں قمری مہینہ ہے، یہ نہایت بزرگ اورفضیلت والا مہینہ ہے، اس ماہ مبارک میں بھی عبادت کی خاص فضیلت بیان کی گئی ہے جس کے صلے میں نیکیوں کا شمار کرنا ناممکن ہے۔
یہ مہینہ عربی زبان کے دولفظوں ’’جمادی‘‘اور’’الاولیٰ‘‘سے مرکب اور ان دو الفاظ کا مجموعہ ہے۔ جمادی کے معنی جم جانا، خشک ہونا ہے۔
عربی میں عین جمادی اس آنکھ کو کہا جاتا ہے جس سے آنسو نکلنا بالکل بند ہوچکے ہوں اور اولیٰ پہلی کو کہتے ہیں۔ یہ مہینہ ان دنوں میں واقع ہوا جن دنوں موسم سرما کی شدت کی وجہ سے پانی جمنے کا آغازہوتا ہے۔
