لاہور : پاکستان تحریک انصاف کے سابق رہنما جمشید اقبال چیمہ کو پولیس نے پھر حراست میں لے لیا، اس بات کی تصدیق ان کی اہلیہ مسرت جمشید چیمہ نے کی ہے۔
سماجی رابطے کی ویب سائٹ ٹوئٹر پر اپنے پیغام میں مسرت جمشید چیمہ نے بتایا ہے کہ جمشید اقبال چیمہ کو آج پھر گرفتار کر لیا گیا ہے۔
،مسرت جمشید چیمہ کا کہنا تھا کہ یہ گرفتاری پریس کانفرنس کرنے والوں کیلئے پیغام ہے کہ سیاست چھوڑ دیں تو بھی مال غنیمت والا سلوک ہوگا۔
جمشید اقبال چیمہ صاحب کو آج پھر گرفتار کر لیا گیا ہے. یہ دراصل پریس کانفرنس کرنے والوں کو پیغام ہے کہ آپ سیاست بھی چھوڑ دیں تو بھی آپ کے ساتھ مال غنیمت والا سلوک جاری رہے گا. ہمارا حق ہے کہ ہم سیاست سے کنارہ کشی اختیار کر لیں اور ہمیں اس سے بھی محروم رکھا جارہا ہے.
— Musarrat Cheema (@MusarratCheema) June 23, 2023
ان کا کہنا تھا کہ ہمارا حق ہے کہ سیاست سے کنارہ کشی اختیار کر لیں، پہلے بھی ہمارے ساتھ جیل میں جنگی قیدیوں والا سلوک روا رکھا گیا تھا۔
واضح رہے کہ گزشتہ ماہ 25مئی کو پی ٹی آئی کے سابق رہنما جمشید اقبال چیمہ اور سابق ترجمان پنجاب حکومت مسرت جمشید چیمہ نے نیشنل پریس کلب راولپنڈی میں مشترکہ پریس کانفرنس کرتے ہوئے پارٹی سے راہیں جدا کرنے کا اعلان کردیا تھا۔
ان کا کہنا تھا کہ ہم آج سے سیاست چھوڑ رہے ہیں اس لئے اب پی ٹی آئی سے بھی کوئی تعلق نہیں رہا، اس وقت جو پاکستان میں ہورہا ہے وہ قابل تحسین نہیں۔
