Tag: Japan

ٹوکیو: جاپانی شہزادی ماکو نے محل کا عیش و آرام ٹھکرا کر عام آدمی سے شادی کر لی۔

تفصیلات کے مطابق شہزادی ماکو نے آخر کار شاہی خاندان، رتبہ اور دولت ٹھکرا کر اپنے محبوب اور سابقہ ہم جماعت کیے کومورو سے شادی کر لی، کومورو سے ان کی ملاقات 2012 میں ٹوکیو کی ایک یونیورسٹی میں ہوئی تھی، جس کے بعد 2017 میں ان کی منگنی ہوئی تاہم شادی میں کئی رکاوٹیں درپیش تھیں۔

جاپانی قوانین کے تحت اگر شاہی خاندان کی کوئی خاتون رکن کسی عام آدمی سے شادی کرنے کا فیصلہ کرتی ہے تو اسے شاہی رتبے سے دست بردار ہونا پڑتا ہے، یہ قانون صرف شاہی خاندان کی خواتین پر لاگو ہوتا ہے، جب کہ مردوں کو اس سے استثنیٰ حاصل ہے۔

شاہی روایات کے مطابق جب شاہی خاندان کی کوئی خاتون رکن شادی کے بعد محل سے رخصت ہوتی ہے، تو اسے 13 لاکھ ڈالرز دیے جاتے ہیں، تاہم شہزادی ماکو نے شاہی خاندان سے ملنے والے 13 لاکھ ڈالرز کی رقم وصول کرنے سے بھی انکار کر دیا ہے، یوں وہ شاہی رتبے اور شادی پر ملنے والی دولت دونوں کو ٹھکرا دینے والی جاپان کے شاہی خاندان کی پہلی خاتون بن گئی ہیں۔

توقع ہے کہ شادی کے بعد یہ نوبیاہتا جوڑا امریکا منتقل ہو جائے گا جہاں کیے کومورو بطور وکیل کام کریں گے۔ دوسری طرف پرنسز ماکو نے، جنھوں نے حال ہی میں ٹوکیو یونیورسٹی کے میوزیم میں ریسرچر کی ملازمت چھوڑی ہے، اپنے مستقبل کے منصوبے سے متعلق کچھ نہیں بتایا ہے کہ وہ نیویارک میں کیا کریں گی۔

اس جوڑے کی نقل و حمل کو مقامی میڈیا میں بہت زیادہ کوریج دی جا رہی ہے، ان کی شادی کا برطانوی شہزادے ہیری اور میگھن مارکل کی زندگی سے بھی موازنہ کیا جا رہا ہے، اور دونوں کو ’جاپان کا ہیری اور میگھن‘ کہا جا رہا ہے۔

توقع ہے کہ یہ جوڑا جمعرات کو ایک نیوز کانفرنس کرے گا جہاں وہ اپنی شادی اور مستقبل کے پلان سے متعلق بیان دیں گے۔

ٹوکیو: ملکی اور غیر ملکی پروفیسرز اور طلبہ نے جاپان سے ویزے جاری کرنے کا مطالبہ کیا ہے۔

تفصیلات کے مطابق جاپان اور امریکا کے پروفیسرز اور طالب علم حکومتِ جاپان سے درخواست کر رہے ہیں کہ وہ طلبہ اور محققین کے لیے ویزوں کا اجرا بحال کرے۔

جاپان میں کرونا وائرس کی عالمگیر وبا کے باعث اس قسم کے ویزوں کا اجرا معطل کیا جا چکا ہے، تاہم جاپانی یونیورسٹیز کی ایک تنظیم نے نیویارک میں جاپان کے قونصلیٹ جنرل یامانواُچی کانجی کو جمعرات کے روز ایک درخواست پیش کر کے ویزوں کا اجرا بحال کرنے کا مطالبہ کر دیا ہے۔

اس درخواست پر امریکا اور جاپان کے تقریباً 650 پروفیسرز اور طلبہ نے دستخط کیے ہیں، درخواست میں کہا گیا ہے کہ تبادلہ پروگراموں کی معطلی سے بیرون ملک تعلیمی اداروں کے ساتھ تعلقات کو نقصان پہنچ رہا ہے۔

یونیورسٹیز کی تنظیم کی جانب سے یہ مؤقف بھی پیش کیا گیا ہے کہ غیر ملکی طالب علموں کی تعداد میں کمی سے جاپانی یونیورسٹیز کی بین الاقوامیت متاثر ہو رہی ہے۔

تنظیم کے نمائندے کا کہنا تھا کہ کچھ طالب علموں کو جاپانی یونیورسٹیز میں آن لائن کورسز میں شرکت کرنے کے لیے رات بھر جاگنا پڑ رہا ہے اور یہ ان کے لیے بہت زیادہ دباؤ کا باعث ہے۔

انھوں نے مزید کہا کہ کچھ طلبہ جو جاپان نہیں جا سکتے وہ تعلیم حاصل کرنے کے لیے دوسرے ممالک کا انتخاب کر رہے ہیں۔ واضح رہے کہ جاپانی حکومت اس عالمگیر وبا کے دوران فی الحال غیر ملکی طلبہ اور محققین کو ملک میں داخل ہونے کی اجازت نہیں دے رہی۔