Tag: Japan

ایٹم بم پر بننے والی ہالی ووڈ فلم ’اوپن ہائیمر‘ جاپان میں آخرکار 8 ماہ بعد 29 مارچ کو ریلیز کر دی گئی۔

کرسٹوفر نولان کی ہدایت کاری میں بننے والی فلم اوپن ہائیمر اس خدشات کے ساتھ ریلیز کی گئی تھی کہ ایٹم بم حملوں کا شکار ہونے والے دنیا کے واحد ملک میں اس پر کیسا ردعمل سامنے آئے گا۔

دوسری جنگ عظیم کے اختتام پر امریکا کے جوہری دھماکوں نے جاپان کے دو شہروں ہیروشیما اور ناگاساکی کو تباہ کر دیا تھا، جس میں 2 لاکھ سے زیادہ لوگ مارے گئے تھے، موضوع کی حساسیت کی وجہ سے جاپان میں 7 آسکر ایوارڈز جیتنے والی اس فلم کی ریلیز کو لے کر ڈسٹری بیوٹر گھبراہٹ کا شکار تھے۔

جوہری ہتھیاروں کی ایجاد کرنے والے امریکی سائنس دان جے رابرٹ اوپن ہائیمر کی زندگی پر مبنی اس فلم کو جاپانی فلم بینوں کی جانب سے ملا جلا اور انتہائی جذباتی ردعمل ملا ہے، فلم جاپان میں باکس آفس پر چوتھے نمبر پر رہی، ریلیز کے بعد پہلے تین دنوں میں فلم نے 38 لاکھ ین یا 25 لاکھ ڈالر کمائے۔

جاپانی ناظرین کی مختلف آرا میں ایک نمایاں رائے یہ تھی کہ فلم نے اوپن ہائیمر کی شخصیت پر بہت زیادہ توجہ مرکوز کی ہے اور جاپانی نقطہ نظر فلم سے مکمل طور پر غائب ہے، فلم کا مقصد اوپن ہائیمر کے اندر جاری نفسیاتی کشمکش تھا، فلم اس بات کی عکاسی نہیں کرتی کہ جب ہیروشیما اور ناگاساکی پر بم گرائے گئے تو زمین پر کیا ہوا۔

ایٹم بم دھماکوں سے بچ جانے والے 91 سالہ ترومی تاناکا کی عمر 13 سال تھی جب ناگاساکی پر بم گرایا گیا، انھوں نے بتایا کہ جب بم پھٹا تو وہ ایک چمکدار سفید روشنی کی لپیٹ میں آ گئے تھے، جو پھر نیلے، نارنجی میں تبدیل ہو گئی۔ تاناکا نے کہا یہ فلم لوگوں کو یہ سمجھنے میں مدد دے گی کہ جوہری ہتھیار رکھنے کا کیا مطلب ہے۔

ہیروشیما کے سابق میئر تاکاشی ہیراوکا نے جاپانی میڈیا کو بتایا کہ فلم میں جوہری ہتھیاروں کی ہولناکی کو خاطر خواہ طور پر پیش نہیں کیا گیا۔ امریکی سیاست میں مہارت رکھنے والے صوفیہ یونیورسٹی کے پروفیسر کازوہیرو میشیما نے اس فلم کو ’امریکی ضمیر‘ کا اظہار قرار دیا، اور کہا کہ جو لوگ جنگ مخالف فلم کی توقع رکھتے ہیں وہ مایوس ہو سکتے ہیں۔