Tag: jashan

کراچی: متحدہ قومی موومنٹ کے قائد الطاف حسین کا کہنا ہے کہ شہری سندھ کے عوام کااب یہ فیصلہ ہے کہ علیحدہ صوبے کے قیام کیلئے انہیں کتنی ہی جانی ومالی قربانیاں کیوں نہ دینی پڑیں وہ کسی بھی قربانی سے دریغ نہیں کریں گے۔

رابطہ کمیٹی پاکستان لندن ، دیگر شعبہ جات اور ونگز کے ارکان سے گفتگومیں الطاف حسین نے کہاکہ سندھ کی حکومتیں گزشتہ67 سال سے نظراندازکرتی چلی آئی ہیں۔

الطاف حسین نے عوام سے کہا کہ وہ علیحدہ صوبے کا بہتر سے بہتر نام تجویز کریں کیونکہ یہ ایم کیوایم کا نہیں بلکہ عوام کامطالبہ ہے۔

الطاف حسین کا کہنا تھا کہ متعصب حکمرانوں نے انیس سو تہتر کوٹہ سسٹم نافذ کرکے نئے صوبے کی بنیاد رکھی تھی، اسی لیے سندھ کے عوام کہہ رہے کہ جینے کا منصوبہ ہوگا ،جب چالیس فیصد والوں کا صوبہ ہوگا۔

ان کا کہنا تھا کہ علیحدہ صوبہ ایم کیوایم کا نہیں بلکہ عوام کا مطالبہ ہے، عوام ہی نئے صوبے کا نام بہتر تجویز کرسکتے ہیں۔

الطاف حسین نے کہا کہ سندھ کے شہری عوام کی جانب سےنئے صوبے کے قیام کی رائے سامنے آرہی ہے۔ صوبے کا نام کراچی صوبہ ہو،شہری صوبہ ہو،سندھ ون یا سندھ ٹو ہو یا کچھ اور عوام کی خواہش کا احترام کیا جائے۔

ان کا کہنا تھا کہ نئے صوبے کے قیام اور نام کے حوالے سے عوام اپنی آرا ایم کیوایم کی ویب سائٹ پر دے سکتے ہیں۔