Tag: jati umra

لاہور : وزیراعظم نواز شریف کی زیرصدارت اجلاس میں ترقیاتی منصوبوں کی رفتار کا جائزہ لیا گیا۔ جاتی عمرہ میں وزیر اعظم نواز شریف کی زیر صدارت اجلاس میں وزیر اعلٰی شہباز شریف سمیت اعلیٰ حکام شریک ہوئے۔

اجلاس میں پنجاب میں جاری مختلف ترقیاتی منصوبوں پر غور کیا گیا۔ اجلاس سے خطاب کرتے ہوئے وزیراعظم نوازشریف نے کہا کہ صوبے بھر میں جاری ترقیاتی منصبوں کو ترجیحی بنیادوں پر مکمل کیا جائے اور صوبائی حکومت وسط اور طویل مدتی منصوبوں پر بیک وقت کام جاری رکھے۔

اس موقع پر وزیر اعلیٰ شہباز شریف نے وزیر اعظم کو ترقیاتی منصوبوں کے حوالے سے بریفنگ دی۔ انہوں نے بتایا کہ پنجاب بھر میں صحت، تعلیم، صاف پانی کی فراہمی اور سڑکوں کی تعمیر سمیت متعدد منصوبے جاری ہیں۔

وزیراعظم نواز شریف نے صوبے بھر میں ترقیاتی کاموں پر وزیراعلیٰ پنجاب کی کاوشوں کو سراہا۔ دوران اجلاس بلدایاتی انتخابات کے حوالے سے ٹکٹوں کی تقسیم پر بھی بات چیت کی گئی جس پر وزیراعلیٰ پنجاب شہبازشریف نے کہا کہ صوبے میں زیادہ تر ٹکٹیں پارٹی کے پرانے کارکنوں کو دی گئیں ہیں ۔

اجلاس میں محرم الحرام میں امن و امان کی صورتحال کو برقرار رکھنے اور صوبے میں جاری ترقیاتی منصوبوں سے متعلق بھی وزیراعظم کو بریفنگ دی گئی جس پر وزیراعظم نے اطمینان کا اظہار کیا۔

اجلاس میں وفاقی وزیر ریلوے سعد رفیق ، احسن اقبال،رانا ثنااللہ سمیت دیگر کئی رہنماﺅں نے شرکت کی ۔