کراچی: سلمان اقبال فلمز، اے آروائی فلمز اور سکس سگما پلس کی مشترکہ پیشکش فلم ’جوانی پھر نہیں آنی ٹو‘ آج پاکستان سمیت دنیا بھر میں ریلیز کی جائے گی۔
تفصیلات کے مطابق فلم ’جوانی پھر نہیں آنی ٹو‘ پاکستان سمیت دنیا بھر میں آج ریلیز کی جائے گی، فلم کے دو گانوں اور ٹریلر نے پہلے ہی دھوم مچا رکھی ہے۔ جوانی پھر نہیں آنی ٹو کی کہانی واسع چوہدری نے لکھی ہے جبکہ اس کی ہدایات ندیم بیگ دے رہے ہیں۔
فلم کی کاسٹ میں ہمایوں سعید، فہد مصطفی، کبریٰ خان، ماورا حسین، احمد علی بٹ، واسع چوہدری، ثروت گیلانی اور عظمیٰ خان شامل ہیں۔
واضح رہے کہ گزشتہ روز فلم جوانی پھر نہیں آنی ٹو کا پریمیئر کراچی کے مقامی سنیما میں سجایا گیا، جہاں فلمی ستاروں نے شرکت کی تھی۔
مزید پڑھیں: فلم ’جوانی پھر نہیں آنی ٹو’ کا کراچی میں رنگا رنگ پریمیئر
اس موقع پر فلمی ستاروں کا کہنا تھا کہ امید ہے فلم شائقین کو بے حد پسند آئے گی، فلم کے ڈائریکٹر ندیم بیگ کا کہنا تھا کہ پارٹ ون کی طرح جوانی پھر نہیں آنی کا دوسرا پارٹ بھی کامیڈی سے بھرپور ہے، فلم کی شوٹنگ پاکستان سمیت تین ممالک میں کی گئی ہے۔
فلم کا گانا ’عشق ہوا جو طاری‘ جاری کیا گیا تھا، گانے کی گلوکارہ کوئی اور نہیں بلکہ مقبول ترین گلوکارہ مومنہ مستحسن ہیں، گانے کی شاعری شکیل سہیل جبکہ موسیقی ساحر علی بگا نے ترتیب دی ہے۔
خیال رہے کہ یہ 2015 کی مقبول ترین فلم جوانی پھر نہیں آنی جس کے ٹریلر اور گانے فلم کی ریلیز سے قبل ہی مقبولیت کے ریکارڈ قائم کررہے ہیں، چند روز قبل ہی ایک اور گانا ’آیا لاڑیے‘ ریلیز کیا گیا تھا، جس نے آتے ہی ناظرین کے دل جیت لیے تھے۔
