Tag: Jeddah Municipality

جدہ : سعودی عرب کی جدہ میونسپلٹی نے گلیوں اور محلوں میں غیر قانونی طور پر پارک کیے گئے ہزاروں ٹرک اپنے قبضے میں لے لئے، ٹرکوں کے مالکان پر جرمانے عائد کردیے گئے۔

تفصیلات کے مطابق سعودی عرب میں جدہ میونسپلٹی نے شہر کے مختلف علاقوں میں چھاپے مار کر3100 ٹرک اپنے قبضے میں لے لیے۔ یہ ٹرک غیر منظم طریقے سے اور بغیر اجازت مختلف مقامات پر کھڑے کیے جارہے تھے، سرکاری پلاٹس پر بلااجازت پارک کیے گئے تھے۔

سعودی ذرائع ابلاغ کے مطابق جدہ میونسپلٹی کے افسران سال رواں کے آغاز سے پورے شہر میں نقل و حمل کے قوانین و ضوابط کی خلاف ورزیوں کا سختی سے نوٹس لے رہے ہیں۔ شہر کے منظر کو بدنما بنانے والے ٹرکوں اور گاڑیوں سے صاف کرنے میں لگے ہوئے ہیں۔

اس حوالے سے سیکریٹری میئر محمد الزہرانی نے بتایا کہ ٹرکوں کے مالکان پر جرمانے لگادیے گئے، یہ متعدد خلاف ورزیوں کے مرتکب پائے گئے تھے، پبلک مقامات اور رہائشی محلوں میں ٹرک پارک کیے گئے تھے، اس کی انہیں اجازت نہیں تھی۔

ٹرک گندا پانی ایسے مقامات پر پھینک رہے تھے جہاں انہیں ایسا کرنے کی ممانعت ہے۔ ٹرکوں سے فضلہ ایسی جگہوں پر ڈالا جارہا تھا جو اس کے لیے مخصوص نہیں۔ اس عمل سے جدہ کےباشندوں کو نقصان بھی پہنچ رہا تھا اور پریشانی بھی ہورہی تھی۔

الزہرانی نے مقامی شہریوں اور مقیم غیرملکیوں سے اپیل کی کہ اگر وہ ان خلاف ورزیوں میں سے کسی ایک کامشاہدہ کریں تو 940یا سمارٹ فونز پر بلدی ایپلی کیشن کے ذریعے مطلع کریں۔

سیکریٹری میئر نے کہا کہ مقامی شہریوں اور مقیم غیرملکیوں کے تعاون کے بغیر جدہ شہر کو خوبصورت نہیں رکھا جاسکتا۔