ریاض: سعودی عرب کے شہر جدہ میں منعقد ہونے والے عالمی فٹبال میچ کو دیکھنے کے لیے ہزاروں کی تعداد میں خواتین اسٹیڈیم پہنچیں۔
تفصیلات کے مطابق سعودی حکومت کی جانب سے دو برس قبل خواتین کے اسٹیڈیم جاکر میچ دیکھنے پر پابندی ختم کی گئی تھی جس کے بعد انہوں نے پہلی بار 2017 میں اپنے محرم کے ساتھ مقامی ٹیموں کے مابین کھیلا جانے والا میچ گراؤنڈ میں جاکر دیکھا تھا۔
سعودی گزیٹ کی رپورٹ کے مطابق جدہ کے کنگ عبداللہ اسٹیڈیم میں عالمی ٹیموں کے مابین فٹبال میچ کا انعقاد بدھ کے روز کیا گیا جس کو دیکھنے کے لیے 15 ہزار سے زائد خواتین گراؤنڈ پہنچیں اور انہوں نے انگلوژر میں بیٹھ کر میچ دیکھا۔
سپر کراؤن کپ کے سلسلے میں اٹلی اور میلان کی ٹیموں کے مابین میچ کھیلا گیا جس میں بین الاقوامی شہرت یافتہ فٹبالرز نے حصہ لیا، سعودی عرب کی تاریخ میں عالمی مقابلے کا انعقاد کیا گیا۔ میچ کا واحد گول نامور فٹبالر کرسٹیانو رونالڈو نے 61 ویں منٹ میں کیا۔
مزید پڑھیں: سعودی حکام نے سرکاری ٹی وی پر خاتون نیوز کاسٹر متعارف کروا دی
سعودی میڈیا کے مطابق خواتین کی اسٹیڈیم آمد پر انتظامیہ کی جانب سے محرم یا پردے کی شرط عائد نہیں کی گئی تھی، ہزاروں کی تعداد میں خواتین نے فٹبال میچ دیکھ کر خوشی کا اظہار کیا۔
جدہ میں منعقد ہونے والے سپر کپ فٹ بال کے فائنل میچ میں 62ہزار تماشائی اسٹیڈیم میں موجود تھے جن میں 15ہزار سے زائد خواتین بھی شامل تھیں۔
خواتین شرکاء نے بین الاقوامی فٹبال میچ دیکھنے پر مسرت کا اظہار کرتے ہوئے اس روز کو اپنے لیے تاریخی قرار دیا۔ عرب میڈیا سے گفتگو کرتے ہوئے 20 سالہ ایدہ کا کہنا تھا کہ ’یہ میری زندگی کا سب سے خوشگوار لمحہ ہے کہ میں اپنی بہنوں کے ساتھ اسٹیڈیم میں بیٹھ کر میچ دیکھ رہی ہوں‘۔
عقیلہ الحمادی نامی خاتون کا کہناتھا کہ وہ صرف رونالڈو کی بہت بڑی مداح ہیں اور انہیں ہی دیکھنے کے لیے اپنے بچوں کے ساتھ اسٹیڈیم آئیں تھیں۔ اُن کا کہنا تھا کہ ’کرسٹیانو کو دیکھ کر بہت خوشی ہوئی، یہ میرا ایک خواب تھا جو حقیقت میں تبدیل ہوگیا‘۔
یہ بھی پڑھیں: اٹھارہ سالہ تلیدہ تمر سعودی عرب کی پہلی سپر ماڈل
یاد رہے کہ سعودی حکومت وژن 2025 کے تحت مسلسل روشن خیالی کی طرف گامزن ہے، اس ضمن میں خواتین کو نہ صرف خود مختار بنایا جارہا ہے بلکہ انہیں ملازمتوں کے مواقع بھی فراہم کیے جارہے ہیں۔
یہ بھی یاد رہے سعودی فرماں رواں شاہ سلمان بن عبد العزیز نے ایک سال قبل خواتین کو ڈرائیونگ کی اجازت دی تھی جس کے بعد بڑی تعداد میں خواتین نے ڈرائیونگ لائسنس بھی بنوایا۔
واضح رہے کہ گزشتہ برس 5 اکتوبر میں سعودی حکومت نے روشن خیالی میں ایک اور قدم آگے بڑھاتے ہوئے سرکاری چینل پر میوزک کنسرٹ نشر کیا تھا جبکہ دسمبر 2018 میں پہلی بار سعودی عرب میں میوزیکل کنسرٹ کا انعقاد بھی کیا گیا تھا۔
