کراچی : پاپوش نگر میں تالا توڑ گروپ نے جیولری کی دکان لوٹ لی، چور لاکھوں مالیت کا سونا لے کر فرار ہوگئے، گلشن اقبال پولیس نے کارروائی کرکے اسٹریٹ کرمنل کو گرفتار کرلیا۔
تفصیلات کے مطابق کراچی کے علاقے پاپوش نگرصرافہ مارکیٹ میں ڈاکوؤں نے جیولری کی دکان کا صفایا کردیا، چار افراد صبح چھ بج کر بتیس منٹ پر تالے توڑ کر دکان میں گھسے اور کروڑوں روپے مالیت کا سونا اور زیورات کے لاکر اٹھا کر با آسانی فرار ہو گئے۔
سی سی ٹی وی فوٹیج میں ملزمان کو تالے توڑتے دیکھا جاسکتا ہے، دکانداروں کا کہنا ہے مارکیٹ میں کوئی چوکیدارنہیں ہے، پولیس بھی مارکیٹ کے اطراف گشت نہیں کرتی، جس کی وجہ سے آئے دن وارداتیں معمول بن گئیں ہیں۔
دوسری جانب گلشن اقبال پولیس نے کامیاب کارروائی کرکے رہزنی کی متعدد وارداتوں میں ملوث اسٹریٹ کرمنل گرفتار کرلیا، گرفتارملزم2012سے لوٹ مار کی وارداتوں میں ملوث ہے۔
پولیس کا کہنا ہے کہ ملزم نے گلشن اقبال ، مبینہ ٹاؤن، گلستان جوہراور ایف بی ایریا میں وارداتیں کیں، اس کے علاوہ پاکستان بازار پولیس نے چھاپہ مار کر ملزم کو گرفتار کرکے اسلحہ برآمد کرلیا، ملزم عالم عرف کالا قتل اورپولیس مقابلوں میں مطلوب ہے۔
