کراچی: سنہ 2004 میں کور کمانڈر حملہ کیس میں ملوث کالعدم تنظیم کےدہشت گردوں کی سزاکے خلاف اپیل کی سماعت ہوئی‘ جسٹس خادم حسین نے ملزمان کے وکیل کو پوری تیاری کے ساتھ پیش ہونے کی ہدایت کردی۔
تفصیلات کے مطابق سندھ ہائی کورٹ میں جسٹس خادم حسین نے درخواست کی سماعت کرتے ہوئے کہا کہ اتنا وقت گزرچکا ہے اب تو ملزمان کی اپیل کو چلایا جائے۔ انہوں نےملزمان کے وکیل کو پوری تیاری کے ساتھ پیش ہونے کی ہدایت کرتے ہوئے اپیل کی سماعت کے لیے 14 مارچ کی تاریخ مقرر کردی ہے۔
ذرائع کا کہنا ہے کہ پولیس نے عدالت کے روبرو بیان دیا ہے کہ مذکورہ دہشت گردوں نے 10جون 2004کو کلفٹن پل پر کور کمانڈر کراچی کے قافلے پر حملہ کیا تھا ۔حملے میں کورکمانڈراحسن سلیم حیات محفوظ رہے تھے جبکہ چھ جوان شہید ہوگئے تھے ۔ دہشت گردوں کے اس حملے میں نذیر احمد سمیت تین پولیس اہلکار بھی شہید ہوئے تھے۔
پولیس کے مطابق سنہ 2004 میں ہی ان ملزمان نے گلستانِ جوہر تھانے پر بھی حملہ کیا تھا جس میں ایک اے ایس آئی سمیت پانچ پولیس اہلکار شہید ہوئے تھے۔
انسداددہشت گردی کی خصوصی عدالت نے کالعدم تنظیم جند اللہ سے تعلق رکھنے والے دہشت گرد عطا الرحمان کو اس کے گیارہ ساتھیوں سمیت سزا ئے موت سنائی تھی۔ ملزمان میں عطاالرحمن، شہزاد باجوہ، دانش امام، یعقوب سعید خان، خرم سیف اللہ، عزیز احمد، نجیب اللہ، شہزاد مختار، راؤ خالد، شعیب صدیقی اور محمد خالد شامل ہیں۔
سنہ 2006 میں عدالت نے قتل کے الزام میں ملزمان کو سزائے موت، بم دھماکے کے الزام میں عمر قید اور جائیداد ضبط کرنے، کورکمانڈر پر حملے کے الزام میں چودہ سال قید اور پچاس ہزار جرمانہ اور عوامی املاک کو نقصان پہنچانے کے الزام میں ایک ایک لاکھ روپے جرمانے کی سزا سنائی تھی۔ یہ بھی کہا گیا تھا کہ فیصلے کا اطلاق ہائیکورٹ کی توثیق کے بعد ہوگا۔
یاد رہے کہ سندھ ہائی کورٹ میں دہشت گردوں کی جانب سے دائر کردہ اپیلوں کی سماعت ان کے وکیل کے انتقال کے باعث ملتوی کی گئی تھی۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کےلیے سوشل میڈیا پرشیئر کریں
