کراچی: پاک بھارت بڑھتی ہوئی کشیدگی کے پیش نظر جناح ایئرپورٹ سے آج 40 پروازوں کی آمد و روانگی منسوخ کی گئی ہے۔
اے آر وائی نیوز کے مطابق جناح ایئرپورٹ ذرائع کا کہنا ہے کہ جرمنی، ترکی، یواے ای اورسعودی عرب جانے والی پروازیں منسوخ کی گئی ہیں۔
ایئرپورٹ ذرائع کے مطابق فلائٹ آپریشن بند ہونے سے حج پروازوں کا شیڈول بھی متاثر ہوا ہے۔
دوسری جانب واضح رہے کہ پاک بھارت بڑھتی ہوئی کشیدگی کے پیش نظر تین غیر ملکی ایئر لائنز نے دونوں ممالک کے لیے پروازیں معطل کر دی ہیں۔
عرب میڈیا کے مطابق بھارت کے پاکستان پر حملے کے بعد پاک بھارت کشیدگی مسلسل بڑھ رہی ہے۔ اس صورتحال میں خلیجی فضائی کمپنیوں نے جنوبی ایشیا کے لیے کئی پروازیں منسوخ کر دی ہیں یا ان کا رخ تبدیل کر دیا ہے۔
رپورٹ کے مطابق اتحاد، امارات اور قطر ایئر ویز سمیت ایئر لائنز نے دبئی، ابوظہبی اور دوحہ ہوائی اڈوں سے بھارت اور پاکستان کے ہوائی اڈوں کے لیے پروازیں فوری طور پر روک دیں یا تاخیر کا شکار کر دیں۔
اب ایمرٹس، اتحاد اور قطر ایئر ویز نے 10 مئی تک پاکستان کے لیے اپنی پروازیں معطل کر دی ہیں۔ ایمرٹس کا کہنا ہے کہ موجودہ صورتحال کے تناظر میں پروازیں معطل کی گئی ہیں۔ صورتحال کو قریب سے مانیٹر کر رہے ہیں۔
اتحاد نے کہا کہ اس نے 6 مئی کو پاکستان جانے والی پروازوں کو واپس بلایا۔ اس کے علاوہ 7 مئی کو کراچی (EY297)، لاہور (EY285) اور اسلام آباد (EY303) کے لیے پروازیں منسوخ کر دی تھیں۔
ایئر لائنز کی ویب سائٹ کے مطابق ایمریٹس نے دبئی اور پاکستان میں سیالکوٹ، لاہور، اسلام آباد اور پشاور سمیت دیگر مقامات کے درمیان پروازیں بھی معطل کر دی ہیں۔
پاکستان کی سلامتی کےلیے مندروں میں گھنٹیاں بج اٹھیں
قطر ایئر ویز نے کہا کہ اس نے فضائی حدود کی بندش کی وجہ سے پاکستان کے لیے پروازیں عارضی طور پر معطل کر دی ہیں۔
