کراچی : پی ٹی آئی کراچی کے صدر فردوس شمیم نقوی نے میڈیا نمائندوں کو سوالات پوچھنے پر دھمکیاں دیں، پریس کانفرنس کے دوران صحافی اٹھ کر چلے گئے۔
تفصیلات کے مطابق تحریک انصاف کراچی کے صدر فردوس شمیم نقوی پریس کانفرنس کیلئے کراچی پریس کلب پہنچے تو اس دوران صحافیوں نے ان سے سوالات کیے۔
ایک صحافی کی جانب سے پوچھے گئے سوال پر کہ کراچی کی ایک کالونی کے مکین آپ کیخلاف عدالت میں گئے ہوئے ہیں، ان کا الزام ہے کہ آپ نے ایک پروجیکٹ شروع کر رکھا ہے جو ماحولیات اور بلڈنگ رولز کی خلاف ورزی ہے۔
جواب میں فردوس شمیم نقوی کا کہنا تھا کہ اس بات پر میں آپ کیخلاف کیس درج کرادوں تو؟ صحافی کا کہنا تھا کہ آپ شوق سے میرے خلاف مقدمہ درج کروائیں میں سے صرف آپ سے سوال پوچھا ہے جو میرا حق ہے، سوال پوچھنا ہمارا کام ہے، اس کے بعد ماحول کشیدہ ہوگیا۔
مزید پڑھیں: عمران خان ہماری حمایت کے بغیر وزیراعظم نہیں بن سکتے، وسیم اختر اور فیصل سبزواری
بعد ازاں صحافی پریس کانفرنس کا بائیکاٹ کرتے ہوئے وہاں سے اٹھ کر چلے گئے، ،شمیم نقوی نے صحافیوں سے شکوہ کیا کہ یہ آپ لوگوں نے اچھا نہیں کیا۔
