اسلام آباد : ججز نظربندی کیس میں عدالت نے سابق صدر پرویز مشرف کے ناقابل ضمانت وارنٹ گرفتاری برقرار رکھنے کا فیصلہ کیا ہے۔
تفصیلات کے مطابق اسلام آباد کی انسداد دہشتگردی کی عدالت میں ججز نظربندی کیس کی سماعت ہوئی، کیس کی سماعت انسداد دہشتگردی کی عدالت کے جج سہیل اکرام نے کی، سماعت میں عدالت نے سابق صدر پرویز مشرف کے ناقابل ضمانت وارنٹ گرفتاری برقرار رکھے۔
پرویز مشرف کے وکیل نے مؤقف اختیار کیا کہ ان کے موکل بیرون ملک گئے ہوئے ہیں انہیں وقت دیا جائے۔
حکومت کی جانب سے پبلک پراسیکیوٹر نے پولیس کے مشرف کے چک شہزاد فارم ہاوس پر چھاپہ مارنے سے متعلق رپورٹ پیش کی۔
پولیس کی رپورٹ میں کہا گیا کہ انہیں چھاپہ مارنے پر معلوم ہوا کہ ملزم پرویز مشرف بیرون ملک گئے ہوئے ہیں، عدالت نے وکیل صفائی کی استدعا پر کیس کی سماعت 22اکتوبر تک ملتوی کردی۔
واضح رہے کہ سابق صدر پرویز مشرف پر سابق چیف جسٹس سمیت ججز کو نظر بند رکھنے کا الزام ہے۔
