نئی دہلی: بھارت میں ایک گھبرائے ہوئے بارہ سنگھے کی بھاگنے اور چھلانگیں مارنے کی ویڈیو بے حد وائرل ہوگئی، لوگوں نے اس ویڈیو پر دلچسپ تبصرے کیے۔
یہ واقعہ بھارتی پنجاب میں پیش آیا جہاں ایک بارہ سنگھا اچانک کہیں سے بھرے بازار میں آن پہنچا۔
لوگ تو اسے دیکھ کر حیران پریشان ہو ہی گئے، لیکن خود بارہ سنگھا بھی لوگوں کا ہجوم دیکھ کر گھبرا گیا۔ اسے سمجھ نہیں آیا کہ وہ جائے تو کہاں جائے چانچہ وہ گھبراہٹ میں ادھر ادھر بھاگنے لگا۔
اس دوران اس نے اپنے سامنے موجود ایک سائیکل سوار کے اوپر سے چھلانگ بھی ماری اور بالآخر ریل کی پٹریوں پر سے ہوتا ہوا جنگل میں غائب ہوگیا۔
اس ویڈیو کو فیس بک پر اب تک 4 ہزار لائیکس مل چکے ہیں جبکہ لوگ مختلف دلچسپ تبصرے بھی کر رہے ہیں، لوگوں نے اس سائیکل سوار کو بھی خوش قسمت قرار دیا جو بارہ سنگھے کی چھلانگ کے دوران زخمی ہونے سے محفوظ رہا۔
