اسلام آباد : مسلم لیگ ن نے عدلیہ کے ساتھ ٹکراؤ کا فیصلہ کرلیا اور پاناما کیس میں اختلافی نوٹ لکھنےوالے جسٹس آصف سعید کھوسہ کےخلاف ریفرنس دائر کردیا، ۔جسٹس کھوسہ پر آئین سے ناواقفیت کا الزام لگاکرعہدےپر تقرر مستقبل کیلئےخطرناک قرار دے دیا ہے۔
تفصیلات کے مطابق مسلم لیگ ن عدلیہ سے تصادم کے راستے پر چل پڑی، پاناما کیس میں اختلافی نوٹ لکھنے والے جسٹس آصف سعید کھوسہ کے خلاف سپریم جوڈیشل کونسل میں ریفرنس دائر کردیا، ریفرنس اسپیکر ایاز صادق نے دائر کیا۔
اسپیکرقومی اسمبلی سردار ایازصادق نے موقف اختیار کیا ہے کہ اسپیکر قومی اسمبلی کو نواز شریف کا وفادار قرار دینا حقائق کے منافی ہے، اسپیکر کے بارے میں بینچ میں شامل صرف ایک جج جسٹس آصف سعید کھوسہ نے ریمارکس دیئے، ان کے ریمارکس سے ذاتی عناد اور جانبداری کا اظہار ہوتا ہے۔
عدالتی کارروائی پر اعتراض اٹھاتے ہوئےایاز صادق نے موقف اختیار کیا کہ اسپیکر دفتر کوئی تفتیشی ادارہ نہیں، معاملہ مقررہ مدت میں نمٹایا، جبکہ عدالت نے دس ماہ تفتیش کے بعد جےآئی ٹی بنادی۔
دائر ریفرنس میں کہا گیا ہے کہ اسپیکر نے قانون کے مطابق نواز شریف کے خلاف ریفرنس کا معاملہ نمٹایا ، معزز جج نے ریمارکس میں اس چیز کو مد نظر نہیں رکھا ،اسپیکر نے مقررہ مدت میں نمٹایا جس کی سراہا نہیں گیا۔
ریفرنس میں کہا گیا ہے کہ معزز جج یا تو آئین کے بارے میں جانتے نہیں یا انہوں نے آئینی ادارے کے بارے میں تعصب برتا، جسٹس آصف سعید کھوسہ عہدےپربرقراررہے تو مزیدمتنازع فیصلوں کا موقع ملے گا۔
ایازصادق نے معزز جج کے فیصلے پر تنقید کرتے ہوئے کہا ریمارکس نے معزز جج کی منصفی پر سوالات اٹھا دیئے ہیں، جسٹس آصف سعید کھوسہ نے اسپیکر کے عہدے اور پارلیمنٹ کی خودمختاری پر مداخلت کی،ریمارکس سے ساکھ کو نقصان پہنچا۔
