اسلام آباد: الیکشن کمیشن کا اہم اجلاس تیس دسمبر کو طلب کرلیا گیا ہے۔
چیف الیکشن کمشنر سردار محمد رضا نے اپنی تقرری کے بعد یہ پہلا اجلاس طلب کیا ہے، الیکشن کمیش ذرائع کا کہنا ہے کہ اس اجلاس میں ملک میں بلدیاتی انتخابات کی تیاریوں کا جائزہ لیا جائے گا۔
انتخابی اصلاحات کے علاوہ الیکشن کمیشن کے دیگر معاملات بھی زیرِ بحث لائے جائیں گے۔
اسلام آباد: جسٹس ریٹائرڈ سردار رضا خان نے چیف الیکشن کمشنر کے عہدے کا حلف اٹھا لیا ہے۔ چیف جسٹس سپریم کورٹ ناصر الملک نے ان سے حلف لیا ہے۔
سپریم کورٹ میں آج چیف الیکشن کمشنر کی تقریبِ حلف برداری ہوئی، چیف جسٹس سپریم کورٹ ناصرالملک نے الیکشن کمشنر سردار رضا سے حلف لیا ہے۔
جسٹس ریٹائرڈ سردار رضا نے وفاقی شرعی عدالت کے چیف جسٹس کے عہدے سے استعفی دے دیا تھا۔ جس کے بعد وزارت پارلیمانی امور نے ان کی بطور چیف الیکشن کمشنر تعیناتی کا نوٹیفیکیشن جاری کیا ہے۔ نوٹیفیکیشن کے مطابق جسٹس ریٹائرڈ سردار محمد رضا کو آئندہ پانچ برس کیلئے چیف الیکشن کمشنر مقرر کیا گیا ہے۔ ان کی مدت حلف اٹھانے کے دن سے شروع ہوگی۔
جسٹس ریٹائرڈ سردار رضا خان کیلئے سب سے بڑا چیلنج الیکشن کمیشن کی غیرجانبداری کا تاثر بحال کرنا ہے۔ دو ہزار تیرہ کے انتخابات کے بعد دھاندلی کے الزامات نے ادارے کی ساکھ کو بری طرح متاثر کیا ہے۔
اسلام آباد: چیف الیکشن کمشنر کے تقرری کے لیے قائم پارلیمانی کمیٹی نے جسٹس (ر) سردار رضا کو بطور چیف الیکشن کمشنر کے عہدے کے لیے متفقہ طور پر نامزد کر دیا ہے۔
وزیراعظم اوراپوزیشن لیڈر کی طرف سے پارلیمانی کمیٹی کو تین نام بجھوائے گئے تھے۔ کمیٹی کے چیئرمین رفیق رجوانہ نے اجلاس کے بعد میڈیا کو بتایا کمٹی کو سردار محمد رضا کے علاوہ جسٹس (ر) طارق پرویز اور جسٹس (ر) تنویر احمد خان کے نام بھی بجھوائے گئے تھے۔
انھوں نے کہا کہ کمیٹی نے ان ناموں پر بحث اور بغور جائزہ لیا، جس کے بعد متفقہ طور پر سردار محمد رضا کا انتخاب کیا گیا ہے۔ رفیق راجونہ کا کہنا تھا کہ نو منتخب الیکشن کمشنر سے امید رکھتے ہیں کہ وہ ملک میں آئندہ انتخابات شفاف اور یقینی بنائیں گے۔
ان کا کہنا تھا کہ یہ فیصلے جمہوری اداروں کے استحکام کے لیے نیک شگون ہے۔ ان کا مزید کہنا تھا کہ جسٹس (ر) سردار محمد رضا کا نام وزیراعظم کو بجھوایا جائے گا، جس کا نوٹیفکیشن وزیراعظم جاری کریں گے۔
رفیق رجوانہ کا کہنا تھا کہ چیف الیکشن کمشنر کی نامزدگی آئین کے عین مطابق عمل میں لائی گئی ہے۔ اجلاس میں پی ٹی آئی کے رکن کی عدم شرکت سے متعلق ایک سوال پر رفیق رجوانہ نے کہا کہ پی ٹی آئی کی طرف سے تینوں نام معتبر قرار دئیے گئے اور کسی کی اجلاس میں غیر حاضری اجلاس کے فیصلوں پر کوئی اثر نہیں ہوتا ہے۔
اسلام آباد: چیف الیکشن کمشنر کے نام کیلئے جاری پارلیمانی کمیٹی میں جسٹس سردار رضا کے نام پر اتفاق ہو گیا ہے۔
ذرائع کا کہنا ہے کہ پارلیمانی کمیٹی کا اجلاس تاحال جاری ہے تاہم اہم ذرائع اس بات کی تصدیق کر رہے ہیں کہ حکومت اور اپوزیشن نے جن تین نام پارلیمانی کمیٹی کو دیئے تھے ان میں جسٹس سردار رضا کے نام کو چیف الیکشن کمیشنر کیلئے اہم امید وار بتایا جارہا ہے۔
اس قبل حکومت اور اپوزیشن نے مشاورت کے بعد چیف الیکشن کمشنر کی تقرری کے لیے تین ناموں پر اتفاق کر لیا تھا جن کا حتمی فیصلہ پارلیمانی کمیٹی آج کرنے جارہی ہے۔
اسلام آباد: چیف الیکشن کمشنرکی تقرری کے معاملے پر حکومت اور اپوزیشن نے تین ناموں کو شارٹ لسٹ کرلیا ہے، جسٹس سرداررضاخان کو چیف الیکشن کمشنربنائے جانے کا امکان ہے۔
چیف الیکشن کمشنر کی تقرری کا حتمی فیصلہ پارلیمانی کمیٹی کرے گی، جسے چار نام بھجوا دیئے گئے ہیں، ان میں جسٹس سرداررضا خان، جسٹس ریٹائرڈ طارق پرویز اور جسٹس ریٹائرڈ شاکراللہ ، جسٹس منیرہ شیخ کے نام ہیں۔
چیف الیکشن کمشنر کی تقرری پر مشاورت کے سلسلے میں پارلیمان میں قائدِ حزب اختلاف خورشید شاہ اور وزیرِاعظم نوازشریف میں گزشتہ روز ملاقات ہوئی تھی، جس میں کئی ناموں پر غور کیا گیا تھا، چیف الیکشن کمشنر کی تقرری کے معاملے پر اپوزیشن جماعتوں میں بھی رابطے جاری ہیں۔
خورشید شاہ نے سراج الحق اور اسفندیارولی سے فون پر رابطہ کیا ہے، چیف الیکشن کمشنر کی تقرری کے سلسلے میں تیزی سپریم کورٹ کی حتمی مہلت کے نتیجے میں آئی ہے، سپریم کورٹ نے حکومت اور اپوزیشن کو آٹھ دسمبرتک مہلت دی ہے کہ وہ اس دوران چیف الیکشن کمشنر کے نام پر اتفاق کرلیں۔
جسٹس سردار رضا خان دو ہزار نو میں قائم مقام چیف الیکشن کمشنر رہ چکے ہیں، جسٹس سردار رضا خان جون دو ہزار چودہ سے وفاقی شریعت کورٹ کے جج ہیں، جسٹس سردار رضا خان دس فروری انیس سو پینتالیس میں ایبٹ آباد میں ہیدا ہوئے، جہاں انہوں نے ابتدائی تعلیم حاصل کی، انہوں نے ایل ایل بی کی ڈگری پنجاب یونیورسٹی سے حاصل کی۔
جسٹس سردار رضا خان کو اٹھائیس اپریل سنہ دو ہزار میں پشاور ہائی کورٹ کا چیف جسٹس مقرر کیا گیا، بعد ازاں انھیں دس فروری سنہ دوہزار دو میں سپریم کورٹ کا جج مقرر کردیا گیا ۔
سردار رضا خان سپریم کورٹ کے اُن ججوں میں شامل تھے، جنہیں سابق صدر پرویز مشرف نے تین نومبر دوہزار سات میں ملک میں ایمرجنسی نافذ کرکے معزول کرنے کے بعد گھروں میں نظر بند کر دیا تھا، پیپلز پارٹی کے برسراقتدار آنے کے بعد سپریم کورٹ کے دیگر تین ججوں سمیت سردار رضا خان نے عہدے کا دوبارہ حلف اُٹھایا تھا۔
جسٹس سردار رضا خان سپریم کورٹ کے اُس بینچ میں بھی شامل رہے ہیں، جس نے اہم فیصلے کیے اور ان فیصلوں نے ملک کی موجودہ تاریخ میں اہم کردار ادا کیا۔