Tag: K electric

کراچی: وفاقی حکومت اور کے الیکٹرک کے درمیان بجلی فراہمی کے معاہدے پر دستخط ہوگئے، جس کے تحت ایک ہزار سے دو ہزار میگاواٹ بجلی کراچی کو بلا تعطل ملے گی۔

تفصیلات کے مطابق وفاقی حکومت اور کے الیکٹرک کے درمیان بجلی فراہمی کے معاہدے طے پاگئے، پاور ڈویژن کی جانب سے اعلامیے میں کہا گیا ہے کہ معاہدوں میں حکومت اورکے الیکٹرک کےدرمیان چند دیرینہ تنازعات کا حل شامل ہیں۔

پاور ڈویژن اور کے الیکٹرک کے درمیان کراچی کی توانائی کے تحفظ کے لیے مختلف معاہدوں دستخط ہوگئے ، وزیرِ توانائی جناب محمد علی اور وزیر ِخزانہ ڈاکٹر شمشاد اختر کی موجودگی میں معاہدوں پر دستخط ہوئے۔

کے الیکٹرک کی نمائندگی سی ای او مونس علوی اور سی ایف او محمد عامر غازیانی نے کی، معاہدے کے تحت کراچی کو نیشنل گرڈ سےانٹر کنکشن کی صلاحیت تک بجلی کی فراہمی میں سہولت ہوگی۔

اعلامیے کے مطابق اجلاس میں ٹیرف ڈیفرینشل سبسڈی ایگریمنٹ (TDA) اور پاور پرچیز ایجنسی ایگریمنٹ (PPAA) پر دستخط دیکھنے میں آئے، نیشنل گرڈ سے توانائی کی مستحکم فراہمی کراچی کے صارفین کے لیے سستی بجلی تک رسائی میں سہولت فراہم کرے گی۔

میڈئشن اگریمنٹ تحت کے الیکٹرک اور دیگر حکومتی اداروں کے درمیان مختلف واجبات کی ادائیگیوں میں آسانی پیدا ہوگی

اس موقع پر وزیرِ توانائی محمد علی نے کہا کہ میں آج کراچی کے شہریوں کو مبارکباد پیش کرتا ہوں، آج کے اجلاس میں ایک انتہائی اہم معاملہ اپنے منطقی انجام پر پہنچا ہے۔

محمد علی کا کہنا تھا کہ وزارت پاور سیکٹر کو ترقی کی منازل طے کرنے کے لیے اور ایک سازگار ماحول فراہم کرنے کے لیے سخت محنت کر رہی ہے، کے الیکٹرک کو حکومت نے ہمیشہ ایک پارٹنر کے طور پر پیش کیا ہے۔

وزیرِ توانائی نے وزیراعظم کا خصوصی شکریہ ادا کرتے ہوئے کہا اس سارے عمل میں وزیرِ اعظم نے ذاتی طور پر شمولیت کی اور رائے لیتے رہے، اس کے ساتھ میں وزیرِ خزانہ ڈاکٹر شمشاد اختر کا ان کی ذاتی شمولیت اور تعاون پر خصوصی شکریہ کرتا ہوں اور میں اپنے ساتھیوں اور تمام ٹیموں کا بھی ان کے تعاون کے لیے شکریہ ادا کرتا ہوں۔

سی ای او کے الیکٹرک مونس علوی کا کہنا تھا کہ حکومت کیساتھ اہم معاہدےپر دستخط کیے ہیں، ایک ہزار سے دو ہزار میگاواٹ بجلی کراچی کو بلا تعطل ملے گی، کے الیکٹرک سرمایہ کاری پلان پر بہتر انداز سے عمل درآمد کر سکے گی۔

مونس علوی نے مزید کہا کہ کراچی کو سپلائی کے لیے بہت اہم معاہدہ ہے، معاہدے پر دستخط سے حکومت اور کے الیکٹرک کے درمیان تعلقات بہترین ہوجائیں گے اور معاہدے کے بعد کے الیکٹرک سرمایہ کاری پلان پر بہتر انداز سے عمل درآمد کر سکے گی۔

کراچی: شہر قائد کے باسیوں کو بجلی فراہمی کے نام پر تڑپانے والی تقسیم کار کمپنی کے الیکٹرک کی ملکیت کا جھگڑا پاکستان اور کیمن آئی لینڈ میں جاری ہے، ایشیا پاک اور الجماعیہ نامی دونوں فریق کھل کر ایک دوسرے کے سامنے آ گئے ہیں۔

تفصیلات کے مطابق کے الیکٹرک کا اصل مالک کون ہے؟ اس سلسلے میں ایک عدالتی جنگ پاکستان اور کیمن آئی لینڈ میں اس وقت جاری ہے، جب کہ کیمن آئی لینڈ کی عدالت نے کے الیکٹرک کے تینوں شیئر ہولڈرز کو معاملات کیمن آئی لینڈ میں حل کرنے کا حکم دے دیا ہے، اس سلسلے میں کیمن عدالت نے 108 صفحات پر مشتمل فیصلہ بھی جاری کر دیا ہے۔

کمین عدالت نے کہا ہے کہ کے الیکٹرک کمپنی کے شیئر ہولڈرز کے مسائل جو بھی ہیں، کیمن آئی لینڈ میں لائیں جائیں۔

الجماعیہ گروپ کے چیف انویسٹمنٹ افسر شان عباس اشعری نے دو ٹوک اعلان کر دیا ہے کہ آئی جی سی ایف اکثریتی شیئر ہولڈر نہیں ہے، آئی جی سی ایف کا مالک کون ہے ابھی تک یہ واضح نہیں ہوا ہے، شان اشعری نے کہا کے الیکٹرک کے نئے مالک کا دعویٰ کرنے والوں کو حکومت پاکستان کے پاس جا کر واضح کرنا ہوگا کہ اصل مالک کون ہے۔

انھوں نے کہا کیمن کی عدالت کا فیصلہ صرف اس عدالت کے دائرہ کار تک محدود ہے، یہ فیصلہ حتمی نہیں ہے، کیمن عدالت میں ابھی ایک اور سماعت ہونی ہے، کے الیکٹرک اسٹرٹیجک جگہ ہے اور جو بھی مالک ہوگا اس کو نیشنل سیکیورٹی کلیئرنس لینا ہوگی۔ انھوں نے یہ سوال بھی اٹھایا ہے کہ ایشیا پاک کے پاس شئیرز کی خریداری کے لیے پیسہ کہاں سے آیا ہے۔

دوسری طرف کے الیکٹرک کے نئے مالک ہونے کے دعویدار ایشا پاک کے چیئرمین سمیر چشتی نے الجماعیہ سے کیمن عدالت کے فیصلے کے بعد سندھ ہائی کورٹ سے مقدمہ واپس لینے کا کہہ دیا ہے۔

سمیر چشتی نے کہا کہ مقدمے میں اقلیتی شیئر ہولڈرز نے اکثریتی شیئرز ہولڈرز کے بورڈ آف ڈائریکٹرز کی تعیناتی پر حکم امتناعی لیا تھا، اکثریتی شیئرز ہولڈرز آئی جی سی ایف ہے جب کہ الجماعیہ اور ڈینم انویسٹمنٹ اقلیتی شیئر ہولڈرز ہیں۔ کیمن کورٹ نے اقلیتی شیئر ہولڈرز الجماعیہ اور ڈینم انویسٹمنٹ کو سندھ ہائی کورٹ سے فوری حکم امتناعی واپس لینے کا کہہ دیا ہے۔

انھوں نے کہا کے الیکٹرک کا شئیر ہولڈر آئی جی سی ایف فوری طور پر اپنے نامزد کردہ بورڈ آف ڈائریکٹرز کو تعینات کر سکتا ہے، معاہدے کے تحت دونوں فریق ایک دوسرے کے نامزد بورڈ آف ڈائریکٹرز کو رد نہیں کر سکتے۔

سمیر چشتی نے کہا ہم کیمن عدالت کے فیصلے کو سندھ ہائی کورٹ میں لے کر جا رہے ہیں، ہمارا وکیل کیمن عدالت کا فیصلہ دکھا کر سندھ ہائی کورٹ سے مقدمہ ختم کرنے کی درخواست کرے گا، ایس ای سی پی کو بھی کیمن عدالت کا فیصلہ بھیجیں گے اور ڈائریکٹر کی تعیناتی کی درخواست کریں گے، نومبر 2022 میں کیمن میں یہ فیصلہ ہو گیا تھا کہ کے الیکٹرک کے شیئررز کی ڈیل جائز ہے۔

انھوں نے مزید کہا کہ الجماعیہ اور ڈینم انویسٹمنٹ کافی عرصے سے کے الیکٹرک کراچی پاکستان میں کام کر رہے ہیں، ہم چاہتے ہیں کہ ان کے ساتھ مل کر کام کریں، ہم نہیں چاہتے کہ کسی کے خلاف بھی توہین عدالت لگے، تاہم اقلیتی شیئر ہولڈرز رضاکارانہ اس پر فیصلے پر عمل درآمد کرے۔

انھوں نے کہا اس وقت ہمارے 2 ڈائریکٹرز ہیں جب کہ معاہدے کے تحت 4 ڈائریکٹرز رکھ سکتے ہیں، الجماعیہ اور ڈینم انویسٹمنٹ بھی چار شیئر ہولڈرز رکھ سکتے ییں۔ انھوں نے دعویٰ کیا کہ بورڈ آف ڈائریکٹرز کی تعیناتی کا مسئلہ حل کر کے ہم کراچی کے شہریوں کو سستی بجلی فراہم کر سکتے ہیں۔