کابل : افغانستان میں ایک جنازے کے دوران تین خودکش دھماکوں میں سات افراد ہلاک اور 118سے زائد زخمی ہوگئے۔
تفصیلات کے مطابق افغانستان کے دارالحکومت کابل میں افغان سینیٹ کے ڈپٹی چیئرمین محمد عالم ایزدیار کے بیٹے کی نماز جنازہ کے دوران تین خود کش دھماکے ہوئے۔
دھماکے کی نوعیت اتنی شدید تھی کہ اس کی آواز دور دور تک سنی گئی، دھماکوں کے نتیجے میں سات افراد نے موقع پر دم توڑ دیا، واقعے میں مزید ہلاکتوں کا خدشہ بھی ظاہر کیا جا رہا ہے جبکہ زخمیوں کی تعداد 118 سے زائد بتائی جارہی ہے۔
گزشتہ روز مظاہروں کے دوران ہلاک ہونے والے سالم ایزدیار کے جنازے میں افغانستان کے چیف ایگزیکٹیو عبد اللہ عبد اللہ بھی شریک تھے تاہم انہیں اس حملے میں کوئی نقصان نہیں پہنچا۔
دوسری جانب افغان طالبان کے ترجمان ذبیح اللہ مجاہد نے اپنے ایک بیان میں اس حملے سے اظہار لاتعلقی کیا ہے۔ یاد رہے کہ کابل میں جب پولیس نے گزشتہ روز مظاہرین پر فائرنگ کی تو اس کے نتیجے میں ہلاک ہونے والوں میں سالم ایزدیار بھی شامل تھے۔
