Tag: Kabul

کابل : افغانستان کے دارالحکومت کابل میں معروف افغان اداکارہ اور ہدایت کار صبا سحر جو نامعلوم افراد کی فائرنگ کے نتیجے میں زخمی ہوگئی تھیں، 20 گھنٹے کوما میں رہنے کے بعد ہوش میں آگئیں۔

تفصیلات کے مطابق افغانستان کی پہلی فلم ڈائریکٹر اور اداکارہ 44 سالہ صبا سحر قاتلانہ حملے کے نتیجے میں زخمی ہو گئی تھیں انہیں فوری طور پر مقامی اسپتال منتقل کیا گیا جہاں وہ دوران علاج کوما میں چلی گئی تھیں جس کے 20 گھنٹے بعد بدھ کی صبح اُنہیں ہوش آیا۔

خبر رساں ادارے کے مطابق تین نامعلوم مسلح حملہ آوروں نے صبا سحر کو اس وقت نشانہ بنایا جب وہ اپنے بیٹے کے ہمراہ کار میں سوار تھیں ان پر تین اطراف سے فائرنگ کی گئی۔

ان کے ہمراہ اُن کا ڈرائیور اور دو محافظ بھی تھے، فائرنگ سے وہ اور ان کے محافظ بھی زخمی ہو ئے جب کہ بیٹا اور ڈرائیور محفوظ رہے، پولیس کا کہنا ہے کہ حملہ آور فرار ہونے میں کامیاب ہو گئے۔

صبا سحر کے شوہر ایمل ذکی نے میڈیا بتایا ہے کہ صبا کے پیٹ میں چار گولیاں لگیں جس کے بعد وہ کوما میں تھیں اور تقریباً20 گھنٹے بعد انہیں ہوش آیا ہے، اُن کے بقول صبا کی حالت اب خطرے سے باہر ہے۔

صبا سحر فلم ڈائریکٹر اور اداکارہ ہونے کے ساتھ ساتھ باقاعدہ تربیت یافتہ سینئر پولیس افسر بھی رہ چکی ہیں، وہ اب تک کئی دستاویزی اور فیچر فلمیں بنا چکی ہیں۔

صبا 10 سال سے زائد عرصے سے محکمۂ پولیس میں خدمات انجام دیتی آ رہی ہیں اور حال ہی میں ان کا تقرر صنفی امور کی نگرانی کرنے والی خصوصی پولیس فورس میں کیا گیا تھا۔