اسلام آباد : کامیاب جوان پروگرام کے تحت قرض ملنے پرنوجوان شہری بھی خوشی سےنہال ہیں، درخواست گزار کا کہنا ہے کہ عمران خان نے برسوں پرانا خواب پورا کردیا، بغیرکسی سفارش قرض مل رہا ہے،وزیراعظم کے شکرگزار ہیں۔
تفصیلات کے مطابق نوجوانوں کے خوابوں کوحقیقت میں بدلنے کا حکومتی منصوبہ کا آج سے عملی آغاز ہونے جارہا ہے ، وزیراعظم عمران خان نے کامیاب درخواست گزاروں کو وزیراعظم آفس مدعو کرلیا، کامیاب درخواست گزاروں میں رقم کی تقسیم آج سے شروع ہوگی۔
قرض ملنے پر نوجوان شہری بھی خوشی سے نہال ہیں ، درخواست گزار خاتون کا کہنا ہے کہ سوچا نہیں تھا 10دن میں 50لاکھ روپے تک قرض ملے گا، 10 سال سے بوتیک بنانے کا خواب پورا نہیں کر پارہی تھی، وزیراعظم کا منصوبہ آج میرا خواب پورا کررہا ہے۔
میثم علی نے کہا 35 لاکھ روپے قرض ملا، اپنا سافٹ ویئر ہاؤس بناؤں گا اور درخواست گزار کا کہنا تھا کہ قرض کے لئے کسی کی سفارش کرناپڑی نہ ہی انتظارکیا، گیسٹ ہاؤس بنانا چاہتی تھی رقم کا بندو بست نہیں ہو پارہا تھا، وزیراعظم کی شکرگزار ہوں، اپنے پاؤں پر کھڑی ہوسکوں گی۔
مزید پڑھیں : وزیراعظم عمران خان آج کامیاب جوان پروگرام کے تحت چیک تقسیم کریں گے
معاون خصوصی برائےیوتھ افیئرزعثمان ڈار نے اےآروائی نیوز سے گفتگو کرتے ہوئے کہا آج سے نوجوانوں کا بڑا فلیگ شپ منصوبہ شروع کررہے ہیں، وزیراعظم نوجوانوں میں 1 ارب کی تقسیم کا مرحلہ شروع کریں گے، نہ کوئی سفارش نہ میرٹ پر سمجھوتہ اور بلاتفریق قرض تقسیم ہورہا ہے، نوجوان اپنا کاروبار کریں اور ملکی معیشت کو مضبوط بنائیں۔
خیال رہے کامیاب جوان پروگرام کے پہلے مرحلے میں100 ارب روپے مختص کیے گئے ہیں، پروگرام کے تحت1 سے50 لاکھ تک کے چیک نوجوانوں کو دئیے جائیں گے۔
پروگرام کے تحت فاٹا اور قبائلی اضلاع سمیت ملک بھر سے نوجوانوں کو رقوم کی ادائیگی ہوگی، مرکزی تقریب کے بعد صوبوں میں رقم کی تقسیم کا باقاعدہ آغاز ہوجائے گا۔
