کراچی : کسٹمز نے کراچی ایئر پورٹ پر تلاشی کے دوران مسافر کے سامان سے نو بوتل غیر ملکی شراب برآمد کی ہے، ملزم منصور احمد پی آئی اے پیپلز یونٹی کے صدر کا مشیر ہے۔
تفصیلات کے مطابق کراچی ایئر پورٹ سے کسٹم حکام نے پی آئی اے پیپلز یونٹی صدر کے مشیر سے نو بوتل غیر ملکی شراب بر آمد کرلی، منصور احمد نامی مسافر سے مذکورہ غیر ملکی شراب کی نو بوتلیں بنکاک سے کراچی کی پی آئی اے پرواز سے آمد پر برآمد کی گئیں۔
اس حوالے ذرائع کا کہنا ہے کہ کراچی ائر پورٹ پر کسٹمز نے شراب ضبط کئے جانے پر مبنی رسید بھی جاری کی ہے، اس کے علاوہ منصور احمد کے ساتھ موجود پی آئی اے عملے کی جانب سے کسٹم حکام پر دباؤ ڈالنے کا بھی انکشاف ہوا ہے۔
ذرائع کے مطابق شراب لانے والا شخص ائر لائن کا ریٹائر ملازم اور پیپلز یونٹی کا سرگرم کارکن ہے، دوسری جانب سی بی اے ذرائع نے بتایا ہے کہ منصور احمد ذاتی حیثیت میں شراب لانے میں ملوث ہے، یونٹی کا اس کے اس فعل سے کوئی تعلق نہیں۔
