Tag: karachi airport

  • ایئرپورٹ پر ملکی و غیر ملکی مسافروں سے ٹپ کی وصولی ملک کے لیے بدنامی کا باعث بننے لگی

    ایئرپورٹ پر ملکی و غیر ملکی مسافروں سے ٹپ کی وصولی ملک کے لیے بدنامی کا باعث بننے لگی

    کراچی: ملکی ایئر پورٹس پر ملکی و غیر ملکی مسافروں سے ٹپ کی وصولی ملک کے لیے بدنامی کا باعث بننے لگی۔

    تفصیلات کے مطابق سی اے اے کی غفلت و لاپرواہی کے باعث ایئر پورٹ پر مسافروں سے ٹپ کی وصولی کا معاملہ ملک کے لیے بدنامی کا باعث بننے لگا، کراچی ایئرپورٹ پر عملے کی جانب سے مسافروں سے سہولتوں کے استعمال پر ٹپ مانگنے کا واقعہ سامنے آ گیا ہے۔

    گزشتہ دنوں کراچی ایئرپورٹ پر ایک غیر ملکی وی لاگر کی ویڈیو سوشل میڈیا پر وائرل ہوئی، غیر ملکی مسافر کراچی سے دبئی جا رہا تھا، جس سے عملے نے ٹپ مانگا، ویڈیو وائرل ہونے پر شہریوں کی جانب سے بھی کارروائی کا مطالبہ سامنے آیا۔

    واقعے سے یہ بات سامنے آئی کہ کراچی ایئر پورٹ پر غیر ملکی مسافروں سے ٹپ مانگنے کی روایت ختم نہیں ہو سکی ہے، دوسری طرف سی اے اے اعلیٰ حکام کی جانب سے پراسرار خاموشی چھائی رہی۔

    تاہم اب ادارے کی اعلیٰ انتظامیہ نے واقعے کا نوٹس لے لیا ہے، اور متعلقہ پرائیویٹ کمپنی کو شوکاز جاری کر دیا گیا ہے۔

    ترجمان نے کہا کہ ملکی ایئر پورٹس پر مختلف قسم کے کنسنشنز آؤٹ سورسڈ ہیں، ان کنسشنز پر کام کرنے والے سول ایویشن کے ملازمین نہیں ہیں، تاہم ایئر پورٹس پر کہیں بھی ٹپ مانگنے کی اجازت نہیں اور ادارہ ٹپ کلچر کی سختی سے حوصلہ شکنی کرتا ہے۔

  • منکی پاکس کے پھیلاؤ کا خدشہ: کراچی ایئرپورٹ پر مسافروں کی اسکیننگ شروع

    منکی پاکس کے پھیلاؤ کا خدشہ: کراچی ایئرپورٹ پر مسافروں کی اسکیننگ شروع

    کراچی: صوبہ سندھ کے دارالحکومت کراچی کے جناح انٹرنیشنل ایئرپورٹ پر منکی پاکس کے ممکنہ پھیلاؤ کے خدشے کے پیش نظر مسافروں کی اسکیننگ کی جارہی ہے۔

    تفصیلات کے مطابق ملک میں منکی پاکس کے 2 مصدقہ کیسز اور اس کے ممکنہ پھیلاؤ کے خدشے کے تحت کراچی ایئرپورٹ پر مسافروں کی اسکیننگ شروع کردی گئی۔

    ذرائع کا کہنا ہے کہ کراچی ایئرپورٹ پر طبی عملہ بیرون ملک سے آنے والوں کے ہاتھ اور بازو چیک کر رہا ہے، مشتبہ علامت کی تصدیق پر طبی عملے اور مسافروں کو اسکینر سے گزرا جارہا ہے۔

    خیال رہے کہ بیرون ملک سے آئے 2 مسافروں میں منکی پاکس کی تصدیق کے بعد قومی وزارت صحت نے اس حوالے سے اعلامیہ جاری کردیا ہے۔

    قومی وزارت صحت کا کہنا ہے کہ منکی پاکس کے دیگر کیسز کے حوالے سے تحقیقات جاری ہیں، تاہم ملک میں منکی پاکس کے مقامی پھیلاؤ کے ثبوت نہیں ملے ہیں۔

    وزارت صحت کے مطابق پاکستان سے منکی پاکس کا عالمی سطح پر زیادہ پھیلاؤ نہیں ہوا، متعلقہ صحت حکام کو ایڈوائزری جاری کی جا چکی ہے۔

  • جدید کیمرے نصب، ایئرپورٹ پر نگرانی کا نیا نظام

    جدید کیمرے نصب، ایئرپورٹ پر نگرانی کا نیا نظام

    کراچی : جناح انٹرنیشنل ایئرپورٹ پر مشتبہ اور مطلوب افراد کی نشاندہی کے لیے جدید نظام فعال کردیا گیا ہے جس کے تحت جرائم میں ملوث مسافروں کو بیرون ملک فرار ہونے سے روکا جاسکے گا۔

    تفصیلات کے مطابق کراچی ائیر پورٹ پر چہرہ شناخت پروگرام (فیشل ریکگنائزیشن سسٹم، ایف آر ایس ) کو حتمی شکل دے دی گئی ہے، ایف آئی اے امیگریشن اورسول ایوی ایشن اتھارٹی مشترکہ طور پر سسٹم کا نظم ونسق دیکھے گی۔

    اس سسٹم میں تصویر کے ذریعے مسافروں کی تصدیق کی جائے گی اور اگر کوئی مسافر کسی جرم میں ملوث ہوا تو اس کے ا ئیر پورٹ داخل ہونے پر الارم سسٹم ایکٹیو ہو جائے گا جس کے باعث وہ واپس یا بیرون ملک فرار نہیں ہو سکے گا۔

    اس حوالے سے ایڈیشنل ڈائریکٹر ایف آئی اے عبدالسلام شیخ نے اے آر وائی نیوز کو بتایا کہ پہلے مرحلے میں ایف آئی اے کے پاس موجود ڈیٹا شناخت کے جدید سسٹم میں شامل کیا جائے گا۔ اگلے مرحلے میں پولیس سے حاصل کردہ ڈیٹا کا بمعہ تصاویر اندارج سسٹم میں کیا جائے گا۔

    ڈپٹی ڈائریکٹر ایف آئی اے علی مراد نے بتایا کہ ابتدائی طور پرمشتبہ اور مطلوب افراد کی جانچ کے لیے آزمائشی طور پر سسٹم کو چلایا جائے گا، ائرپورٹ کے لاؤنجز میں نصب کیمروں کے لیے مانیٹرنگ روم قائم کیا گیا ہے۔

    انہوں نے کہا کہ نصب کیمروں کی مدد سے ٹرمینل بلڈنگ میں داخل ہر فرد کی تصاویر مختلف مقامات پر ریکارڈ ہوں گی، کیمروں کی مدد سے 60فیصد دھندلی تصاویر بھی قابل شناخت بنائی جاسکیں گی،
    مشتبہ یا مطلوب شخص کی تصویر متعلقہ کیمرہ نمبر کے ساتھ الارم مانیٹرنگ روم میں بجے گا۔

    علی مراد نے مزید بتایا کہ مذکورہ سسٹم کے ذریعے مشتبہ اور مطلوب افراد کی گرفتاری اور کارروائی قلیل وقت میں ممکن ہوسکے گی۔

    اس حوالے سے ذرائع کا کہنا ہے کہ یہ سسٹم ایک سال قبل لگایا گیا تھا تاہم کوئی بھی ادارہ اسے ٹیک اوور کرنے کو تیار نہیں تھا جس کے بعد سسٹم کی وارنٹی بھی ختم ہو چکی ہے تاہم اب ایف آئی اے نے اس سسٹم کی ذمہ داری لی ہے اور کنٹرول روم میں ایف آئی اے کے اہلکار ڈیوٹی پر تعینات ہوں گے۔

  • کراچی ائیرپورٹ پر غیر ملکی  ایئرلائن کا طیارہ بڑے حادثے سے  بچ گیا

    کراچی ائیرپورٹ پر غیر ملکی ایئرلائن کا طیارہ بڑے حادثے سے بچ گیا

    کراچی : غیر ملکی ایئرلائن کا طیارہ بڑے حادثے سے بچ گیا، ٹیک آف کرتے ہی پرندہ ٹکرا گیا ،جس سے انجن کو شدید نقصان پہنچا۔

    تفصیلات کے مطابق کراچی ایئرپورٹ پر غیر ملکی پرواز سے پرندہ ٹکرا گیا، جس کے باعث انجن کو شدید نقصان پہنچا۔

    ٹیک آف کرتے ہی پرندہ ٹکرانے سے طیارے کی واپس ہنگامی لینڈنگ کرائی گئی۔

    ایوی ایشن ذرائع نے بتایا کہ فلائی دبئی کی پرواز ایف زیڈ 334 نے کراچی جناح ائیرپورٹ سے دبئی کیلئے ٹیک آف کیا تھا، شیڈول اڑان بھرنے کے چند سیکنڈ بعد ہی بوئنگ 737 طیارے سے پرندہ ٹکرا گیا۔

    ذرائع کا کہنا تھا کہ ہدایت ملنے پر پائلٹ نے طیارے کو جناح انٹرنیشنل ائیرپورٹ پر واپس لینڈ کیا، ایئرپورٹ ذرائع کے مطابق مسافروں کو طیارے سے اتار کر ٹرانزٹ لاونج منتقل کردیا گیا

  • کراچی ایئرپورٹ پر دھند، جدہ سے آنے والی فلائٹ لینڈ نہ ہو سکی

    کراچی: دھند کے باعث جدہ سے آنے والی فلائٹ کراچی ایئرپورٹ پر لینڈ نہ ہو سکی۔

    تفصیلات کے مطابق جدہ سے کراچی آنے والی نجی ایئر لائن کی پرواز کو کراچی ایئر پورٹ پر حد نگاہ کم ہونے سے لینڈنگ کی اجازت نہیں ملی۔

    ایئرپورٹ ذرائع کے مطابق ایئر بلیو کی پرواز 171 کا رخ ملتان کی طرف موڑا گیا، جہاں طیارہ لینڈ کر گیا ہے، کراچی سے اسلام آباد جانے والی پی آئی اے سمیت 2 نجی ایئر لائنوں کی پروازیں بھی متاثر ہو گئی ہیں۔

    ذرائع ایئرپورٹ کا کہنا ہے کہ ایئرپورٹ کے ارد گرد حد نگاہ بہت کم ہو گئی ہے جس کی وجہ سے شیڈول پروازوں کی روانگی میں بھی تاخیر ہو گئی ہے۔ تاہم ذرائع کا یہ بھی کہنا ہے کہ موسم ٹھیک ہوتے ہی فلائٹ آپریشن معمول پر آ گیا ہے۔

  • سابق کمشنر کراچی افتخار شلوانی کو جناح انٹرنیشنل ایئرپورٹ پر آف لوڈ کر دیا گیا

    سابق کمشنر کراچی افتخار شلوانی کو جناح انٹرنیشنل ایئرپورٹ پر آف لوڈ کر دیا گیا

    کراچی: سابق کمشنر کراچی افتخار شلوانی کو جناح انٹرنیشنل ایئرپورٹ پر آف لوڈ کر دیا گیا۔

    ذرائع کے مطابق ایف آئی اے نے وفاقی سیکریٹری ہاؤسنگ اور سابق کمشنر کراچی افتخار شلوانی کو کراچی ایئر پورٹ پر روک لیا، افتخار شلوانی بیرون ملک سفر کرنے کے لیے روانہ ہو رہے تھے۔

    ایف آئی اے ذرائع نے بتایا کہ افتخار شلوانی کے پاس بیرون ملک سفر کے لیے این او سی نہیں تھا، اور وہ ترکش ایئر لائن کی پرواز سے اٹلی روانہ ہو رہے تھے۔

    این او سی نہ ہونے پر وفاقی سیکریٹری ہاؤسنگ اینڈ ورکس افتخار شلوانی کو آف لوڈ کر کے بیرون ملک جانے سے روک دیا گیا۔

  • ویڈیو: کراچی ایئر پورٹ کے بیگیج ایریا میں چھت سے پانی ٹپکنے لگا

    ویڈیو: کراچی ایئر پورٹ کے بیگیج ایریا میں چھت سے پانی ٹپکنے لگا

    کراچی: جناح انٹرنیشنل ایئرپورٹ کے بیگیج ایریا میں چھت سے پانی ٹپکنے لگا ہے، جس سے مسافروں کے سامان کی خرابی کا خدشہ ہے۔

    تفصیلات کے مطابق کراچی ایئر پورٹ کے بیگیج ایریا میں چھت پر نصب پائپ پھٹنے سے پانی گرنے لگا ہے، مسافروں کے سامان کی آمد و رفت کے لیے موجود کنویئر بیلٹ پر پانی گرنے کی ویڈیو اے آر وائی نیوز کو موصول ہو گئی۔

    ویڈیو میں پائپ سے پانی گرنے کے دوران پرواز سے آئے سامان کی بیلٹ پر منتقلی دیکھی جا سکتی ہے۔

    36 اور 72 صفحات کے ای پاسپورٹس کے لیے فیسیں مقرر

    ویڈیو مِں مسلسل گرنے والا پانی کنویئر بیلٹ کے نیچے کافی دور تک فرش پر بہہ رہا ہے، بیگیج ایریا میں موجود پانی کے باعث آمد و رفت میں مشکلات اور مسافروں کے سامان کی خرابی کا خدشہ ہے۔

  • افغان شہری کو ایئرپورٹ پر غیر قانونی سہولت دینے والے 2 ایف آئی اے اہلکار گرفتار

    کراچی: کراچی ایئرپورٹ پر ایک افغان شہری کو غیر قانونی طور پر کینیڈا بھیجنے کی سہولت دینے والے 2 ایف آئی اے اہلکاروں کو گرفتار کر لیا گیا۔

    تفصیلات کے مطابق رحمت اللہ نامی افغان شہری کو جعلی بورڈنگ کارڈ پر کینیڈا روانگی کی سہولیات فراہم کرنے میں ملوث 2 ایف آئی اے اہل کار گرفتار ہو گئے۔

    ایف آئی اے امیگریشن کے کامران اور وحید نامی ہیڈ کانسٹیبلز نے افغان شہری کے ساتھ 25 لاکھ روپے میں معاملہ طے کیا تھا، افغان شہری کی کینیڈا روانگی کے لیے ایف آئی اے اہل کاروں سے ڈیل روالپنڈی کے 2 ایجنٹس نے کی تھی۔

    ایف آئی اے نے الیاس اور عثمان نامی ایجنٹس کی گرفتاری کے لیے بھی کارروائی شروع کر دی، گرفتار دونوں اہل کاروں کو ایئر پورٹ بلا کر ہتھکڑی لگائی گئی تھی، اور پھر پاسپورٹ سرکل حکام کے حوالے کیا گیا۔

    جعلی بورڈنگ پاس اور کینیڈا کے جعلی اسٹڈی پرمٹ کے ساتھ مسافر ایئرپورٹ پر گرفتار

    یاد رہے کہ افغان شہری کو 8 جنوری کو پی آئی اے کی ٹورنٹو پرواز کی فائنل چیکنگ پر گرفتار کیا گیا تھا، دونوں اہل کاروں نے ملزم کو امیگریشن کاؤنٹر پر لائے بغیر بین الاقوامی روانگی لاؤنج تک پہنچایا۔

    اہل کاروں نے مبینہ طور پر افغان شہری کو پی آئی اے پرواز نمبر 783 کا جعلی بورڈنگ کارڈ بھی فراہم کیا۔

    ملزم رحمت اللہ، اس کے بھائی اور دونوں ایف آئی اے اہل کاروں کے خلاف مقدمہ درج کر لیا گیا ہے، ملزم افغان شہریوں نے پاکستانی پاسپورٹ اور شناختی کارڈز بھی حاصل کر رکھے تھے، اور ان کے قبضے سے افغان پاسپورٹس اور شناختی کارڈز برآمد کیے گئے۔

  • ایران سے آنے والے 3 مسافر ایئرپورٹ پر گرفتار

    ایران سے آنے والے 3 مسافر ایئرپورٹ پر گرفتار

    کراچی: ایران سے آنے والے 3 مسافر ایئرپورٹ پر گرفتار کر لیے گئے۔

    تفصیلات کے مطابق ایف آئی اے امیگریشن نے کراچی ایئر پورٹ پر کارروائی کرتے ہوئے ایران سے آنے والے تین مسافروں کو گرفتار کر لیا۔

    ترجمان ایف آئی اے کے مطابق مسافروں کی جانب سے پیش کیے گئے پاسپورٹس پر آسٹریا کے جعلی ویزے لگے ہوئے تھے، گرفتار ملزمان میں طیب رضا، افضل احمد اور حمزہ مقصود شامل ہیں۔

    ابتدائی تفتیش کے مطابق ملزمان نے جعلی ویزے ایرانی ایجنٹ سے حاصل کیے، گرفتار ملزمان کو مزید کارروائی کے لیے اینٹی ہیومن ٹریفیکنگ سرکل کراچی کے حوالے کر دیا گیا۔

  • رواں ماہ بھارتی طیاروں کی چوتھی مرتبہ کراچی میں ہنگامی لینڈنگ

    رواں ماہ بھارتی طیاروں کی چوتھی مرتبہ کراچی میں ہنگامی لینڈنگ

    کراچی: رواں ماہ جولائی میں بھارت سے آنے اور جانے والے طیاروں نے چوتھی مرتبہ کراچی ایئر پورٹ پر ہنگامی لینڈنگ کی ہے۔

    تفصیلات کے مطابق بھارتی ایئر لائن انڈیگو کی پرواز کے طیارے نے آج صبح کراچی ایئر پورٹ پر ہنگامی لینڈنگ کی تھی، ایئر بس 320 شارجہ سے حیدر آباد دکن جا رہا تھا، جس میں 180 سوار تھے۔

    سول ایوی ایشن ذرائع کا کہنا ہے کہ بھارتی مسافروں کو لینے کے لیے متبادل طیارہ احمد آباد سے کراچی پہنچ گیا ہے۔

    سی اے اے ذرائع کے مطابق پرواز 6E-1406 کے طیارے نے شارجہ سے حیدر آباد دکن جاتے ہوئے بحیرۂ عرب کی فضائی حدود کے دوران طیارے میں تیکنیکی خرابی پر ہنگامی لینڈنگ کی کال دی تھی۔

    شارجہ سے بھارت جانے والی پرواز کی کراچی ایئر پورٹ پر ہنگامی لینڈنگ

    بھارتی ایئر لائن انڈیگو کے طیارے کے کپتان نے طیارے کو بحفاظت لینڈ کرایا، ہنگامی لینڈنگ کے بعد طیارے کے مسافروں کو کراچی ایئر پورٹ کے ٹرانزٹ لاؤنج منتقل کیا گیا، کراچی ایئر پورٹ منیجر محمد عمران خان کے مطابق مسافروں کو ناشتہ بھی فراہم کیا گیا۔