کراچی: چیمبر آف کامرس نے ناقابل بر داشت بجلی ٹیرف کو ناقابل عمل قرار دے دیا۔
تفصیلات کے مطابق صدر کراچی چیمبر طارق یوسف نے کہا ہے کہ بجلی کے نرخ عام آدمی، تاجر، اور چھوٹے صنعت کاروں کے لیے ناقابل برداشت اور ناقابل عمل ہیں۔
انھوں نے کہا ’’ہم نے بجلی نرخوں میں ناقابل برداشت اضافے پر شدید احتجاج کیا ہے، نگراں وزیر اعظم سے اپیل ہے کہ بجلی کے نرخوں میں اضافہ واپس لیں۔ واضح رہے کہ نگراں وزیر اعظم انوار الحق کاکڑ نے بجلی کے بھاری بلوں کے معاملے کا نوٹس لیتے ہوئے آج اجلاس طلب کر لیا ہے۔
اجلاس کے سلسلے میں وزارت بجلی اور تقسیم کار کمپنیوں کو بریفنگ دینے کی ہدایت کی گئی ہے، صارفین کو زیادہ سے زیادہ ریلیف دینے کے حوالے سے مشاورت کی جائے گی۔
ملک بھر میں "بجلی بل ادا نہیں کریں گے” تحریک شروع
ادھر کراچی سے خیبر تک ’’بل نہ بھرو‘‘ تحریک زور پکڑ گئی ہے، شہر شہر احتجاج جاری ہے، عوام کا میٹر شارٹ ہونے کے بعد لوگوں نے بجلی کے بل جلانا شروع کر دیے ہیں، پشاور میں احتجاج کے لیے عوام کا سمندر اُمڈ آیا، اور تاجروں نے بجلی کے بلوں کو آگ لگا دی۔
سرگودھا میں شہریوں نے بل جلا کر سڑک بلاک کی، راولپنڈی، جہلم، جڑانوالہ، ڈسکہ، چنیوٹ اور کبیر والا سمیت پنجاب بھر میں احتجاجی مظاہرے ہو رہے ہیں، اور بجلی کی قیمتوں میں اضافہ واپس لینے کا مطالبہ کیا جا رہا ہے۔
