کراچی سے لاہور جانے والی کراچی ایکسپریس خوفناک حادثے سے بال بال بچ گئی، تکنیکی خرابی کے باعث کوچ نمبر 16 سے دھواں نکلنے لگا۔
اے آر وائی نیوز کے مطابق ڈی ایس ریلوے ناصر خلیلی نے بتایا کہ دھواں نکلنے کے سبب مسافر پریشان ہوکر نیچے اتر گئے۔ تکنیکی خرابی کے سبب ایکسل گرم ہوگیا تھا، ٹرین کوکوٹری کے مقام پرروک لیا گیا ہے جبکہ بوگی کے مسافروں کو دوسری بوگی میں شفٹ کیا جا رہا ہے۔
متاثرہ مسافر کے مطابق ہارڈ ایکسل والی بوگی کے وہیل گرم ہوکر لال ہونے سے دھواں نکل رہا تھا، کراچی ایکسپریس پہلے ہی کراچی سے 2 گھنٹے کی تاخیر سے روانہ ہوئی تھی۔
واضح رہے کہ گزشتہ دنوں کراچی سے فیصل آباد جانے والی ملت ایکسپریس بڑے حادثے سے بچ گئی تھی تاہم حادثے کے باعث متعدد افراد زخمی ہوگئے تھے۔
تفصیلات کے مطابق کوٹری اسٹیشن پر کراچی سے فیصل آباد جانے والی ملت ایکسپریس کو حادثہ پیش آیا، بریک نہ لگنے کے باعث ٹرین کی 4 بوگیاں پٹڑی سے اتر گئیں۔
ریلوے انتظامیہ کا کہنا تھا کہ ٹرین کا انجن فیل ہونے کے باعث لاڑکانہ جنکشن کی طرف موڑ لیا گیا۔
انتظامیہ نے بتایا کہ ٹرین کی 4 بوگیاں پٹڑی سے اترنے کے باعث متعدد افراد زخمی ہوئے جبکہ حادثے میں کسی جانی نقصان کی اطلاع نہیں ملی۔
ریلوے حکام کا کہنا ہے کہ واقعے کے بعد ٹریک پر ریل کی آمدورفت معطل ہوگئی، جس کے باعث کراچی ایکسپریس، گرین لائن اور سکھر ایکسپریس کو مختلف اسٹیشنوں پر روکا گیا۔
کراچی سے لاہور جانے والی شالیمار ایکسپریس حادثے کا شکار
حادثے کے فوراً بعد ہیوی مشینری موقع پر پہنچ گئی اور ٹریک کو ٹریفک کے لیے کلیئر کرنے کے لیے آپریشن شروع کر دیا۔
