کراچی میں پولیس اور ملزمان کے درمیان اندھا دھند فائرنگ کا تبادلہ ہوا جس کی فوٹیج منظر عام پر آگئی۔
کراچی کے علاقے شاہ لطیف ٹاون میں پولیس اہلکاروں اور ملزمان میں فائرنگ کا تبادلہ ہوا پولیس سمیت دیگر شہری ملزمان کی گولیوں سے بچ گئے، واقعے کی سی سی ٹی وی فوٹیج اے آر وائے نیوز نے حاصل کرلی۔
دو ملزمان اندھا دھند فائرنگ کرتے ہوئے فرار ہوگئے، فوٹیج میں گلی میں بچوں اور بڑوں کی آمدورفت دیکھی جاسکتی ہے، پولیس اہلکاروں کو ملزمان کا پیچھا کرتے دیکھا جاسکتا ہے۔ ویڈیو میں دیکھا جاسکتا ہے کہ موٹرسائیکل پر پیچھے بیٹھا ملزم پلٹا اور گولیاں چلا دی، پیچھا کرنے والے اہلکار فائرنگ ہوتے ہی نیچے گر گئے جبکہ گلی سے گذرتا دوسرا موٹرسائیکل سوار بھی گر گیا۔
خوش قسمتی سے گلی میں کسی کو گولی نہیں لگی، ایک اہلکار راہگیر کی موٹرسائیکل پر بیٹھ کر ملزمان کے پیچھے بھاگا لیکن ملزمان فائرنگ کرکے با آسانی فرار ہوگئے۔
