کراچی : لیاری کے علاقے بغدادی میں ہونے والے سانحے نے کئی لوگوں کو ان کے پیاروں سے جدا کردیا، ان ہی میں سے ایک ماں ملبے کے پاس اپنی بیٹی گیتا کی زندگی کی امید لیے بیٹھی ہے۔
گرنے والی عمارت کے ملبے میں بیٹی گیتا اس کے شوہر سمیت خاندان کے 5 افراد ملبے تلے دبے ہوئے ہیں، گیتا کی والدہ اس امید پر وہاں موجود ہے کہ شاید اس کی بیٹی اسے مل جائے۔
اے آر وائی نیوز سے گفتگو کرتے ہوئے گیتا کی والدہ کا کہنا تھا کہ میری دعا کہ اللہ کرے اس کو تھوڑی بہت خراش آجائے باقی وہ صحیح سلامت میرے سامنے آجائے۔
اس موقع پر گیتا کے والد کو بھی بیٹی سے ملنے کی امید ہے ان کا کہنا تھا کہ ہمیں اور کچھ نہیں چاہیے بس ہمارے اپنے ہمیں مل جائیں۔
واضح رہے کہ لیاری میں منہدم5 منزلہ عمارت کا ملبہ24گھنٹے بعد بھی نہ ہٹایا جاسکا ملبے سے مزید 2 لاشیں نکال لی گئیں۔
حادثے میں اموات کی تعداد19ہوگئی، ڈپٹی کمشنر نے بتایا ہے کہ بھاری مشینری سے ملبہ ہٹانے کا کام جاری ہے ملبہ ہٹانے میں احتیاط برتی جارہی ہے اسی لیے تاخیر ہورہی ہے۔
مزید پڑھیں : کراچی میں 5 منزلہ رہائشی عمارت گرگئی
یاد رہے کہ کراچی کے علاقے لیاری بغدادی میں 5 منزلہ رہائشی عمارت گرگئی تھی، جس کے نتیجے میں 19 افراد دب کر جاں بحق اور خواتین سمیت آٹھ افراد زخمی ہوگئے۔
ملبے سے تین ماہ کی بچی کو زندہ نکالا گیا تاہم ملبے میں دبے دیگر افراد کو نکالنے کیلئے امدادی کارروائیاں جاری ہیں۔
پولیس کا کہنا ہے کہ لیاری سانحہ میں 30 سے زائد افراد کی ملبے میں دبے ہونے کی اطلاعات ہیں تاہم ریسکیو ٹیمیں مشینری کے ساتھ امدادی کارروائیوں میں مصروف ہیں۔
