Tag: karachi police

کراچی: گزشتہ روز شام سوا پانج بجے کراچی کے علاقے گلستان جوہر میں ایک چھوٹی بچی کے سامنے شاہین فورس کے بے رحم پولیس اہل کاروں کے ہاتھوں نوجوان عامر حسین کے قتل کی مزید لیکن دل دہلا دینے والی ویڈیوز سامنے آ گئی ہیں۔

گلستان جوہر میں جعلی مقابلے کے وقت کی سی سی ٹی وی فوٹیجز میں نوجوان عامر حسین کو شدید زخمی حالت میں سیڑھی پر گرے دیکھا جا سکتا ہے، جب کہ تینوں شاہین فورس کے اہل کاروں کے ہاتھوں میں پستول تھے، اور وہ اس طرح الرٹ دکھائی دے رہے ہیں جیسے کسی دہشت گرد کا مقابلہ کر رہے ہوں۔

ایک فوٹیج میں جعلی مقابلے کے مرکزی کردار پولیس اہل کار کو مقتول نوجوان کی تلاشی لیتے بھی دیکھا جا سکتا ہے، جب کہ اس موقع پر پیچھے کھڑا اہل کار زخمی حالت میں سیڑھی پر گرے عامر پر نشانہ باندھے کھڑا رہا تھا۔

جب فائرنگ کی آواز سن کر فلیٹ کے مکین نیچے آنے لگے تو پولیس اہل کار نے شناخت چھپانے کے لیے عامر کے چہرے پر لال کپڑا رکھ دیا، اور پھر معاملہ خراب دیکھ کر کچھ ہی دیر میں پولیس اہل کار موقع سے فرار ہو گئے۔

ایک اور سی سی ٹی وی فوٹیج میں عامر حسین کے ساتھی حمید کو موٹر سائیکلوں کے درمیان گلی کی جانب بھاگتے دیکھا جا سکتا ہے، جب کہ دوسری فوٹیج میں ایک چھوٹی بچی کو بھی موٹر سائیکل سے اتر کر روتے دیکھا جا سکتا ہے۔ پولیس اہل کاروں نے اس بچی کے سامنے گولی چلا کر نوجوان کی جان لی۔

اس دل دہلا دینے والے واقعے کا اس چھوٹی بچی کی نفسیات پر کیا اثرات مرتب ہو سکتے ہیں، تاہم اس کے بارے میں تو ماہرین نفسیات ہی بتا سکتے ہیں، ماہرین نفسیات ہی کا کہنا ہے کہ بچپن کا کوئی ناخوش گوار واقعہ انسان کے لیے زندگی بھر کا روگ بن سکتا ہے۔

کراچی: پولیس کے ہاتھوں نوجوان قتل، اہلکار گرفتار، مقدمہ درج، اہلخانہ سراپا احتجاج