کراچی : ابوالحسن اصفہانی روڈ پر ہونے والا پولیس مقابلہ کے حوالے سے اہم پیشرفت سامنے آئی ہے، فائرنگ کرنے والا سادہ لباس اہلکار ایس ایچ او مبینہ ٹاؤن نکلا جسے معطل کردیا گیا۔
تفصیلات کے مطابق کراچی کے علاقے ابوالحسن اصفہانی روڈ پر جعلی پولیس مقابلے میں مبینہ ملزم کے زخمی ہونے کے واقعہ کے بعد معلوم ہوا ہے کہ فائرنگ کرنے والا سادہ لباس اہلکار کوئی اور نہیں ایس ایچ او مبینہ ٹاؤن ہے۔
ایس ایس پی ایسٹ نے واقعے پر فوری ایکشن لیتے ہوئے ایس ایچ او مبینہ ٹاؤن کو معطل کردیا، انہوں نے واقعے کی مکمل رپورٹ طلب کرلی ہے۔
گزشتہ رات ابوالحسن اصفہانی روڈ پرمبینہ سادہ لباس پولیس اہلکاروں کی فائرنگ سے عثمان نامی نوجوان زخمی ہوگیا تھا، پولیس نے زخمی نوجوان عثمان کو حراست میں لے کر تھانے منتقل کیا، بعد ازاں زخمی نوجوان کے اہلخانہ اور علاقہ مکین تھانے پہنچ گئے تھے۔
اہل خانہ نے تھانے کے باہر نوجوان کی رہائی کیلئے مظاہرہ کیا، پولیس کی جانب سے مظاہرین کو منتشرکرنے کے لیے تھانےسے ہوائی فائرنگ کی گئی، پولیس نے پہلے زخمی نوجوان کو ڈاکو ظاہر کیا پھرمظاہرین کے احتجاج پر چھوڑ دیا تھا۔
ایس ایس پی ایسٹ نے واقعے کی انکوائری کے لیےٹیم تشکیل دے دی ڈی ایس پی سہراب گوٹھ سہیل فیض انکوائری ٹیم کی سربراہی کریں گے۔
اس بات کا بھی انکشاف ہوا ہے کہ پولیس کی جانب سے نوجوان کو ملزم بنانے کے لیے اس پر جعلی پستول رکھنے کا بھی الزام عائد کیا گیا، زخمی ہونے والا عثمان کپڑے کی دکان پر کام کرتا ہے۔
ڈی ایس پی چوہدری سہیل فیض نے جائے وقوعہ اور لاک اپ کا دورہ کیا، مزید تحقیقات کے لیے ایس ایچ او سمیت دیگر اہلکاروں کو طلب کیا گیا، زخمی عثمان کے ساتھ بچ جانے والے نوجوان کو بھی بلایا گیا اور ایس ایچ او، اہلکاروں اور دیگر کے بیانات بھی لئے گئے۔
انکوائری کمیٹی کو ابتدائی تحقیقات کے دوران مقابلہ جعلی ہونے کے شواہد مل گئے، فائرنگ کا واقعہ دودھ کی دکان کے باہر گزشتہ رات پیش آیا، مبینہ جعلی مقابلہ تھانے سے تقریباً100 میٹرکی دوری پر پیش آیا تھا۔
ساتھی نوجوان کے مطابق سحری کے لیے دہی لینے رکے تھے، اچانک موٹرسائیکل پر شلوار قمیض پہنے دو افراد آئے اور گولی چلا دی، ہم سمجھے کوئی ڈاکو موبائل یا موٹرسائیکل چھینے والا ہے، انہوں نے زخمی عثمان کو بائیک پر بٹھایا اور وہاں سے بھاگے۔
نوجوان کا کہنا تھا کہ بعد میں پتہ چلا وہ تھانے میں لے گئے ہیں تو ہم تھانے گئے،عثمان کو تڑپتا ہوا تھانے کے لاک اپ میں رکھا ہوا تھا، واضح رہے کہ تحقیقاتی کمیٹی مزید شواہد کی مدد سے آج ایس ایس پی ایسٹ کو رپورٹ پیش کرے گی۔
