کراچی: لیاری نوالین میں رینجرز آپریشن کے دوران رینجرز کا ایک اہلکار جاں بحق ہوگیا، رینجزر نے عزیز بلوچ کے گھر سے گینگ وار کے ایک ملزم سرور بلوچ کو گرفتار کرلیا جبکہ متعدد مشتبہ افراد کو بھی حراست میں لے لیا ہے۔
کراچی کے علاقے لیاری نوالین میں رینجرز کے سرچ آپریشن کے دوران ملزمان نے رینجرز پر فائرنگ کر دی، فائرنگ کے نتیجے میں رینجرز کا ایک اہلکار جاں بحق اورایک زخمی ہوگیا۔
رینجرز ترجمان کے مطابق جرائم پیشہ افراد کی موجودگی کی اطلاع پر سرچ آپریشن کیا گیا، ترجمان کا کہنا ہے کہ جاں بحق اہلکار کی شناخت اصغر جبکہ زخمی کی رحیم کے نام سے ہوئی ہے، زخمی رینجرز اہلکار کو طبی امداد کے لئے ہسپتال منتقل کردیا گیا ہے۔
دوسری جانب سرچ آپریشن کے دوران عزیر بلوچ کے گھر پر چھاپے میں سرور بلوچ نامی ملزم کو گرفتار جبکہ مختلف علاقوں سے متعدد مشتبہ افراد کو حراست میں لیا گیا۔ رینجرز کا علاقے کے داخلی و خارجی راستے بند کرکے گھر گھر تلاشی کا سلسلہ جاری ہے۔
