کراچی(25 جولائی 2025): کورنگی نمبر 4 مبینہ پولیس مقابلے کے دوران فائرنگ کے تبادلے میں 2 ڈاکو ہلاک جبکہ ایک زخمی ہو گیا۔
تفصیلات کے مطابق شہر قائد کے علاقے کورنگی نمبر 4 میں تنظیم فلور مل کے قریب مبینہ پولیس مقابلے کے دوران فائرنگ کے تبادلے میں 2 ڈاکو ہلاک جبکہ ایک زخمی ہو گیا۔
پولیس کے مطابق فائرنگ کے تبادلے میں دو ڈاکو ہلاک اور ایک زخمی حالت میں گرفتار ہوا ہے، ہلاک اور زخمی ملزمان سے اسلحہ اور دیگر سامان برآمد ہوا۔
پولیس کا کہنا ہے کہ موٹرسائیکل پر گشت کے دوران پولیس اہلکاروں نے مشکوک افراد کو روکنے کی کوشش کی، ملزمان نے پولیس کو دیکھ کر فائرنگ شروع کردی۔
حکام کا کہنا ہے کہ جوابی فائرنگ میں تین ڈاکو شدید زخمی ہوگئے تھے تاہم اسپتال منتقلی کے دوران دو ڈاکو ہلاک ہوگئے۔
دوسری جانب میمن گوٹھ کے علاقے ملیر در محمد گوٹھ میں فائرنگ سے 2 افراد زخمی ہوگئے ، زخمی ہونے والوں کو طبی امداد کے لیے جناح اسپتال منتقل کیا گیا، زخمی ہونے والوں میں 55 سالہ محمد خان ولد یار محمد اور اس کا بیٹا 25 سالہ حزیب ولد محمد خان شامل ہیں۔
واقعہ منگنی کی رسم کے دوران اتفاقیہ گولی چلنے سے پیش آیا ، علاقہ پولیس واقعے کی تحقیقات کر رہی ہے۔