کراچی : جنوبی افریقہ کرکٹ ٹیم کے کپتان کوئنٹن ڈی کاک نے کہا ہے کہ پاکستان ٹیم نے اچھا مقابلہ کیا ہماری بیٹنگ میں ناکامی کی وجوہات خود بھی جاننا چاہتا ہوں۔
یہ بات انہوں نے پہلے ٹیسٹ میچ میں شکست کے بعد صحافیوں سے گفتگو کرتے ہوئے کہی، کوئنٹن ڈی کاک نے کہا کہ ٹاس جیت کر ہمیں اچھا اسکور کرنا چاہیے تھا۔
انہوں نے کہا کہ پاکستان ٹیم نے اچھا فائٹ بیک کیا ہے، بیٹنگ میں ناکامی کی وجوہات خود بھی جاننا چاہتا ہوں، برصغیر کی وکٹوں پر ہم نے اچھا کھیل پیش نہیں کیا۔
ایک سوال کے جواب میں ان کا کہنا تھا کہ پہلا میچ ابھی ختم ہوا ہے اور اگلے کا فی الحال سوچا نہیں ہے، ، ماضی میں کچھ سیریز ہم نے بھی جیتی ہیں۔
اگلے میں میچ میں دین ایگلر کی شمولیت کے حوالے سے پوچھے گئے سوال کے جواب میں انہوں نے کہا کہ ڈین ایلگر اگلے میچ کیلئے دستیاب ہوسکتے ہیں۔
واضح رہے کہ پاکستان ٹیم نے جنوبی افریقہ کو کراچی ٹیسٹ میں سات وکٹوں سے شکست دے کر دو میچوں کی سیریز میں ایک صفر کی برتری حاصل کرلی ہے۔
کھیل کے چوتھے روز جنوبی افریقہ نے پاکستان کو جیت کے لئے 88 رنز کا ہدف دیا تھا جو قومی ٹیم نے تین وکٹوں کے نقصان پر حاصل کرلیا۔
کراچی: پاکستان اور جنوبی افریقہ کے درمیان جاری کراچی ٹیسٹ کے تیسرے دن کا کھیل ختم ہوگیا، جنوبی افریقہ نے پاکستان کے خلاف 29 رنز کی برتری حاصل کرلی۔
تفصیلات کے مطابق کراچی ٹیسٹ کے تیسرے روز کھیل کے اختتام پر جنوبی افریقہ نے 4 وکٹوں کے نقصان پر 187 رنز بنالیے، جنوبی افریقہ کو پاکستان کے خلاف 29 رنز کی برتری حاصل ہوگئی۔
کیشو مہاراج 2 اور ڈی کاک بغیر کوئی رن بنائے وکٹ پر موجود ہیں۔
پاکستان کی جاب سے لیگ اسپنر یاسر شاہ نے تین اہم وکٹیں حاصل کیں، نعمان علی نے ایک کھلاڑی کو پویلین کی راہ دکھائی۔
اس سے قبل پاکستان کراچی ٹیسٹ میں اپنی پہلی اننگز میں 378 رنز بناکر آؤٹ ہوئی تھی، اور پاکستان کو 158 رنز کی برتری حاصل ہوئی، جواب میں پروٹیز نے اپنی دوسری اننگز کا محتاط آغاز کیا ، پاکستان کو پہلی کامیابی 48 رنز کے مجموعی اسکور پر ملی جب ڈین ایلگر 29 رنز بناکر آؤٹ ہوئے، یاسر شاہ نے انکی اننگز کا خاتمہ کیا۔
نیشنل اسٹیڈیم کراچی میں جنوبی افریقہ اور پاکستان کے درمیان تیسرے کھیل کا آغاز ہوا تو پاکستانی ٹیل اینڈرز نے برق رفتاری سے رنز بنانے کی کوشش کی، اسی کوشش میں فاسٹ بولر حسن علی 23 رنز بناکر آؤٹ ہوئے، مگر اس وقت تک قومی ٹیم کا مجموعی اسکور 323 تک جاپہنچا تھا۔
یاسر شاہ اور ڈیبیو کرنے والے فاسٹ بولر نعمان نے آخری وکٹ کی شراکت میں 55 رنز بنائے اور پاکستان کی برتری کو مزید مستحکم کیا، تاہم نعمان علی 24 رنز بناکر ہمت ہار گئے۔
یاسر شاہ 38 رنز بناکر ناٹ آؤٹ رہے، پاکستان کی جانب سے فواد عالم 109، فہیم اشرف 64، اظہر علی 51 رنز بناکر نمایاں رہے،جنوبی افریقہ کی جانب سے کاگیسو ربادا اور کیشو مہارا نے 3، تین وکٹیں حاصل کیں، نگیدی اور نورٹ جی کے حصے میں دو دو وکٹ آئیں۔
اس سے قبل جنوبی افریقہ کی ٹیم اپنی پہلی اننگز میں 220 رنز بناکر آؤٹ ہوگئی تھی۔
کراچی: جنوبی افریقہ کے فاسٹ بولر کگیسو رباڈا کے لئے کراچی ٹیسٹ یادگار بن گیا۔
تفصیلات کے مطابق پاکستان اور جنوبی افریقہ کے درمیان کھیلے جارہے پہلے ٹیسٹ کے تیسرے روز پروٹیز فاسٹ بولر نے قومی ٹیم کے کھلاڑی حسن علی کو آؤٹ کرتے ہوئے ٹیسٹ کرکٹ میں اپنی 200 وکٹیں حاصل کیں، رباڈا نے پاکستان کے خلاف پہلی اننگز میں مجموعی طور پر تین کھلاڑیوں کو آؤٹ کیا۔
اسی کے ساتھ رباڈا جنوبی افریقہ کی جانب سے ٹیسٹ کرکٹ میں تیز ترین 200 وکٹیں حاصل کرنے والے تیسرے بولر بن گئے، جنوبی افریقہ کے فاسٹ بولر رباڈا نے یہ کارنامہ صرف 44 ٹیسٹ میچز کھیل کر انجام دیا، پروٹیز فاسٹ بولر نے سال دوہزار پندرہ میں انڈیا کے خلاف موہالی ٹیسٹ میں ڈیبیو کیا تھا۔
ٹیسٹ کرکٹ کی ایک اننگز میں کگیسو رباڈا کی بہترین بولنگ 112رنز کے عوض 7 کھلاڑیوں کو آؤٹ کرنا ہے جبکہ ٹیسٹ کی دونوں اننگز میں ان کے ہاتھوں شکار ہونے والے بلے بازوں کی تعداد 13 ہیں۔
رباڈا کی ٹیسٹ کرکٹ میں 200 وکٹیں مکمل ہونے پر پی سی بی نے انہیں بذریعہ سوشل میڈیا خراج تحسین پیش کیا ہے۔
کراچی: ٹیسٹ کرکٹر فواد عالم کی شاندار سنچری کی بدولت جنوبی افریقہ کے خلاف دوسرے دن کھیل کے اختتام پر پاکستان نے 8 وکٹوں کے نقصان پر 308 رنز بنالیے۔
تفصیلات کے مطابق پاکستان اور جنوبی افریقہ کے درمیان کھیلے جانے والے پہلے ٹیسٹ میچ کے دوسرے روز کھیل کے اختتام پر پاکستان نے 8 وکٹوں کے نقصان پر 308 رنز بنالیے، قومی ٹیم کو جنوبی افریقہ کے خلاف 88 رنز کی برتری حاصل ہوگئی۔
حسن علی 11 اور نعمان علی 6 رنز کے ساتھ وکٹ پر موجود ہیں، فواد عالم نے 109 رنز کی شاندار اننگز کھیلی، ان کی اننگز میں 2 چھکے اور 9 چوکے شامل تھے، آل راؤنڈر فہیم اشرف 64 رنز بنا کر نمایاں رہے۔
اظہر علی نے 51 رنز کی ذمہ دار اننگز کھیلی، وکٹ کیپر بیٹسمین محمد رضوان نے 33 رنز بنائے۔
جنوبی افریقہ کی جانب سے کاگیسو ربادا، کیشو مہارا، نگیدی اور نورٹ جی نے دو، دو وکٹیں حاصل کیں۔
اس سے قبل بائیں ہاتھ سے بلے بازی کرنے والے فواد عالم ہوم گراؤنڈ پر اپناپہلا ٹیسٹ میچ کھیل رہےہیں، جہاں انہوں نے پروٹیز کے خلاف اپنے کیریئر میں پہلی بار ہوم گراؤنڈ میں سینچری اسکور کرنے کے ساتھ ساتھ جنوبی افریقہ کی 220 رنز کی برتری کا خاتمہ کیا، جنوبی افریقہ نے پہلی اننگز میں 220 رنزبنائے تھے۔
جنوبی افریقہ کے بولرز دو سیشن کے درمیان صرف دو وکٹ حاصل کرپائے،مڈل آرڈر بلے باز اظہر علی 51 رنز بناکر کیشو مہاراج کا شکار بنے جبکہ محمد رضوان کو لنگی نگادی نے چلتا کیا۔
کھیل کے دوسرے روز آخری سیشن میں فواد عالم نے ہوم گراؤنڈ میں پہلی بار سینچری بنانے کا خواب پایہ تکمیل تک پہنچایا، وہی آل راؤنڈ فہیم اشرف نے فواد عالم کا بھرپور ساتھ دیتے ہوئے نصف سینچری اسکور کی۔
فواد عالم اور اظہر علی پانچویں وکٹ کی شراکت میں قیمتی 94 رنز کا اضافہ کیا، دونوں بلے بازوں نے کھیل کے پہلے سیشن میں بہترین حکمت عملی کے تحت جنوبی افریقی بولرز کو کوئی وکٹ نہ لینے دی، پاکستان نے آج کھیل کے پہلے سیشن میں 71 رنز بنائے تھے۔
گذشتہ روز جب پہلے دن کے کھیل کا اختتام ہوا تو 33 رنز پر قومی ٹیم کے 4 کھلاڑی آؤٹ ہوچکے تھے، پاکستان کی پہلی اننگز میں ڈیبیو کرنے والے اوپنر عمران بٹ 9 رنز بنا کر فاسٹ بولر ربادا کا شکار بنے جبکہ عابد علی کو بھی 4 رنز پر ربادا نے بولڈ کیا، کپتان بابر اعظم 7 رنز بنا کر مہارا راج کو وکٹ دے بیٹھے، نائٹ واچ مین شاہین شاہ آفریدی بغیر کوئی رن بنائے آؤٹ ہوئے۔
کراچی ٹیسٹ کے پہلے روز مہمان ٹیم اپنی پہلی اننگز میں 220 رنز بنا کر آؤٹ ہوگئی تھی، مہمان ٹیم کی جانب سے ڈین ایلگر سب سے زیادہ رنز بناکر نمایاں رہے، انہوں نے 58 رنز کی اننگز کھیلی، جارج لنڈے 35 فاف ڈوپلیسی 23،ربادا 21، ایڈن میکرم 13، ریسی وینڈرڈوسن 17، کپتان کوئنٹن ڈی کوک 15، تمبا باؤما 17، کیوش مہاراج صفر پر آؤٹ ہوئے۔پاکستان کی جانب سے لیگ اسپنر جوڑی نے جنوبی افریقہ کی پانچ کھلاڑیوں کو پویلین کی راہ دکھائی، یاسر شاہ نے 3 جبکہ ٹیسٹ ڈیبیو کرنے والے نعمان علی نے 2 کھلاڑیوں کو آؤٹ کیا، طویل عرصے بعد ٹیسٹ ٹیم میں شامل ہونے والے فاسٹ بولر حسن علی نے ایک اور شاہین شاہ آفریدی نے 2 کھلاڑیوں کو آؤٹ کیا تھا۔
یاد رہے اس سے قبل دونوں ٹیمیں کراچی میں آخری بار 2007 میں مدمقابل آئی تھیں جس میں مہمان ٹیم 160 رنز سے سرخرو ہوئی تھی جب کہ سیریز کا دوسرا ٹیسٹ میچ لاہور میں ہوا تھا جو بغیر کسی نتیجے کے ختم ہوگیا تھا۔
پاکستان کی جانب سے لیگ اسپنر جوڑی نے جنوبی افریقہ کی پانچ کھلاڑیوں کو پویلین کی راہ دکھائی، یاسر شاہ نے 3 جبکہ ٹیسٹ ڈیبیو کرنے والے نعمان علی نے 2 کھلاڑیوں کو آؤٹ کیا، طویل عرصے بعد ٹیسٹ ٹیم میں شامل ہونے والے فاسٹ بولر حسن علی نے ایک اور شاہین شاہ آفریدی نے 2 کھلاڑیوں کو آؤٹ کیا تھا۔