کراچی(31 جولائی 2025): جامعہ کراچی کے طلبا کی بس پر فائرنگ کی سی سی ٹی وی فوٹیج اور ڈرائیور کا موقف سامنے آگیا۔
گزشتہ روز 30 جولائی 2025 کو جامعہ کراچی کے طلباء کی بس پر مبینہ فائرنگ کا واقعہ پیش آیا، ملزم بلال احمد نے راستہ نا دینے پر یونیورسٹی پوائنٹ پر فائرنگ کی جس کی سی سی ٹی وی فوٹیج اےآروائی نیوز نے حاصل کرلی ہے۔
فوٹیج میں گاڑی کو پوائنٹ کے پیچھے سے آگے نکلتے دیکھا جاسکتا ہے ایک جگہ سڑک پر گاڑی پوائنٹ کے آگے آکر کھڑی ہوگئی۔
جامعہ کراچی کی بس پر فائرنگ کرنے والا پکڑا گیا
پولیس حکام کے مطابق ڈرائیور کے مطابق ملزم نے بس کو اوورٹیک کیا تھا دو مرتبہ راستہ مانگنے کے لیے ہارن دیا مگر ملزم نا ہٹا، ڈرائیور کے مطابق اس سے پوچھا کیا مسئلہ ہے تو اس نے پستول دکھایا۔
ڈرائیور کا موقف ہے کہ دو مرتبہ کار کی کھڑکی سے پستول نکال کر دکھائی گئی جب تیسری مرتبہ ہارن بجایا تو ملزم نے دو گولیاں چلائی جس سے ایک نشانہ ونڈ اسکرین پر لگا خوش قسمتی سے طلباء محفوظ رہے جبکہ کار مالک فائرنگ کے بعد این ای ڈی کے سامنے پل کی سائیڈ سے فرار ہوگیا۔
رینجرز ذرائع کے مطابق یونیورسٹی انتظامیہ نے رینجرز حکام کو واقعے سے متعلق خط لکھا ہے، رینجرز کے خصوصی ونگ نے گلستان جوہر میں آئی بی او سے ملزم کو گرفتار کرکے کسٹڈی متعلقہ پولیس حکام کے حوالے کی، پولیس حکام کا کہنا ہے کہ پولیس ملزم سے قانون کے مطابق کارروائی کرے گی۔