کراچی چڑیا گھر کی سب سے پرانی شیرنی بنگال ٹائیگر ریچل انتقال کرگئی۔
کراچی چڑیا گھر انتظامیہ کے مطابق مرنے والی شیرنی کی عمر 30 سال تھی جس کی طبعی موت ہوئی ہے، مادہ بنگال ٹائیگر کی عمریں 18 سے 20 سال کے درمیان ہوتی ہے۔۔
چڑیا گھر انتظامیہ کا کہنا ہے کہ گزشتہ رات شیرنی کی طبیعت خراب ہوئی اور صبح انتقال ہوگیا، دوسری جانب ذرائع کا کہنا ہے کہ شیرنی کی طبیعت 15 دن سے خراب تھی، علاج پر توجہ نہیں دی گئی۔
کراچی کے چڑیا گھر میں افریقی بن مانس (چیمپنزی) کے ہلاک ہونے کی وجہ سامنے آگئی، دل کا دورہ پڑنے سے موقع پر ہی دم توڑ گیا۔
اس حوالے سے ڈائریکٹر چڑیا گھراقبال نواز نے میڈیا کو بتایا کہ کراچی چڑیا گھر میں نایاب نسل کا چمپینزی مرگیا ہے، اس کے پوسٹ مارٹم کیلئے اقدامات کیے جارہے ہیں۔
کنسلٹنٹ کراچی چڑیا گھر ایم ایچ پیرزادہ نے ابتدائی رپورٹ تیار کرلی ہے جس میں کہا گیا ہے کہ چیمپینزی کی ہلاکت دل کا دورہ پڑنے سے ہوئی ہے۔
ڈاکٹر ایم ایچ پیرزادہ کے مطابق چمپینزی کے پھیپھڑے اور گردے ٹھیک تھے، دل میں خون کا دورانیہ رک جانے کی وجہ سے موت واقع ہوئی، موت کی مزید تفصیلات پوسٹ مارٹم کے بعد سامنے آئیں گی۔
واضح رہے کہ چڑیا گھر میں جانوروں کی ہلاکتوں کا نہ رکنے والا سلسلہ جاری ہے، جس کے باعث چڑیا گھر کی رونقیں ماند پڑنے لگی ہیں۔ چڑیا گھر میں پے در پے جانوروں کی ہلاکتوں کے واقعات تسلسل سے سامنے آرہے ہیں۔
ذرائع کے مطابق چڑیا گھر میں گزشتہ ڈیڑھ سال کے دوران 2 شیر، ایک ہاتھی اور بن مانس ہلاک ہوگیا ہے جبکہ ہرن کے بچوں سمیت چھوٹے درجنوں چرند و پرند کی ہلاکتیں بھی ہوئی ہیں۔
چند روز قبل ہتھنی نورجہاں جو بخارمیں مبتلا تھی، جسے بچانے کیلئے تمام کوششیں کی گئیں، مگر ہتھنی کو بھی نہ بچایا جاسکا۔
کراچی: شہر قائد کی اہم تفریح گاہوں چڑیا گھر، سفاری پارک اور لانڈھی زو میں مختلف ٹھیکوں کی نیلامی کی تیاری شروع کر دی گئی۔
تفصیلات کے مطابق کراچی کی اہم تفریح گاہوں میں انٹری فیس، پارکنگ فیس، پلے ایریا، شاپس، کینٹین اور مخلتف اسٹالز کی نیلامی کی منظوری دے دی گئی۔
کے ایم سی کی جانب سے تینوں تفریحی مقامات پر ٹھیکوں کی نیلامی کے لیے اخبارات میں اشتہارات دینے کا فیصلہ کیا گیا ہے، حکام کا کہنا ہے کہ ان تفریح مقامات پر جاری ٹھیکوں کی مدت 30 جون کو مکمل ہو جائے گی۔
تینوں تفریحی مقامات پر 10 کروڑ روپے سے زائد مالیت کے ٹھیکے نیلام کیے جائیں گے، تمام ٹھیکے اوپن آکشن کے تحت دینے کا فیصلہ کیا گیا ہے، جو ایک سال کی مدت کے لیے دیے جائیں گے۔
اس سلسلے میں کراچی چڑیا گھر میں 4 سے 6 جولائی تک اوپن آکشن ہوگا، سفاری پارک میں 10 سے 12 جولائی تک آکشن ہوگا، سفاری پارک میں گیارہ سائٹس کے ٹھیکوں کی نیلامی ہوگی۔
چڑیا گھر اور لانڈھی زو میں مجموعی طور پر 27 سائٹس کے لائسنس جاری کیے جائیں گے، ان ٹھیکوں کی مالیت 7 کروڑ روپے سے زائد بنے گی، جب کہ سفاری پارک میں 2 کروڑ روپے سے زائد مالیت کے گیارہ ٹھیکے نیلام کیے جائیں گے۔
کراچی : ہتھنی نورجہاں کی ہلاکت کے حوالے سے کراچی کے چڑیا گھر میں بڑی تبدیلیوں کا امکان ہے ذرائع کا کہنا ہے کہ کرپشن کرنے والے عناصر پر ہاتھ ڈالا جائے گا۔
تفصیلات کے مطابق کراچی چڑیا گھر میں انتظامیہ کی سنگین غفلت اور لاپرواہی کے باعث 17 سالہ ہتھنی نورجہاں کئی روز بے بسی کے عالم میں رہنے کے بعد چل بسی تھی۔
ہتھنی کی ہلاکت کے بعد متعلقہ حکام بالا نے مزید نقصانات سے بچنے کیلئے اہم اقدامات کرنے کا فیصلہ کیا ہے جس کے تحت چڑیا گھر میں بڑی تبدیلیوں کا امکان ہے۔
ذرائع کے مطابق مذکورہ تبدیلیاں مسلسل شکایات کی بنیاد پرکی جارہی ہیں، فرائض بہتر طریقے سے سرانجام دینے والے 3ملازمین کو پہلے ہی زو میں تعینات کردیا گیا ہے۔
ایسے افسران و عملے کو تلاش کیا جارہا ہےجو چڑیا گھر کو مزید بہتری کی جانب گامزن کرسکیں، جانوروں کو دی جانے والی خوراک میں کرپشن کو بے نقاب کرنے کیلئے بھی ٹیم لائی جارہی ہے۔
ذرائع کے مطابق اس کے علاوہ گورنرسندھ کامران ٹیسوری اور وزیربلدیات ناصرحسین شاہ بھی کراچی چڑیا گھر کی کارکردگی سے مطمئن نہیں ہیں۔
متعلقہ اعلیٰ افسران کی جانب سے بلدیہ عظمیٰ انتظامیہ کو ٹاسک دیا گیا ہے کہ وہ ایک مہینے میں چڑیا گھر کی حالت زار کو درست کریں، لاہور چڑیا گھر کی مثال سامنے رکھتے ہوئے کراچی چڑیا گھر کی صورتحال کو بہتر بنایا جائے گا۔
یاد رہے کہ ہتھنی نورجہاں نے کراچی کےچڑیاگھر میں 14سال گزارے تھے، ہتھنی کی موت17سال تھی، اسے سال 2009میں تنزانیہ سے کراچی منتقل کیا گیا تھا جب اس کی عمر تین سال تھی، اس وقت 4ہاتھیوں کو کراچی منتقل کرنے میں شہری حکومت کے4کروڑ روپے خرچ ہوئے تھے۔
کراچی: چڑیا گھر کی بیمار ہتھنی نور جہاں کی صحت یابی سے متعلق ’فور پاز‘ کے انٹرنیشنل ویٹ ڈاکٹرز نے تکلیف دہ انکشاف کیا ہے کہ اس کی حالت میں بہتری نہیں آ رہی ہے۔ بین الاقوامی ڈاکٹرز نے صحت مند ہاتھی مدھو بالا کو کسی موزوں جگہ منتقلی کا بھی مطالبہ کر دیا۔
تفصیلات کے مطابق فور پاز کے بین الاقوامی ڈاکٹرز نے انسٹاگرام پر نور جہاں ہتھنی کی ویڈیو شئیر کی ہے، جس کے کیپشن میں اس کی صحت کے حوالے سے یہ انکشاف کیا گیا ہے کہ ’’فور پاز کی مقامی ٹیم کی مسلسل نگرانی اور کوششوں کے باوجود نور جہاں کی صحت میں بہتری نہیں آ رہی ہے۔‘‘
بین الاقوامی ڈاکٹرز کے مطابق کئی کوششوں کے باوجود ہتھنی خود سے پیروں پر کھڑا ہونے سے قاصر ہے، اس کی حالت تشویش ناک اور غیر یقینی ہے۔
پوسٹ میں لکھا گیا ہے کہ ’’بین الاقوامی اور قومی ماہرین اور جانوروں کے ڈاکٹروں کی ایک فوری کمیٹی مشورہ دے گی کہ نور جہاں کے مستقبل کو کیسے آگے بڑھایا جائے، فیلڈ پر موجود ٹیم اس کی تکلیف کو کم کرنے کے لیے ہر ممکن کوشش کر رہی ہے، اور ہم اس کوشش میں شامل ہر فرد کی تعریف کرتے ہیں۔‘‘
View this post on Instagram
ڈاکٹرز نے لکھا ’’پچھلے دورے پر افریقی ہاتھیوں کو موزوں گھر میں منتقل کرنے کا مشورہ دیا گیا تھا جس پر عمل نہیں کیا گیا، موجودہ صورت حال کے ساتھ ہم صحت مند ہاتھی مدھوبالا کی فوری منتقلی کا مطالبہ کرتے ہیں، کیوں کہ مناسب دیکھ بھال نہ ہونے کی وجہ سے ایک اور بڑا نقصان ہو سکتا ہے۔‘‘
فور پاز نے پاکستان کے ہاتھیوں کے اچھے مستقبل کی امید ظاہر کی اور کہا کہ وہ اس مقصد کے لیے کام جاری رکھیں گے۔
کراچی: کراچی چڑیا گھر میں ہتھنی نور جہاں کی طبیعت تاحال نازک ہے، ڈاکٹروں نے 24 گھنٹے اہم قرار دے دیے ہیں۔
تفصیلات کے مطابق ڈائریکٹر چڑیا گھر کنور ایوب نے کہا ہے کہ ہتھنی نور جہاں کا انرجی لیول نیچے آ گیا ہے، غیر ملکی ڈاکٹروں کی ٹیم پاکستان آ رہی ہے، جانوروں کے طبی ماہرین کی ٹیم نے کہا تھا کہ ہتھنی کی حالت آئی سی یو مریض جیسی ہے۔
انھوں نے کہا ’’نور جہاں ہتھنی کے علاج سے متعلق ڈاکٹر عامر ہم سے رابطےمیں ہیں، ہتھنی کو جتنی ادویات اور خوراک وغیرہ دی جا رہی ہے وہ سب ڈاکٹرز کی ہدایت پر کیا جا رہا ہے۔‘‘
ایڈمنسٹریٹر کراچی ڈاکٹر سیف الرحمان نے کہا کہ ہتھنی کو آج کرین کی مدد سے چلانے کی کوشش کی جائے گی، شدید بیماری کی وجہ سے نور جہاں کھڑے ہونے سے قاصر ہے، نور جہاں کی مسلسل دیکھ بھال کی جا رہی ہے، غیر ملکی ڈاکٹرز کو چڑیا گھر آنے کے لیے خط لکھا ہے، علاج کے سلسلے میں ویڈیو لنک کے ذریعے ڈاکٹروں سے مشورہ کیا جا رہا ہے۔
کراچی چڑیا گھر کی نور جہاں نامی ہتھنی کی صحت میں بہتری آنے لگی#NoorJehan #elephant #KarachiZoo pic.twitter.com/V6behfvl8R
— Ali Hasan (@AaliHasan10) April 16, 2023
لیگل کنسلٹنٹ فار پاز اویس اعوان نے کہا کہ 4 دنوں سے ہم مسلسل کام کر رہے ہیں، نور جہاں ہار نہیں مان رہی تو ہم بھی ہار نہیں مانیں گے۔
انھوں نے کہا کہ نور جہاں ہتھنی کے علاج کے حوالے سے آج کا دن بہت اہم ہے، اس میں کوئی شک نہیں کہ بڑا جانور گر جائے تو کھڑا کرنا مشکل ہے، ہتھنی پہلے کیسے گری یہ نہیں معلوم لیکن اب بہتر ہو رہی ہے۔
کراچی: بیرون ملک سے دانتوں کی تکلیف میں مبتلا کراچی چڑیا گھر کی دو ہتھنیوں کے آپریشن کے لیے آنے والے ماہرین کے پاکستان پہنچنے میں تاخیر ہو گئی ہے، جو آج رات ترکی کے شہر استنبول سے کراچی پہنچیں گے۔
اے آروائی نیوز براہِ راست دیکھیں live.arynews.tv پر
اے آر وائی نیوز کے مطابق بین الاقوامی تنظیم فور پاز کی 4 ڈاکٹروں کی ٹیم کے سربراہ ڈاکٹر امیر خلیل نے کہا ہے کہ ہمارے 2 سرجنز پاکستان کی تاریخ کے پہلے اور انوکھے روٹ کینال کے لیے آپریشن کا سامان لے کر آج رات استنبول سے کراچی پہنچیں گے۔
غیر ملکی ڈاکٹرز کی ٹیم نے دونوں ہتھنیوں کا معائنہ کر لیا ہے، ڈاکٹر امیر خلیل کا کہنا ہے کہ آپریشن کے انتظامات کو حتمی شکل دی جا رہی ہے، یہ اپنی نوعیت کا انوکھا روٹ کینال ثابت ہوگا، جس میں ہتنھی کے بیک وقت دونوں طرف کے دانت نکالے جائیں گے۔
انھوں نے بتایا کہ ہتھنی کو لٹا کر روٹ کینال نہیں کر سکتے، لیکن اسے بے ہوش کرنے کے بعد روٹ کینال کریں گے، اور اس لیے ہتھنی کے سر کو دونوں طرف سے سہارا دیا جائے گا، انھوں نے کہا کہ یہ آپریشن ہتھنیوں کے لیے نقصان دہ نہیں ہے، اور آپریشن میں مزید دیر نہیں لگا سکتے۔
ڈاکٹر امیر خلیل کے مطابق ہاتھی کے دانتوں کے مسائل کے علاج کا ایسا طریقہ پہلے کبھی استعمال نہیں کیا گیا، ماہر ویٹرنریرین ایک جدید طریقہ استعمال کریں گے جو روایتی طریقہ سے بہت کم نقصان والا ہے، کیوں کہ روایتی سرجری صرف رسکی اینستھیزیا کے تحت ہی ممکن ہے اور اس کے نتیجے میں سرجری کے بعد طویل علاج بھی ضروری ہوگا، جس میں پیچیدگیوں کا خطرہ زیادہ ہوگا۔
طریقہ کار
انھوں نے کہا ہم ‘اسٹینڈنگ’ مسکن دوا کے تحت سرجری کرنے کا منصوبہ بنا رہے ہیں، یعنی ہتھنی کو کھڑے حالت میں بے ہوشی کی دوا دی جائے گی، اور یہ علاج اتنا منفرد ہے کہ اس کے لیے خصوصی آلات بھی تیار کرنے پڑے ہیں۔
یہ سرجری برلن کے لیبنز انسٹی ٹیوٹ فار زو اینڈ وائلڈ لائف ریسرچ (پروفیسر تھامس ہلڈیبرانڈ اور ڈاکٹر فرینک گورٹز) کے 2 ماہر ویٹرنرینز کریں گے، جو ڈاکٹر امیر خلیل کی قیادت میں فور PAWS ٹیم کا حصہ ہیں۔
کراچی زو کی ہتھنیاں دانتوں کی تکلیف میں مبتلا، روٹ کینال آپریشن ہوگا
ڈاکٹروں کی ٹیم پروسیجر کے دوران ہتھنی کی دانتوں سے مردہ بافتوں کو ہٹائے گی، جڑ کی نالی کو صاف کرے گی، اور مقامی ٹیم کو سکھائے گی کہ کس طرح سوزش کو روکنے اور زخموں کی حفظان صحت کو برقرار رکھنے کے لیے علاج کے بعد باقاعدگی سے صفائی کرنی ہے۔
یہ طریقہ دوسرے قسم کے جانوروں جیسا کہ گھوڑوں کے علاج کے لیے استعمال کیا گیا ہے، لیکن پہلے کبھی ہاتھی پر استعمال نہیں ہوا۔
واضح رہے کہ ہتھنیوں کے روٹ کینال اور علاج پر آنے والی لاگت بین الاقوامی تنظیم فور پاز برداشت کر رہی ہے، جو لوگوں کے عطیات کے ذریعے اسے پورا کرتی ہے۔
خیال رہے کہ کراچی چڑیا گھر کی 16 سالہ مدھو بالا اور 17 سالہ نور جہاں دونوں ہتھنیوں کا روٹ کینال ہوگا۔
کراچی: شہر قائد کے چڑیا گھر کی ہتھنیاں دانتوں کی تکلیف میں مبتلا ہو گئی ہیں، جنھیں اس تکلیف سے نجات دلانے کے لیے روٹ کینال کیا جائے گا۔
اے آروائی نیوز براہِ راست دیکھیں live.arynews.tv پر
تفصیلات کے مطابق پاکستان کی تاریخ میں ایک انوکھا روٹ کینال آپریشن ہونے جا رہا ہے، کراچی زو کی 16 سالہ مدھو بالا اور 17 سالہ نور جہاں نامی ہتھنیوں کا روٹ کینال ہوگا۔
دونوں ہتھنیاں دانتوں کی تکلیف میں مبتلا ہیں، آسٹریا سے آنے والے انٹرنیشنل فور پاز نامی تنظیم کے ڈاکٹرز روٹ کینال آپریشن کریں گے۔
مدھو بالا کا دانت گل چکا ہے، جس کا آپریشن کل کیا جائے گا، غیر ملکی ڈاکٹرز کی ٹیم نے دونوں ہتھنیوں کا معائنہ کر لیا ہے۔
ڈاکٹرز کا کہنا ہے کہ دونوں ہتھنیوں کے دانتوں کا انفیکشن خطرناک مرحلے تک پہنچ گیا ہے اور وہ مسلسل درد میں مبتلا ہیں۔
روٹ کینال پروسیجر کے لیے طبی آلات خاص طور پر ڈیزائن کیے گئے ہیں، جن میں بڑے سائز کے ایکسکویٹرز، ڈرلز، انڈوڈونٹک برس اور دیگر آلات شامل ہیں۔
تنظیم فور پاز کی ٹیم ڈاکٹر مرینا ایوانووا، ڈاکٹر فرینک گورتز، ڈاکٹر تھامس ہلڈربرانت، سی ای او جوزف فابیگان، ڈائریکٹر عامر خلیل، ہاتھی ٹرینر میتھیئس اوٹو اور ان کے اسسٹنٹ ایگنیزکا پر مشتمل ہے۔
کراچی: شہر قائد کے چڑیا گھر میں 10 سال سے تنہائی کا شکار زیبرا چل بسا۔
تفصیلات کے مطابق کراچی زو کا واحد زیبرا بھی اب نہ رہا، اس نے اپنے انکلوژر میں دس سال تنہائی کے عالم میں گزارے۔
کراچی چڑیا گھر کی انتظامیہ نے پھرتی دکھاتے ہوئے صبح سویرے ہی زیبرے کا پوسٹ مارٹم کر ڈالا، امکان ظاہر کیا جا رہا ہے کہ اس کی موت دل کے دورے کے باعث ہوئی ہے۔
تاہم ڈائریکٹر ریکریشن بلدیہ عظمیٰ کراچی منصور قاضی کا کہنا ہے کہ زیبرے کی موت کی وجہ کا حتمی تعین پوسٹ مارٹم رپورٹ سے ہوگا، اور اس کی رپورٹ کل موصول ہوگی۔
ماہرین کا کہنا ہے کہ زیبرے کی طبعی عمر 20 سے 25 سال ہوتی ہے، جب کہ مرنے والے زیبرے کی عمر 23 سال تھی، یہ زیبرا کراچی کے چڑیا گھر ہی میں تئیس برس قبل پیدا ہوا تھا، تاہم یہ صحت مند تھا۔
ڈائریکٹر ریکریشن منصور قاضی نے بتایا کہ جلد ہی زیبرے کا متبادل چڑیا گھر لایا جائے گا۔
کراچی: نایاب سفید شیر کی ہلاکت پر سینئر ڈائریکٹر زو اور سفاری خالد ہاشمی کو عہدے سے ہٹا دیا گیا، سابق میئر کراچی وسیم اختر نے شیر کی ہلاکت پر تحقیقات کا مطالبہ کر دیا ہے۔
تفصیلات کے مطابق چڑیا گھر میں نایاب سفید شیر کی موت پر چڑیا گھر اور سفاری پارک کے سینئر ڈائریکٹر خالد ہاشمی کے خلاف کارروائی کرتے ہوئے ان کی عہدے سے برطرفی کا نوٹیفکیشن جاری کر دیا گیا ہے، اور ان کی جگہ منصور قاضی کو سینئر ڈائریکٹر مقرر کر دیا گیا۔
شیر کی ہلاکت کے معاملے پر سابق مئیر وسیم اختر ایڈمنسٹریٹر کراچی پر پھٹ پڑے ہیں، انھوں نے کہا جو نایاب شیر میں اپنے دور نظامت میں صحت مند چھوڑ کر آیا تھا، چار مہینے میں انھوں نے اس کو مار دیا، وزیر اعلیٰ سندھ فوری طور پر شیر کی ہلاکت کے حوالے سے تحقیقاتی کمیٹی بنائیں۔
کراچی چڑیا گھر میں موجود نایاب نسل کا سفید شیر ہلاک
انھوں نے کہا تحقیقاتی کمیٹی میں ایڈمنسٹریٹر کو شامل تفتیش کیا جائے، پی پی چیئرمین بلاول بھی ایڈمنسٹریٹر سے پوچھیں وہ چار مہینے سے کیا کر رہا ہے، پیپلز پارٹی نے پہلے یہاں کے شہریوں کو ہلاک کیا اب جانوروں کی باری آ چکی ہے، زو کا ٹھیکے دار ان کو بار بار لکھ رہا ہے میرے بلز کلیئر کرو، بلز کلیئر نہ ہونے کے باعث گوشت، اور کھانے کی دیگر اشیا میں رکاوٹ آتی رہی، لیکن انھوں نے کوئی ایکشن نہیں لیا۔
وسیم اختر کا کہنا تھا کہ چیف جسٹس کراچی میں ہیں، وہ اس معاملے کا نوٹس لیں، بہت پیارا اور اچھا شیر تھا، 13 دن سے بیمار تھا، لیکن کوئی اس کے پاس نہیں گیا، کوئی ڈاکٹر نہیں آیا، کوئی علاج نہیں ہوا، اس حوالے سے سب خبریں جھوٹی ہیں۔