کراچی: بارشوں کے بعد بجلی بحران شدت اختیار کرگیا، 98 فیڈرز بدستور بند ہے ، جس کے باعث شہر کے بڑے علاقوں کو بجلی کی فراہمی معطل ہے۔

تفصیلات کے مطابق کراچی میں دو روز سے جاری طوفانی بارشوں کے بعد بجلی کا شدید بحران برقرار ہے، K-الیکٹرک کے 98 فیڈرز اب بھی غیر فعال ہیں جس کے باعث شہر کے بڑے علاقے بجلی سے محروم ہیں۔

ترجمان نے بتایا کہ زیرزمین کیبلز اور سب اسٹیشنز میں پانی داخل ہونے سے بجلی کی فراہمی متاثر ہوئی ہے۔ سرجانی ٹاؤن، یوسف گوٹھ، معین آباد، اسکیم 33، بلدیہ، گلستانِ جوہر، گلشنِ اقبال، بن قاسم، گلشنِ حدید، منگھوپیر اور رزاق آباد سمیت متعدد علاقوں میں بجلی بحال نہ ہوسکی۔

معین آباد، امیرآباد، صادق آباد اور ماڈل کالونی کے مکین دو روز گزرنے کے باوجود بجلی سے محروم ہیں۔ نارتھ کراچی سیکٹر فائیو آئی، اسکیم 33 کی الااشرف اور سائنٹسٹ سوسائٹی، بلدیہ اور ڈی ایچ اے میں بھی 48 گھنٹے سے بجلی غائب ہے، بجلی کی طویل بندش کے باعث گھروں میں پانی کی قلت پیدا ہوگئی ہے۔

شہریوں کا کہنا ہے کہ مونس علوی کے وعدے، نیپرا کو دی گئی یقین دہانیاں اور صوبائی وزیر توانائی ناصر شاہ کی مداخلت کے باوجود صورتحال میں بہتری نہیں آئی۔

یاد رہے شاہ فیصل کالونی پولیس نے بارش کے دوران کرنٹ لگنے سے جاں بحق ہونے والے دو بھائیوں کے واقعے پر K-الیکٹرک کے چیف ایگزیکٹو آفیسر (CEO) سید مونس عبداللہ علوی اور دیگر حکام کے خلاف مقدمہ درج کرلیا ہے۔

اسرا‌ر خان اور سراج خان اپنے گھر کے باہر زیرزمین بجلی کی تار کے باعث کرنٹ لگنے سے جاں بحق ہوگئے تھے اوعر اہل خانہ نے کے -الیکٹرک حکام کو غفلت کا ذمہ دار ٹھہراتے ہوئے سخت قانونی کارروائی کا مطالبہ کیا ہے۔

واضح رہے موسلا دھار بارش نے شہری زندگی کو مفلوج کر دیا ہے۔ مختلف علاقوں میں شہری سیلاب، سڑکوں کی بندش، بجلی کی طویل بندش اور کٹی پہاڑی پر لینڈ سلائیڈنگ کے واقعات سامنے آئے ہیں۔

بارش کے پانی نے کورنگی انڈسٹریل ایریا روڈ، آئی آئی چندریگر روڈ اور سلطان آباد کو ڈبو دیا، جس سے ٹریفک کی روانی شدید متاثر ہوئی۔ سرجانی ٹاؤن میں صورتحال اس قدر سنگین رہی کہ ریسکیو اہلکاروں کو ایک مریض کو کشتی کے ذریعے اسپتال منتقل کرنا پڑا۔

کراچی (20 اگست 2025): شہر قائد میں طوفانی بارش کے دوران جہاں سڑکیں جوہڑ بن گئیں وہیں لینڈ سلائیڈنگ نے اہل علاقہ کو خوفزدہ کر دیا۔

اے آر وائی نیوز کے مطابق کراچی میں گزشتہ روز شروع ہونے والی موسلادھار بارش کا سلسلہ وقفے وقفے سے آج بھی جاری رہا۔ خصوصا رات کے وقت ہونے والی طوفانی بارش نے شہریوں کی زندگی مفلوج کر دی ہے۔

کراچی میں پہلے بارش سے سڑکیں جوہڑ اور ٹوٹ پھوٹ کر خندق بن جایا کرتیں تھیں۔ تاہم اس برس شہر قائد میں طوفانی بارش نے لینڈ سلائیڈنگ جیسی صورتحال پیدا کر دی۔

قصبہ اور نارتھ ناظم آباد کو ملانے کے لیے پہاڑی کو کاٹ کا راستہ بنائے جانے والے مقام جو کٹی پہاڑی کے نام سے مشہور ہے۔ طوفانی بارش کے دوران پہاڑی کی بلندی سے پتھر سڑک پر گرنے لگے۔

اہل علاقہ کے مطابق آج شام سے کئی بار پتھر کٹی پہاڑی سے سڑک پر گے، جس کے بعد اسسٹنٹ کمشنر کی جانب سے سڑک کو بند کرا دیا گیا۔

پولیس کا کہنا ہے کہ پتھر گرنے کے واقعات میں کوئی جانی نقصان نہیں ہوا ہے۔
دوسری جانب بدھ کی شب کراچی کے مختلف علاقوں میں وقفے وقفے سے گرج چمک کے ساتھ طوفانی بارش کا سلسلہ جاری ہے۔

View this post on Instagram

A post shared by ARY News (@arynewstv)

  دوسری جانب کورنگی، ملیر، شاہ فیصل کالونی، گلشن حدید، رزاق آباد، شاہ لطیف ٹاؤن، بھینس کالونی، کاٹھور، گڈاپ، ایم 9 موٹر وے، نوری آباد، احسن آباد، اسکیم 33، گلستان جوہر، گلشن اقبال میں بارش ہو رہی ہے۔

اس کے علاوہ سرجانی ٹاؤن، نارتھ کراچی، نیو کراچی، ناگن چورنگی، ناظم آباد، نارتھ ناظم آباد، بفرزون، گلبرگ، سائٹ ایریا، منگھو پیر روڈ، میٹروول، گارڈن، پاک کالونی، آئی آئی چندریگر روڈ، صدر، اولڈ سٹی ایریا، نمائش، ڈیفنس، کلفٹن، ٹاور، کیماڑی میں بھی موسلا دھار بارش جاری ہے۔

بارش کے باعث کئی نشیبی علاقے زیر آب اور گھروں میں پانی داخل ہو گیا ہے۔ جب کہ مختلف علاقوں میں پانی میں پھنس کر سینکڑوں شہریوں کی گاڑیاں خراب ہو گئی ہیں۔

محکمہ موسمیات نے بارش کا سلسلہ وقفے وقفے سے دو روز تک جاری رہنے کی پیشگوئی کی ہے اور شہریوں کو احتیاطی تدابیر اختیار کرنے اور غیر ضروری سفر سے گریز کی ہدایات کی ہیں۔