کراچی : محکمہ موسمیات نے کراچی والوں کے لیے خطرے کی گھنٹی بجاتے ہوئے موسلادھار بارش کے باعث شہر میں اربن فلڈنگ کا خطرہ ظاہر کردیا۔

تفصیلات کے مطابق محکمہ موسمیات کی جانب سے کہا گیا کہ مون سون کا حالیہ سسٹم انتہائی طاقتور ہے، جس کے اثرات خیبرپختونخوا میں دیکھے جارہے ہیں، آج اور کل شہر میں موسلادھار بارشوں کا امکان ہے۔

محکمہ موسمیات نے شدید بارش کے پیشِ نظر اربن فلڈنگ اور نشیبی علاقوں میں پانی جمع ہونے کا خدشہ ہے، ہر میں اگلے دو روز تک بارش کا سلسلہ جاری رہنے کا امکان ہے۔

شہر قائد میں گزشتہ کئی روز سے شدید گرمی اور حبس نے شہریوں کو پریشان کر رکھا ہے، تاہم ماہرین موسمیات کے مطابق بادل برسنے سے گرمی کی شدت میں کمی آئے گی۔

کراچی میں بھی بادل برس پڑے، مختلف علاقوں میں موسلادھار بارش

محکمے کا کہنا ہے کہ ہواؤں کی سمت آئندہ چند روز میں تبدیل ہوتی رہے گی، جبکہ ہوا کا کم دباؤ مغرب اور شمال مغرب کی جانب بڑھ رہا ہے۔

کراچی کے علاوہ سندھ کے کئی اضلاع میں بھی بارشوں کا سلسلہ جاری رہے گا۔ تھرپارکر، عمرکوٹ، میرپورخاص، سانگھڑ، بدین، حیدرآباد اور شہید بینظیر آباد میں کہیں تیز، کہیں ہلکی جبکہ بعض مقامات پر شدید بارش کا امکان ہے۔

محکمے نے شہریوں کو ہدایت کی ہے کہ نشیبی علاقوں میں احتیاطی تدابیر اختیار کریں اور غیر ضروری سفر سے گریز کریں۔

کراچی : کیماڑی میں غیر ملکی کمپنی کے عملے سے ڈیڑھ کروڑ کی ڈکیتی کا مقدمہ درج کرلیا گیا، واقعہ کے بعد نقصان کے باعث کمپنی نے کام بند کر دیا ہے۔

تفصیلات کے مطابق کراچی میں کیماڑی کے علاقے میں غیرملکی کمپنی کے عملے سے ڈیڑھ کروڑ روپے کی ڈکیتی کے واقعے کا مقدمہ درج کرلیا گیا۔ .

مقدمہ ڈاکس تھانے میں ڈکیتی کی دفعات کے تحت درج کیا گیا، جس میں کمپنی کے جنرل مینیجر بکونگ ہودلڈے کل لوکی مدعی کے طور پر شامل ہیں۔

مقدمے میں کہا گیا کہ کمپنی کا مالک بھی غیر ملکی ہے اور واقعہ کے بعد نقصان کے باعث کمپنی نے کام بند کر دیا ہے۔

مزید پڑھیں : کراچی میں ڈکیتی کی بڑی واردات : ڈاکو نجی کمپنی کے عملے سے ڈیڑھ کروڑ روپے لوٹ کر فرار

مدعی مقدمے نے بتایا کہ اکاوٴنٹنٹ، سیکیورٹی گارڈ اور ڈرائیور کے ہمراہ بینک گئے جہاں انہوں نے 1 کروڑ 44 لاکھ 39 ہزار 850 روپے کی رقم نکلوائی۔ علاوہ ازیں، بیگ میں پہلے سے 7 لاکھ 61 ہزار 550 روپے، موبائل فون، پاسپورٹس، کریڈٹ کارڈز، ڈرائیونگ لائسنس، CNIC اور دیگر قیمتی سامان موجود تھا۔ اکاوٴنٹنٹ کے بیگ میں بھی 5 لاکھ 20 ہزار روپے رکھے گئے تھے۔ رقم لیکر صبح ساڑھے 10 بجے فشری پہنچے۔

کمپنی کے جنرل مینیجر کا کہنا تھا کہ 3 موٹر سائیکلوں پر سوار 6 ملزمان آئے جن میں سے 4 نے پستول نکال کر حملہ کیا۔ ملزمان نے سیکیورٹی گارڈ نسیم سے پستول چھین لیا اور اکاوٴنٹنٹ کے بیگ سمیت دیگر بیگز چھین کر فرار ہوگئے۔

پولیس نے کہا ملزمان کی تلاش کے لیے سی سی ٹی وی فوٹیج کا جائزہ لیا جا رہا ہے اور واقعہ کی مزید تحقیقات جاری ہیں۔

کراچی: موسلا دھار بارش سے جناح انٹرنیشنل ایئرپورٹ پر فلائٹ آپریشن متاثر ہونے سے متعدد پروازیں تاخیر کا شکار ہے۔

تفصیلات کے مطابق کراچی میں موسلا دھار بارش کے باعث جناح انٹرنیشنل ایئرپورٹ پر فلائٹ آپریشن متاثر ہوا، جس سے ملکی و غیر ملکی پروازیں تاخیر کا شکار ہوئیں۔

ایئرپورٹ ذرائع نے بتایا کہ پاکستان انٹرنیشنل ایئرلائن (پی آئی اے) کی کراچی سے اسلام آباد جانے والی پرواز PK-300 30 منٹ کی تاخیر سے روانہ ہوئی جبکہ فلائی جناح کی پرواز FJ-670 ایک گھنٹے کی تاخیر سے صبح 8 بجے روانہ کی گئی۔ ایئرسیال کی صبح 7 بجے روانہ ہونے والی اسلام آباد پرواز بھی تاحال روانہ نہ ہو سکی۔

اسی طرح پی آئی اے کی کراچی سے لاہور پرواز PK-302 صبح 8 بج کر 30 منٹ پر روانہ ہوئی، جو کہ مقررہ وقت سے آدھا گھنٹہ تاخیر کا شکار تھی۔

حکام کے مطابق تین بین الاقوامی پروازیں بھی موسم کی خرابی کے باعث تاخیر سے کراچی پہنچیں۔

شہر میں رات سے شروع ہونے والا ہلکی بارش کا سلسلہ صبح کے وقت موسلا دھار بارش میں تبدیل ہوگیا، جس سے مختلف علاقوں میں معمولات زندگی متاثر ہوئے۔

تیز بارش طارق روڈ، عزیز آباد، شاہراہِ قائدین، بوٹ بیسن، لیاقت آباد، حسن اسکوائر، نارتھ ناظم آباد، سائٹ ایریا، کلفٹن، ڈیفنس، قیوم آباد، شاہراہِ فیصل، ایئرپورٹ، قائدآباد، ملیر، لانڈھی اور کورنگی میں ریکارڈ کی گئی۔

مزید پڑھیں : کراچی میں بھی بادل برس پڑے، مختلف علاقوں میں موسلادھار بارش

گلستانِ جوہر، گلشنِ اقبال، فیڈرل بی ایریا، اسکیم 33، صفورا چورنگی، ملیر کینٹ، نارتھ کراچی، منگھوپیر، سرجانی ٹاؤن اور تیسر ٹاؤن سمیت متعدد علاقوں میں بھی شدید بارش ہوئی جبکہ نارتھ ناظم آباد اور ملحقہ علاقوں میں تیز بارش کے ساتھ گرج چمک بھی ہوئی۔

محکمہ موسمیات کے مطابق آئندہ 24 گھنٹوں میں ملک کے شمالی علاقوں میں مزید بارشوں کا امکان ہے۔ کشمیر، گلگت بلتستان، مری اور گلیات میں شدید بارش جبکہ کوئٹہ، ژوب، قلات، لاہور، اٹک، راولپنڈی، اسلام آباد، پشاور، نوشہرہ، تھرپارکر، عمرکوٹ، مٹھی اور ٹھٹھہ کے نشیبی علاقوں میں اربن فلڈنگ کا خدشہ ظاہر کیا گیا ہے۔

کراچی: موسلا دھار بارش کے باعث 350 سے زائد فیڈرز ٹرپ کرگئے ، جس کے بعد مختلف علاقوں میں بجلی کی فراہمی معطل ہوگئی۔

تفصیلات کے مطابق کراچی کے مختلف علاقوں میں وقفے وقفے سے موسلا دھار بارش کا سلسلہ جاری ہے جس کے نتیجے میں کے- الیکٹرک کے 350 سے زائد فیڈرز ٹرپ ہو گئے اور متعدد علاقوں میں بجلی کی فراہمی معطل ہو گئی۔

منظور کالونی، ڈی ایچ اے، اختر کالونی، ایف بی ایریا بلاک 2 اور 6، سلطان آباد، مائی کلاچی روڈ کے اطراف، گلشن اقبال بلاک 4، عزیز آباد اور کورنگی کے مختلف علاقوں میں بجلی بند ہے۔

ترجمان کے ای نے بتایا ادارے کا بجلی تقسیمی نظام مستحکم ہے اور اس وقت کراچی کو 2100 میں سے 1770 سے زائد فیڈرز سے بلاتعطل بجلی کی فراہمی جاری ہے تاہم فیلڈ ٹیموں کی کوششوں سے متاثرہ فیڈرز کی بحالی کا عمل تیزی سے جاری ہے۔

مزید پڑھیں : کراچی میں بارش، کے الیکٹرک نے ہدایات جاری کر دیں

بحال کیے جانے والے علاقوں میں ڈیفنس پاسپورٹ آفس، سرور شہید روڈ، کلفٹن بلاک 8 اور 9، پی ای سی ایچ ایس بلاک 2، مین شاہراہِ قائدین، گلستان جوہر کے بلاک 3 اور 14، بلدیہ ٹاؤن کے سیکٹر 4-A، سعید آباد، پاکستان نیوی ہاؤسنگ اسکیم ماڑی پور، اورنگی کے قطر اسپتال، اقبال مارکیٹ، شاہ ولی اللہ نگر، اوتھل و سرجانی کے چیزال آباد، کریم دینو گُڈو گوٹھ اور حب ڈیم کے علاقے شامل ہیں۔

ترجمان نے کہا کہ حفاظتی پروٹوکول کے تحت نشیبی علاقے اور تجاوزات والے علاقوں میں بجلی عارضی طور پر منقطع کی جاتی ہے۔ ادارے کا عملہ مکمل طور پر متحرک ہے اور شہری انتظامیہ و ایمرجنسی مینجمنٹ کے متعلقہ اداروں کے ساتھ مسلسل رابطے میں ہے۔

صارفین بجلی کی ایمرجنسی شکایت کے لیے 118 پر رابطہ کر سکتے ہیں، یا کے ای واٹس ایپ، سوشل میڈیا چینلز اور کے ای لائیو ایپ کے ذریعے فوری اطلاع دے سکتے ہیں۔

کراچی: کیماڑی فش ہاربر کے قریب نجی کمپنی کے عملے سے مبینہ طور پر ڈیڑھ کروڑ روپے سے زائد رقم چھین لی گئی۔

تفصیلات کے مطابق کراچی میں کیماڑی فش ہاربر کے قریب نجی کمپنی کے عملے سے مبینہ طور پر ڈیڑھ کروڑ روپے کی ڈکیتی کی واردات ہوئی۔

پولیس نے بتایا کہ واردات دو موٹرسائیکلوں پر سوار چھ مسلح ملزمان نے کی،کمپنی کا عملہ بینک سے رقم نکال کر واپس آرہا تھا کہ ڈاکوؤں نے انہیں نشانہ بنایا۔

واردات کے دوران ملزمان سیکیورٹی گارڈ کا اسلحہ بھی چھین کر ساتھ لے گئے، کمپنی اور جس بینک سے رقم نکالی گئی اس میں زیادہ فاصلہ نہیں ہے لوٹ مار کے دوران عملے کے ہمراہ موجود گارڈ نے مزاحمت نہیں جبکہ کمپنی کے باہر پہرہ دینے والے سیکیورٹی گارڈ نے بھی فائرنگ نہیں کی۔

ابتدائی تفتیش میں یہ انکشاف ہوا ہے کہ ملزمان کے پاس کمپنی عملے کے بینک سے رقم نکلوانے سے متعلق مکمل معلومات پہلے سے موجود تھیں۔

پولیس کا کہنا ہے کہ واردات کے مقام سے شواہد اکٹھے کیے جا رہے ہیں جبکہ سی سی ٹی وی فوٹیج کا بھی جائزہ لیا جا رہا ہے، عملے اور سیکیورٹی گارڈز کو شاملِ تفتیش کرلیا گیا ہے۔

حکام کے مطابق بینک سے بھی معلومات حاصل کی جا رہی ہیں کہ عملے نے کتنی رقم نکلوائی تھی، ملزمان کی گرفتاری کے لیے ناکہ بندی کردی گئی ہے اور کرائم سین سے شواہد اکٹھے کیے جا رہے ہیں۔

دوسری جانب وزیر داخلہ سندھ نے ایس ایس پی کیماڑی سے ابتدائی تحقیقات کی رپورٹ طلب کرتے ہوئے ہدایت دی ہے کہ ملزمان کو جلد قانون کی گرفت میں لایا جائے۔

کراچی : خونی ڈمپر نے موٹرسائیکل سوار دو افراد کو کچل ڈالا، حادثہ کا مقدمہ ساکران تھانے میں درج کرلیا گیا ہے۔

تفصیلات کے مطابق کراچی میں ہیوی ٹریفک سے اموات کا سلسلہ تھم نہ سکا، حب چوکی ساکران روڈ پر ڈمپر کی ٹکر سے موٹرسائیکل سوار دو افراد جاں بحق ہوگئے۔

جاں بحق ہونے والوں کی شناخت یاسین ولد نامعلوم اوربلاول ولدجمن کےنام سے ہوئی تاہم دونوں لاشیں سول اسپتال کراچی منتقل کردی گئیں اور حادثہ کامقدمہ ساکران تھانے میں درج کرلیا ہے۔

یاد رہے چند روز قبل فیڈرل بی ایریا میں تیز رفتار ڈمپر کی ٹکر سے موٹر سائیکل سوار باپ زخمی جبکہ بیٹی اور بیٹا جاں بحق ہوگئے تھے۔

واضح رہے کہ کراچی میں رواں سال کے 7 ماہ کے دوران ٹریفک حادثات میں 536 افراد جان کی بازی ہارے۔ اعداد و شمار کے مطابق اس عرصے میں ٹریفک حادثات میں جاں بحق ہونے والی خواتین کی تعداد 51رہی، جبکہ سڑک پر ہونے والے دیگر حادثات میں جاں بحق ہونے والے بچوں اور بچیوں کی تعداد 68 ہے۔

ٹریفک حادثات سے سب سے زیادہ متاثر ہونے والوں میں موٹر سائیکل سوار تھے، دوسرے نمبر پر پیدل چلنے والے اور تیسرے نمبر پر دیگر گاڑیوں کے سوار شامل تھے، حادثات میں سب سے زیادہ 274 موٹر سائیکل سوار، پیدل چلنے والے 179 افراد جبکہ دیگر سواریوں کے 83 افراد جاں بحق ہوئے۔