کراچی (30 جولائی 2025): گارڈن پولیس نے 10 گھنٹوں کے اندر اندر پولیس اہلکار مبارک کے جواں سال بیٹے عبد اللہ اعوان کے قتل میں ملوث پولیس اہلکار کو گرفتار کر لیا۔

تفصیلات کے مطابق ایس ایس پی سٹی عارف عزیز نے پریس کانفرنس میں آج بدھ کو بتایا کہ گارڈن پولیس ہیڈکوارٹر کے رہائشی اہلکار مبارک کے بیٹے عبداللہ اعوان کی لاش 27 جولائی کو گارڈن سے ملی تھی، جس کے بعد کیس کی تحقیقات شروع کی گئیں۔

انھوں نے بتایا کہ 10 گھنٹے کے اندر گارڈن پولیس نے کیس حل کر لیا، اور قتل کے ملزم ذوالفقار علی کو گرفتار کر لیا ہے جو خود پولیس اہلکار ہے، اور وہ مقتول عبداللہ کا چاچا بھی ہے۔

ایس ایس پی کے مطابق ملزم نے گھریلو تنازع پر اپنے بھتیجے کو قتل کیا تھا، ملزم ذوالفقار گارڈن تھانے میں حاضر سروس اہلکار ہے، افسوس کی بات ہے پولیس والا ہو کر اس نے پولیس کے ہتھیار سے قتل کیا۔

گارڈن پولیس اہلکار کے بیٹے عبد اللہ اعوان کو کس نے اغوا و قتل کیا؟

انھوں نے کہا ملزم نے بہانے سے بھتیجے کو گھر بلایا تھا اور پھر بیٹری مارکیٹ لے جا کر قتل کر دیا۔

واضح رہے کہ گزشتہ روز پولیس حکام نے بتایا تھا کہ تفتیش میں یہ بات سامنے آئی ہے کہ مقتول عبد اللہ 2 روز سے گھر سے غائب تھا، وہ نشے کا عادی تھا اور اکثر گھر سے باہر رہتا تھا۔ مقتول کا والد پولیس اہلکار مبارک شیٹ کلرک ہے۔

کراچی (29 جولائی 2025): کالا پل کے قریب چلتی ٹرین سے خاتون اور بچے کے چھلانگ لگانے کے واقعہ پر ریلوے حکام کا موقف بھی سامنے آیا ہے۔

اے آر وائی نیوز کے مطابق کراچی کے علاقے کالا پل کے قریب خاتون اور بچے نے گزشتہ دنوں چلتی ٹرین سے چھلانگ لگائی تھی۔ خوش قسمتی سے دونوں محفوظ رہے، تاہم ان کی شناخت نہ ہو سکی۔ مذکورہ واقعہ پر ریلوے حکام کا موقف بھی سامنے آ گیا ہے۔

ریلوے حکام کا کہنا ہے کہ خاتون اور بچےکا چلتی ٹرین سے چھلانگ لگانے کا واقعہ کالا پل کے قریب اس وقت پیش آیا، جب ٹرین انتہائی کم رفتار سے گزر رہی تھی۔

ریلوے حکام کا کہنا ہے کہ خاتون خود ٹرین سے اترنے کی نیت سے کھڑی تھیں۔ ٹرین کی رفتار کم ہوتے ہی خاتون اور بچے نے چھلانگ لگائی۔

ریلوے حکام کے مطابق خوش قسمتی سے خاتون اور بچہ دونوں محفوظ رہے اور ٹرین سے زمین پر گرنے کے بعد دونوں خود ہی اٹھے اور آگے بڑھ گئے۔

ریلوے حکام نے عام افراد بالخصوص ٹرین میں سفر کرنے والوں کو متنبہ کیا ہےکہ چلتی ٹرین سے اترنے کی کوشش انتہائی خطرناک اور جان لیوا ثابت ہو سکتی ہے۔

کراچی : ٹریفک پولیس کے جرمانے اور سختیوں سے پریشان کراچی والوں نے چھ ماہ میں ڈھائی لاکھ سے زائد ڈرائیونگ لائسنس بنوالئے۔

تفصیلات کے مطابق کراچی میں ٹریفک پولیس کے جرمانے اور سختیوں کے بعد ڈرائیونگ لائسنس بنوانے والوں کا رش لگا ہوا ہے۔

سندھ پولیس کی جانب سے اعداد و شمار میں بتایا گیا کہ گذشتہ چند ماہ سے شہری ریکارڈ تعداد میں ڈرائیونگ لائسنس بنوا رہے ہیں جبکہ رش کی وجہ سے شہریوں کو قطار اور انتظار کی زحمت کا سامنا بھی کرنا پڑ رہا ہے۔

پولیس حکام نے انکشاف کیا کراچی والے چھ ماہ میں ڈھائی لاکھ سے زائد ڈرائیونگ لائسنس بنوا چکے ہیں، ناظم آباد اور کلفٹن برانچ میں سب سے زیادہ رش دیکھا گیا تاہم شہری کراچی میں قائم 6 دیگر برانچوں سے بھی مستفید ہوسکتے ہیں۔

کراچی میں سعید آباد، ملیر ۔ کورنگی اور سعو دآباد میں بھی ڈرائیونگ لائسنس برانچیں کام کررہی ہیں جہاں تمام کیٹگریز کے لائسنس کا اجراء کیا جاتا ہے۔

شہری ڈرائیونگ لائسنس برانچ کی ویب سائٹ کے ذریعے بھی آن لائن لرننگ لائسنس حاصل کرسکتے ہیں۔

مزید پڑھیں : کراچی میں سرکاری ڈرائیونگ ٹریننگ اسکول، شہریوں‌ کے لیے خوشخبری

خیال رہے ڈرائیونگ لائسنس ایک سرکاری دستاویز ہے جو حکومت کسی فرد کو جاری کرتی ہے، تاکہ وہ قانونی طور پر سڑکوں پر گاڑی چلانے کا اہل ہو۔ یہ لائسنس اس بات کا ثبوت ہوتا ہے کہ متعلقہ شخص نے ٹریفک قوانین، گاڑی چلانے کی تربیت اور ٹیسٹ مکمل کر لیا ہے۔

پاکستان سمیت دنیا کے بیشتر ممالک میں ڈرائیونگ لائسنس کے بغیر گاڑی چلانا قانوناً جرم ہے۔ لائسنس مختلف اقسام میں جاری ہوتا ہے جیسے موٹر سائیکل، کار، ٹرک یا بس کے لیے علیحدہ علیحدہ لائسنس۔

یہ لائسنس نہ صرف شناخت کا ذریعہ ہوتا ہے بلکہ کسی حادثے یا خلاف ورزی کی صورت میں ذمہ داری کا تعین بھی اسی کے ذریعے کیا جاتا ہے۔

کراچی : ناظم آباد میں شہری منٹوں میں نئی قیمتی موٹرسائیکل سے محروم ہوگیا، واردات کی سی سی ٹی وی فوٹیج منظرعام پر آگئی۔

تفصیلات کے مطابق کراچی میں ڈکیتی ،اسٹریٹ کرائم اور چوری کی وارداتیں عروج پر ہے، ناظم آباد نمبر 1 میں نوجوان سے نئی قیمتی موٹرسائیکل چھین لی گئی۔

واردات کی سی سی ٹی وی فوٹیج منظرعام پر آگئی، جس میں دیکھا جاسکتا ہے کہ شہری گھر کے قریب پہنچتاہے،پیچھے سے ملزمان بھی آجاتے ہیں۔

ملزمان نے اسلحے کے زور پر شہری سےموٹرسائیکل چھینی اور واردات کے بعد باآسانی فرارہو گئے۔

رواں ماہ کے آغاز میں کراچی الفلاح سوسائٹی کے علاقے باغ ابراہیم میں دن دیہاڑے ڈکیتی کی واردات ہوئی تھی ، جہاں موٹرسائیکل سوار ملزم نے اسلحے کے زور پر خاتون سے سونے کی انگوٹھی چھین لی تھی۔

واردات کی سی سی ٹی وی فوٹیج میں خاتون کو بچے کے ساتھ گلی سے جاتے دیکھا جاسکتا تھا، خاتون تھوڑی دیر مزاحمت کرتی ہے، اس دوران گلی میں ایک نوجوان آتا ہے تو ڈاکو اسلحے کے اشارے سے نوجوان کو واپس جانے کی دھمکی دیتا ہے۔

کراچی (29 جولائی 2025) : دورانِ ڈکیتی خاتون سے اجتماعی زیادتی کرنے والے 3 ملزمان گرفتار کرلیا گیا ، تینوں ملزمان نے اپنے جرم کا اعتراف کر لیا ہے۔

تفصیلات کے مطابق کراچی کے علاقے ابراہیم حیدری میں پولیس نے خفیہ اطلاع پر کارروائی کرتے ہوئے خاتون سے مبینہ اجتماعی زیادتی اور ڈکیتی میں ملوث تین خطرناک ملزمان کو گرفتار کر لیا۔

پولیس نے بتایا کہ گرفتار ملزمان نے خاتون کے گھر میں گھس کر نہ صرف زیورات، نقدی اور قیمتی سامان لوٹا بلکہ متاثرہ خاتون کو مبینہ طور پر اجتماعی زیادتی کا نشانہ بھی بنایا۔

حکام کا کہنا تھا کہ گرفتار ملزمان کی شناخت عادل، شیراز اور یاسر کے ناموں سے ہوئی ہے، ملزمان کے قبضے سے غیرقانونی اسلحہ بھی برآمد ہوا ہے

مزید پڑھیں : کراچی: میمن گوٹھ میں مبینہ اجتماعی زیادتی سے لڑکی حاملہ ہوگئی

پولیس کے مطابق ابتدائی تفتیش میں تینوں ملزمان نے اپنے جرم کا اعتراف کر لیا ہے جبکہ یہ بھی انکشاف ہوا ہے کہ اس واردات میں ان کے دو مزید ساتھی بھی شامل تھے، جن کی گرفتاری کے لیے چھاپے مارے جا رہے ہیں۔

پولیس نے مزید بتایا کہ گرفتار ملزمان مختلف وارداتوں میں ملوث رہے ہیں اور ان کا کریمنل ریکارڈ بھی حاصل کیا جا رہا ہے۔

متاثرہ خاتون کا میڈیکل چیک اپ کرایا جا رہا ہے جبکہ کیس کو انسداد دہشتگردی کی دفعات کے تحت درج کر کے مزید تفتیش جاری ہے۔